༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༡༣ ཉིན་སྤོན་ཊོ་བཀྲ་ཤིས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་བསྟན་འཛིན་ཚུལ་ཁྲིམས་ལགས་དང་། ཚབ་གསར་ས་གནས་འགོ་འཛིན་འཇམ་དབྱངས་སྒྲོལ་མ་ལགས་གཉིས་ཀྱི་དབར་རྩིས་སྤྲོད་རྩིས་ལེན་གནང་ཡོད། སྐབས་དེར་རྩིས་སྤྲོད་རྩིས་ལེན་གྱི་ལས་དོན་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ཏུ་ཅོན་ཏ་ར་ས་གནས་འགོ་འཛིན་མེ་རི་སྐྱབས་ལགས་ཀྱིས་སྤྲོད་དཔང་གནང་ཡོད།
དེ་ཡང་ས་གནས་འགོ་འཛིན་གསར་རྙིང་དབར་སྤོན་ཌོ་བཀྲ་ཤིས་གླིང་ས་གནས་འགོ་འཛིན་ལས་ཁུངས་དང་། ཁྱབ་ཁོངས་མཚོ་པདྨ། སུན་རྡར་ན་གར། མན་ཌི་བཅས་དང་འབྲེལ་བའི་ཡིག་ཆ་དང་། དངོས་ཟོག་ཐོ་གཞུང་ཁག་རྩིས་སྤྲོད་གྲུབ་མཚམས་ས་གནས་འགོ་འཛིན་གསར་རྙིང་གཉིས་ནས་གསུང་བཤད་དང་འབྲེལ་རྩིས་སྤྲོད་རྩིས་ལེན་གྱི་གནས་སྟངས་དང་། ལས་གཞི་འགྲོ་བཞིན་པ། མ་འོངས་འཆར་གཞི་བཅས་ཀྱི་སྐོར་གསུངས་ཡོད། ཕྱི་ཚེས་ ༡༤ ཉིན་ས་གནས་འགོ་འཛིན་ཟུར་པ་བསྟན་འཛིན་ཚུལ་ཁྲིམས་ལགས་མཚོ་པདྨར་ཕེབས་ཏེ་མི་མང་ལ་ས་འགོ་གསར་པ་འཇམ་དབྱངས་སྒྲོལ་མ་ལགས་ངོ་སྤྲོད་གནང་ཡོད།
ཕྱི་ལོ་ ༢༠༢༥ ཟླ་བ་ ༠༡ ཚེས་ ༠༣ ཉིན་གཞུང་འབྲེལ་རྩིས་སྤྲོད་རྩིས་ལེན་མ་གནང་གོང་། བསྟན་འཛིན་ཚུལ་ཁྲིམས་ལགས་ཀྱིས་ས་འགོ་གསར་པ་འཇམ་དབྱངས་སྒྲོལ་མ་ལགས་མན་ཌི་དང་། སུན་རྡར་ན་གར་གཉིས་ཀྱི་རྒྱ་གར་གཞུང་གི་ལས་ཁུངས་ཁག་གི་ལས་བྱེད་རྣམས་ངོ་སྤྲོད་གནང་ཡོད་པ་དང་། ཕྱི་དྲོར་ཧིན་བོད་མཛའ་འབྲེལ་ཚོགས་པའི་ངོས་ནས་ཕེབས་སྐྱེལ་དང་ཕེབས་བསུ་གཅིག་ལྕོགས་ཀྱི་དགོང་ཚིགས་གསོལ་སྟོན་ཞིག་གོ་སྒྲིག་གནང་ཡོད། སྐབས་དེར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་མན་ཌི་གྲོང་སྡེའི་སྤྱི་ཁྱབ་ཝི་རེན་རྡར་ཤར་མ་ལགས་དང་། ཚོགས་མི་ཁག་ཅིག་ཕེབས་ཞུགས་གནང་ཡོད། དེ་ཡང་ཝི་རེན་རྡར་ཤར་མ་ལགས་ཀྱིས་ས་འགོ་རྙིང་པ་བསྟན་འཛིན་ཚུལ་ཁྲིམས་ལགས་ཀྱིས་བོད་མིའི་སྤྱི་ཚོགས་ལ་ཞབས་འདེགས་བསྒྲུབས་པར་བསྔགས་བརྗོད་དང་། ས་འགོ་གསར་པས་ཀྱང་ཁོང་མོའི་ལས་ཡུན་རིང་ཕན་འབྲས་ཐོན་ཐུབ་པའི་ཡིད་ཆེས་ཡོད་ཅེས་གསུངས།
དེ་བཞིན་བཀྲ་ཤིས་གླིང་བོད་མིའི་གཞིས་ཆགས་ནས་ས་འགོ་རྙིང་པར་ཐུགས་རྗེ་ཆེ་ཞུས་པ་དང་སྦྲགས། ས་འགོ་གསར་པ་འཇམ་དབྱངས་སྒྲོལ་མ་ལགས་ལ་ཕེབས་བསུ་ཞུས་ཡོད་པ་བཅས།།
