༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་རྣམ་པ་ལོ་གཉིས་དང་ཕྱེད་ཕྱི་མའི་ནང་མང་ཚོགས་ལ་ཆབ་སྲིད་སོགས་ཀྱི་ལམ་སྟོན་དང་། བདེ་སྡུག་གཟིགས་ཞིབ་སླད་ཕེབས་རྒྱུའི་ལས་རིམ་ཡོད་པ་ལྟར། བོད་མི་མང་སྤྱི་འཐུས་ཙ་ནེ་ཚང་དོན་གྲུབ་བཀྲ་ཤིས་ལགས་དང་སྤྱི་འཐུས་ཚེ་རིང་དབྱངས་ཅན་ལགས་རྣམ་གཉིས་ཕྱི་ལོ་ ༢༠༢༥ ཟླ་བ་ ༢ ཚེས་ ༢ ནས་ ༡༤ བར་རྒྱ་གར་བྱང་ཕྱོགས་སིམ་ལ་དང་། སོ་ལན། ཌོ་ལན་ཇི་བོན་གཞིས། ནར་ཀན་ཌ། ཁ་ར་པ་ཐར། ཅན་རྡི་སྒར། ཇ་ལན་རྡར། ལུ་རྡི་ཡ་ན། ཨམ་བྷ་ལ། མོ་ཧ་ལི། པ་ཊི་ཡ་ལ། སྤོན་ཊ་ཆོལ་གསུམ། ས་ཊོན་ཀཿཐོག ཀུམ་རའོ། སྤུ་རུ་ཝ་ལ། ཧར་པ་སྤུར། སེ་ལ་ཀུའེ། ཀར་ནལ་བཅས་སུ་གཞུང་འབྲེལ་ས་བགོས་ཕྱོགས་བསྐྱོད་གནང་གཏན་ཁེལ་ཡོད།དེ་ཡང་སྤྱི་འཐུས་རྣམ་པ་ཕྱི་ཟླ་ ༢ པོའི་ཚེས་ ༢ ཉིན་བཞུགས་སྒར་དྷ་རམ་ས་ལ་ནས་སིམ་ལར་ཕེབས་ཐོན་གནང་རྒྱུ་དང་། ཕྱི་ཚེས་ ༣ ཉིན་སིམ་ལ་ཁུལ་དང་། སོ་ལན། ཌོ་ལན་ཇི་བཅས་སུ་ལས་རིམ་དང་། ཕྱི་ཚེས་ ༤ ནས་ ༡༣ བར་གོང་འཁོད་ས་གནས་གཞན་ཁག་ལ་རིམ་པས་ལས་རིམ། ཕྱི་ཚེས་ ༡༤ ཉིན་ཅན་རྡི་སྒར་ནས་བཞུགས་སྒར་དྷ་རམ་ས་ལར་ཕྱིར་ཕེབས་གནང་རྒྱུ་ཡིན་པ་བཅས། །
