༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནས་ཐད་འཕུར་གནམ་གྲུ་བརྒྱུད་སྦེལ་ཀོབ་བདེ་སྐྱིད་སླར་གསོའི་རྐང་རྩེད་སྤོ་ལོའི་རྩེད་ཐང་དུ་༸ཞབས་སོར་འཁོད་ཡོད། སྐབས་དེར་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་པོ་༧སྐྱབས་རྗེ་གཟིག་རྒྱབ་རིན་པོ་ཆེ་མཆོག་དང་། ལྷོ་སྤྱི་འཇིགས་མེད་ཚུལ་ཁྲིམས་ལགས། རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ་སོགས་ནས་ཕེབས་བསུ་གཟབ་རྒྱས་ཞུས་ཡོད།
དེ་ནས་སྦེལ་ཀོབ་བདེ་སྐྱིད་སླར་གསོའི་རྐང་རྩེད་སྤོ་ལོའི་རྩེད་ཐང་ནས་གདན་ས་བཀྲ་ཤིས་ལྷུན་པོར་ཆིབས་བསྒྱུར་སྐབས་ཕེབས་ལམ་དུ་ས་གནས་ཀྱི་བོད་མི་རྒན་བྱིས་བར་གསུམ་ནས་དགའ་དད་སྤྲོ་གསུམ་གྱི་སྒོ་ནས་ཕེབས་བསུ་གཟབ་རྒྱས་དང་ཞལ་མཇལ་ཞུས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆོས་སྡེ་བཀྲ་ཤིས་ལྷུན་པོའི་འདུ་ཁང་མདུན་དུ་༸ཞབས་སོར་འཁོད་སྐབས་སྐྱབས་རྗེ་དགའ་ལྡན་ཁྲི་ལས་ཟུར་རྣམ་པ་གཙོས་པའི་རིས་མེད་ཆོས་སྡེ་ཁག་གི་མཁན་བླ་སྤྲུལ་རྣམ་པ་དང་། དེ་བཞིན་བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་རྣམ་པ། ས་གནས་ཀྱི་ལས་སྣེ། མི་མང་ཁག་ཅིག་ནས་ཕེབས་བསུ་ཞུས་གྲུབ་བསྟུན་མགོན་པོ་མཆོག་དགོན་པའི་འདུ་ཁང་དུ་ཕེབས་སྟོན་མཛད་སྒོར་དབུ་བཞུགས་གནང་སྟེ། ཐོག་མར་ཆོས་སྡེ་བཀྲ་ཤིས་ལྷུན་པོ་དགོན་པའི་མཁན་རིན་པོ་ཆེ་མཆོག་དང་། འབྲེལ་ཡོད་ས་གནས་འགོ་འཛིན་རྣམ་གཉིས་ནས་མཎྚལ་རྟེན་གསུམ་འདེགས་འབུལ་ཞུས་རྗེས་དེར་འདུས་སྐྱ་སེར་ཚོགས་ཞུགས་པ་རྣམས་ལ་བླང་དོར་བཀའ་སློབ་སྩལ་དོན། ད་རེས་བྱེས་ཀྱི་གདན་ས་བཀྲ་ཤིས་ལྷུན་པོར་སྟབས་ཅིག་དོན་གཉིས་ལྟ་བུར་འདིར་སྡོད་རྒྱུ་ཆགས་པ་རེད། ཧ་ཅང་ཡག་པོ་བྱུང་། ཐམས་ཅད་མཁྱེན་པ་༧རྒྱལ་བ་དགེ་འདུན་གྲུབ་པས་ཕྱག་བཏབ་པ་དང་། གདན་ས་བཀྲ་ཤིས་ལྷུན་པོ་དེ་སྔ་བོད་ནས་སྙན་གྲགས་ཡོད་པའི་དགོན་པ་ཞིག་ཆགས་ཡོད། སློབ་གཉེར་ཧ་ཅང་ཡག་པོ་ཡོད། ང་ཚོ་དུས་ཚོད་ལ་འགྱུར་བ་ཧ་ཅང་ཕྱིན་ཏེ་བྱེས་ལ་བཀྲ་ཤིས་ལྷུན་པོ་གདན་ས་ཟེར་ན་མི་འདུག་གནས་གཞི་ལྟ་བུ་ཆུགས་པ་རེད།
