༄༅། །ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱིས་ལམ་སྟོན་བཀོད་འདོམས་དང་། ཞོན་གཙང་གཙུག་ལག་སློབ་གཉེར་ཁང་གི་བོད་བརྒྱུད་ནང་བསྟན་ཞིབ་འཇུག་ཁང་དང་ཐའེ་ཝན་ནང་ཆོས་ཞིབ་འཇུག་ཁང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ། ཐའེ་ཝན་སློབ་གསུམ་ཆོས་ཚོགས་བཅས་ཐུན་མོང་གི་གོ་སྒྲིག་འོག བོད་རྒྱ་ལེགས་སྦྱར་གསུམ་གྱི་བཀའ་བསྟན་སྒྲ་བསྒྱུར་མཁས་པའི་བགྲོ་གླེང་ཚོགས་འདུ་ཞིག་ཕྱི་ལོ་ ༢༠༢༥ ཟླ་བ་ ༡ ཚེས་ ༡༦ དང་ ༡༧ བཅས་ཉིན་གཅིག་དང་ཕྱེད་རིང་ཞོན་གཙང་གཙུག་ལག་སློབ་གཉེར་ཁང་དུ་བསྐོང་ཚོགས་གནང་ཡོད་པ་རེད།

ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་ལགས་དང་། ཞོན་གཙང་གཙུག་ལག་སློབ་གཉེར་ཁང་གི་རིགས་བདག་ཆེ་མོ་བཙུན་མ་ (Shi xingguang) ལགས་དང་སློབ་སྤྱི་ (Jian shaoqi) ལགས། སློབ་གྲྭ་དེའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་བཙུན་མ་ (Shi zhaohui) ལགས།  ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་སྐུ་ཚབ་ཚོགས་གཞོན་དགེ་བཤེས་སྣང་སྣང་ལགས། སྐུ་ཚབ་དོན་གཅོད་ལས་ཁུངས་ཀྱི་གྲོས་སྟོན་པ་ལྕམ་ (Chen mingru) ལགས་བཅས་ནས་ཚོགས་འདུ་དབུ་འབྱེད་ཀྱི་གསུང་བཤད་གནང་ཡོད།

ཐེངས་འདིའི་ཐའེ་ཝན་བོད་བརྒྱུད་ནང་བསྟན་གླེང་སྟེགས་ཐོག་ཐའེ་ཝན་དུ་ཡུན་རིང་བོད་རྒྱ་ལེགས་སྦྱར་གསུམ་གྱི་སྐད་ཡིག་ཐོག་ནང་ཆོས་ཀྱི་གཞུང་ལ་ཉམས་ཞིབ་དང་། སྒྲ་སྒྱུར། སློབ་དཔོན། དཔེ་འཁྲིད་གནང་མཁན་ཁྱོན་བོད་དང་ཐའེ་ཝན་གྱི་མཁས་དབང་ ༢༠ ཙམ་ནས་ཡིག་འབྲུ་ཁྲི་ལས་བརྒལ་བའི་མཁས་པའི་དཔྱད་རྩོམ་ ༧ དང་། དཔྱད་གླེང་རྩོམ་ཐུང་ ༡༣ ཙམ་བསྡུ་ཕུལ་བྱུང་བ་མ་ཟད། ཉིན་གཅིག་དང་ཕྱེད་ཀྱི་བགྲོ་གླེང་ཐོག་ནང་བསྟན་གཞུང་ཆེན་སྒྲ་སྒྱུར་གྱི་མིང་ཚིག་གཅིག་གྱུར་ཡོང་ཐབས་དང་། མཁས་པའི་དྲ་ལམ་ཚོགས་པ་འཛུགས་ཏེ་དུས་ནས་དུས་སུ་བགྲོ་གླེང་གི་སྡིངས་ཆ་སྐྲུན་ཐབས། ལོ་ཙཱ་བ་གསོ་སྐྱོང་བྱ་ཐབས། མ་འོངས་མུ་མཐུད་གླེང་སྟེགས་འདི་རྒྱུན་སྐྱོང་དང་བསྟུན་ཐའེ་ཝན་དུ་བོད་རིག་པའི་ཞིབ་འཇུག་བསྟི་གནས་ཁང་ཞིག་གསར་འཛུགས་བྱ་ཐབས་སོགས་ཀྱི་སྐོར་བགྲོ་གླེང་མཐིལ་ཕྱིན་གནང་ཡོད་པ་དང་། དམིགས་བསལ་བླ་ཆེན་ཁག་ལ་ཆོས་རྒྱལ་དང་སྐྱབས་མགོན། གོང་ས་སོགས་བེད་སྤྱོད་ཐལ་དྲགས་པ་བྱས་དང་བྱེད་མུས་ཀྱི་གནས་བབ་ལ་ཡོ་བསྲང་དགོས་པའི་དགོངས་འཆར་སོགས་ཀྱང་ཤིན་ཏུ་མང་པོ་ཕེབས་ཡོད་པ་རེད།སྔ་དྲོའི་ཚོགས་ཐུན་དང་པོ་ནི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་གཙོ་སྐྱོང་གནང་བ་དང་། ཆེད་དུ་བཞུགས་སྒར་དྷ་རམ་ས་ལ་ནས་གདན་འདྲེན་ཞུས་པའི་སྨོན་ལམ་ཚིག་མཛོད་ལས་གཞིའི་ཆེད་ལས་ལག་རྩལ་ལས་བྱེད་བསྟན་འཛིན་མཁྱེན་རབ་ལགས་དང་། ཐའེ་ཝན་དུ་རྟེན་གཞི་བྱས་པའི་ནང་བསྟན་སྲི་ཞུ་ཁང་གི་ཉམས་ཞིབ་པ་ཡེ་ཤེས་ལྷུན་འགྲུབ་ལགས་གཉིས་ནས་ཨིན་ཡིག་ཐོག་ཚན་རིག་ལག་རྩལ་ལ་བརྟེན་ཏེ་ནང་བསྟན་གྱི་གཞུང་ཆེན་སྒྲ་སྒྱུར་གྱི་ལས་དོན་ལ་གཞོགས་འདེགས་ཇི་ལྟར་བྱེད་ཐུབ་མིན་གྱི་ལས་འཆར་སྐོར་ངོ་སྤྲོད་གནང་ཡོད།

