༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་སྡེ་ཆེན་པོ་བཀྲ་ཤིས་ལྷུན་པོར་རྣམ་གྲོལ་གླིང་བཙུན་དགོན་གྱི་མཁན་མོ་ཐོན་རིམ་དང་པོའི་བཙུན་མ་རྣམས་ལ་མཇལ་ཁ་དང་བཀའ་སློབ་སྩལ་ཡོད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། བཙུན་མའི་སྤྱི་ཚོགས་ནང་ཤེས་ཡོན་སོགས་ཀྱི་ཐོག་ལ་ཞབས་འདེགས་ཁྱད་ཆོས་ལྡན་པ་བསྒྲུབ་རྒྱུ་ཏན་ཏན་ཡོང་ཐུབ་ཀྱི་རེད། ང་རང་ཚོ་ཚང་མས་ཁ་ནས་སངས་རྒྱས་ཀྱི་བསྟན་པ་ཞེས་བཤད་ཀྱི་ཡོད། སོ་སོ་རང་ཉིད་བཙུན་མ་ཞིག་ཡིན་པའི་ཆ་ནས་ག་ཚོད་ཐུབ་ཐུབ་ཀྱིས་ཞབས་འདེགས་སྒྲུབ་ཐུབ་ན། སངས་རྒྱས་ཀྱི་བསྟན་པ་ལ་ཕན་གྱི་ཡོད་པ་རེད། སོ་སོའི་ལག་ལེན་གྱི་ཐོག་ནས་གང་ཡང་མེད་པར་ཁ་ནས་བསྟན་པ་རྒྱས་པར་ཤོག་ཟེར་བ་དེ་འཁྲབ་བཞག་པ་ཞིག་མ་གཏོགས་གང་ཡང་མི་འདུག ཚང་མས་ཧུར་ཐག་བྱོས།
ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པའི་ངོས་ནས་ཞོགག་པ་གཉིད་སད་མ་ཐག་ཏུ་བྱང་ཆུབ་ཀྱི་སེམས་དང་། སྟོང་ཉིད་སྒོམ་པ་སོགས་ཀྱི་ཐོག་ནས་བསྟན་པའི་ཞབས་འདེགས་སྒྲུབ་ཀྱི་ཡོད། ཁྱེད་རང་ཚོས་ཀྱང་དེ་དེ་བཞིན་ཞོགས་པ་གཉིད་སད་པ་དང་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་སྒོམ། དགེ་ཚུལ་མ་ཞིག་ཡིན་པའི་ཆ་ནས་བསྟན་པའི་ཞབས་འདེགས་སྒྲུབ་ཀྱི་ཡོད་བསམས་པ་ཞིག་བྱས་ན་དཔེ་ཡག་པོ་ཡོང་གི་འདུག ཅེས་བཀའ་སློབ་སྩལ།།