བཀྲ་ཤིས་ལྷུན་པོ་བོད་ནས་དགོན་པ་ཆེ་ཁག་ཅིག་དང་གལ་ཆེན་པོ་ཞིག་ཆགས་ཡོད། ༸རྒྱལ་བ་དགེ་འདུན་གྲུབ་དང་འབྲེལ་བ་ཆེན་པོ་ཡོད། ངོས་རང་དགེ་འདུན་གྲུབ་ཀྱི་སྐྱེ་ཕྲེང་ཞིག་ཡིན་སྟབས། དེ་རིང་དགེ་འདུན་གྲུབ་པས་ཕྱག་བཏབ་པའི་བཀྲ་ཤིས་ལྷུན་པོའི་བྱེས་ཀྱི་དགོན་པར་སླེབས་པར་ཧ་ཅང་དགའ་པོ་བྱུང་། ངོས་རང་ས་ཆ་གང་དུ་སླེབ་ཀྱང་དགོན་པ་ཚོས་བཤད་སྒྲུབ་ཆོས་སྤྱོད་ཀྱི་སློབ་གཉེར་དེ་དག་ལ་དང་དོད་གནང་དགོས་རེད་ཅེས་གལ་པོ་ཞིག་ལ་བརྩིས་ཏེ་རྗོད་བཞིན་ཡོད། འདི་ག་བཀྲ་ཤིས་ལྷུན་པོ་དགོན་པར་ཆ་བཞག་ན་དགོན་པ་ཆེན་པོ་མེད་ནའང་བསླབ་པ་གསུམ་གྱི་ཉམས་ལེན་དང་། སྡེ་སྣོད་གསུམ་གྱི་འཆད་ཉན་དེ་ཚོའི་གྲས་ལྷོད་གཡེང་མ་སོང་བ་གནང་རྒྱུ་གལ་ཆེན་པོ་རེད་འདུག ངོས་རང་གཡས་གཡོན་གྱི་དགོན་སྡེ་ཁག་ལ་ཕྱིན་པའི་སྐབས་བསླབ་པ་གསུམ་གྱི་ཉམས་ལེན་དང་། གཞུང་སྡེ་སྣོད་གསུམ་གྱི་འཆད་ཉན་ཡོད་པ་དེ་ཚོའི་གྲས་མཐོང་ཡོང་དུས་དངོས་འབྲེལ་སེམས་གཏིང་ནས་དགའ་སྤྲོ་སྐྱེ་པ་ཡོང་གི་འདུག གཞན་ཡང་ཕྱི་ལོག་ལ་འདྲ་ཆགས་པོ་ཞིག་མ་གཏོགས་དེ་ཙམ་སློབ་གཉེར་མེད་ན་སེམས་སྐྱོ་བོ་རེད། དེང་སྐབས་སངས་རྒྱས་ཀྱི་བསྟན་པ་འདི་འཛམ་གླིང་འདིའི་སྟེང་སྤྱིར་ནང་པ་མ་ཡིན་པ་ཚོས་ཀྱང་སངས་རྒྱས་པའི་ཆོས་ལ་དོ་སྣང་བྱེད་ཀྱི་ཡོད། ལྷག་པར་ནང་པ་སངས་རྒྱས་པའི་ཆོས་ཀྱི་འགྲོ་སྟངས་འདི་སེམས་ཁམས་རིག་པའི་འགྲོ་སྟངས་ཤུགས་ཆེན་པོ་ཞིག་ཡོད། དེར་བརྟེན་ཚན་རིག་པས་ཀྱང་དོ་སྣང་ཆེན་པོ་བྱེད་ཀྱི་ཡོད། སྟོན་པ་བཀའ་དྲིན་ཅན་གྱི་དུས་སྐབས་ནས་བཟུང་དུས་ད་ལྟའི་བར་ལོ་ངོ་སྟོང་ཕྲག་རིང་ནང་པ་སངས་རྒྱས་པའི་ཆོས་དེ་རང་དོན་རང་གཅེས་བྱས་ནས་བདག་པོ་བརྒྱབ་པ་འདི་དངོས་འབྲེལ་སྟོན་པའི་ཞབས་འདེགས་རེད། ཅེས་སོགས་ཀྱི་བཀའ་སློབ་སྩལ།།