སྔ་དྲོའི་ཚོགས་ཐུན་གཉིས་པའི་བརྗོད་གཞི་ནི་དཔྱད་རྩོམ་ཆེད་སྤེལ་དང་པོའི་སྐོར་ཡིན་ཅིང་། ཚོགས་ཐུན་འདིའི་གཙོ་སྐྱོང་བ་ནི་བཙུན་མ་ (Shi zhaohui) ལགས་ཡིན་པ་དང་། སྐུ་ཚབ་དོན་གཅོད་ལས་ཁུངས་ཀྱི་ལྟ་གྲུབ་སློབ་དཔོན་བསྟན་འཛིན་རྣམ་གྲོལ་རིན་པོ་ཆེ་ལགས་ནས་བོད་རྒྱ་སྒྲ་བསྒྱུར་ཁྲོད་དུ་སྐད་ཡིག་བརྡ་སྤྲོད་ཀྱི་ཁྱད་པའི་སྐོར་དཔྱད་པ་ཞེས་དང་། ཧྥུ་ཀོའང་ (Fo Guang) ནང་བསྟན་གཙུག་ལག་སློབ་གཉེར་ཁང་གི་སློབ་དཔོན་ཆེན་པོ་ (Chen yibiao) ལགས་དང་། སློབ་གྲྭ་དེའི་འབུམ་རམས་པ་སློབ་ཕྲུག་ (Zheng Meimei) ལགས་གཉིས་ནས་ ༼ཡིད་ལ་བྱེད་པ་༽ ཞེས་པའི་ཐ་སྙད་དེ་ལེགས་སྦྱར་དང་བོད་རྒྱ་སྐད་ཡིག་ཏུ་སྒྱུར་སྟངས་དང་། དེང་དུས་སྐད་ཡིག་དང་མཚུངས་བསྡུར་ཞེས་པའི་ཐོག་གསུང་བཤད་གནང་ཡོད།

སྔ་དྲོ་ཚོགས་ཐུན་གསུམ་པ་གཙོ་སྐྱོང་གནང་མཁན་ནི་ཐའེ་ཝན་ཆབ་སྲིད་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་ཟུར་པ་སྐུ་ཞབས་ཞའོ་ཇིན་སུང་ (Xiao jingsong) ལགས་ཡིན་ཅིང་། གསུང་བཤད་གནང་མཁན་གཙོ་བོ་ནི་ཧྥུ་ཀོའང་ (Fo Guang) གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་བསོད་ནམས་དབང་རྒྱལ་ལགས་ནས་བོད་རྒྱ་གཞུང་ཆེན་སྒྲ་སྒྱུར་ཁྲོད་ཀྱི་གནད་དོན་ཁག་འགའ་ལ་བལྟས་པ་ཞེས་དང་། ཐའེ་ཝན་གཙུག་ལག་སློབ་གཉེར་ཁང་གི་གདན་ཞུ་སློབ་དཔོན་གཞོན་པ་ལི་ཧྲིན་ཧའེ་ (Li shenghai) ལགས་ནས་རྡོ་རྗེ་གཅོད་པའི་མདོ་རྒྱ་སྒྱུར་མ་དཔེ་ཁག་དྲུག་ལ་དཔྱད་པ་ཞེས་ཐོག་གསུང་བཤད་དང་བགྲོ་གླེང་གནང་ཡོད།

ཚོགས་ཐུན་བཞི་པ་དང་ལྔ་པ་ནི་མདུན་ཅོག་སྒོར་མོའི་གླེངས་སྟེགས་ཡིན་ཅིང་། ཚོགས་ཐུན་བཞི་པ་གཙོ་སྐྱོང་གནང་མཁན་ནི་དོན་ཁང་གི་ལྟ་གྲུབ་སློབ་དཔོན་བསྟན་འཛིན་རྣམ་གྲོལ་རིན་པོ་ཆེ་ཡིན་པ་དང་། སློབ་དཔོན་ཆེན་མོ་ཞའི་ཅིན་སུང་ (Xiao Jingsong) ལགས་དང་། ཐའེ་ཝན་ཡེ་ཤེས་འཁོར་ལོ་ཆོས་ཚོགས་ཀྱི་ཚོགས་གཙོ་དང་ལོ་ཙཱ་བ་སློབ་དཔོན་ཁྲིན་ཧྲིན་ཡེ་ (Chen Shengyi) ལགས། སེ་ར་བྱེས་ཐའེ་ཝན་རི་བོ་ཡོན་ཏན་དགོན་པའི་མཁན་པོ་ལྷ་རམས་དགེ་བཤེས་ཐུབ་བསྟན་ནོར་བུ་ལགས། ལོ་ཙཱ་བ་ཧྲི་རུབ་ཝང་ (Shi Ruwang) ལགས་བཅས་ནས་རང་ཉིད་ཀྱི་བརྗོད་གཞི་དང་འབྲེལ་བའི་ངོ་སྤྲོད་གསུང་བཤད་གནང་ཡོད།

ཚོགས་ཐུན་ལྔ་པ་གཙོ་སྐྱོང་གནང་མཁན་ནི་ཐའེ་ཝན་ཆབ་སྲིད་གཙུག་ལག་སློབ་གཉེར་ཁང་གི་གདན་ཞུ་སློབ་དཔོན་ཆེན་མོ་ལིའུ་ཡུས་ཀོའང་ (Liu Yuguang) ལགས་ཡིན་ཅིང་། བགྲོ་གླེང་གནང་མཁན་ནི་ཞོན་གཙང་གཙུག་ལག་སློབ་གཉེར་ཁང་གི་ཆོས་ལུགས་དང་རིག་གཞུང་སྡེ་ཚན་གྱི་སློབ་དཔོན་གཞོན་པ་འཇའ་མུ་གླིང་བ་ཀིན་སེ་མཱ་ཀོ་སི་ (Marcus Gunzel) ལགས་དང་། ཐའེ་ཝན་ཆོས་ལུགས་བུད་མེད་དགེ་སྤྱོད་མཐུན་ཚོགས་ཀྱི་ཚོགས་གཙོ་ལྕམ་ཀྲང་ཡུས་ལིང་ (Zhang yuling) ལགས། ཞོན་གཙང་གཙུག་ལག་སློབ་གཉེར་ཁང་བོད་བརྒྱུད་ནང་བསྟན་ཞིབ་འཇུག་ཁང་གི་ཚོགས་གཙོ་བཙུན་མ་ཧྲི་ཀྲའོ་ཧུས་ (Shi zhaohui) ལགས་དང་ལག་བསྟར་འགན་འཛིན་ཁྲིན་ཐའེ་ཞོན་ (Chen Taixuan) ལགས་བཅས་ནས་སོ་སོའི་བརྗོད་གཞི་དང་འབྲེལ་བའི་གསུང་བཤད་དང་བགྲོ་གླེང་ལྷུག་པོ་གནང་ཡོད།

ཚོགས་ཐུན་དྲུག་པ་གཙོ་སྐྱོང་གནང་མཁན་ནི་ཧྥ་ཀོབ་ (Fa gu) གཙུག་ལག་སློབ་གཉེར་ཁང་གི་སློབ་དཔོན་དིན་ཝེ་རིན་ (Deng weiren) ལགས་ཡིན་ཅིང་། ཐའེ་ཝན་ཀུབ་ཀོང་འགྲེམས་སྟོན་ཁང་ (Gugong Bowuguan) གི་ཉམས་ཞིབ་པ་ལིའུ་གོ་ཝེལ་ (Liu Guowei) ལགས་ནས་ཐེག་པ་ཆེན་པོའོ་མདོ་སྡེ་ཟ་མ་ཏོག་ལེགས་སྦྱར་དང་། བོད་རྒྱ་སྐད་ཡིག་གི་མ་དཔེ་དང་ཡི་གེ་དྲུག་པའི་རིགས་སྔགས་ཆེན་མོའི་སྐོར་དཔྱད་པ་ཞེས་དང་། ཧྥུ་ཀོའང་ (Fo Guang) གཙུག་ལག་སློབ་གཉེར་ཁང་གི་དགེ་རྒན་ཞའོ་ཀྲི་ལུང་ལགས་ནས་བོད་འགྱུར་འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ཞེས་བྱ་བར་དཔྱད་པ་ཞེས་སྐོར་གསུང་བཤད་དང་བགྲོ་གླེང་གནང་ཡོད།ཚོགས་ཐུན་བདུན་པ་མདུན་ཅོག་སྒོར་མོའི་གླེང་སྟེགས་གཙོ་སྐྱོང་གནང་མཁན་ནི་ཐའེ་ཝན་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཞོན་དགེ་བཤེས་སྣང་སྣང་ལགས་ཡིན་ཅིང་། མཉམ་ཞུགས་བགྲོ་གླེང་གནང་མཁན་ནི་ཐའེ་ཝན་གཙུག་ལག་སློབ་གཉེར་ཁང་གི་སློབ་དཔོན་ལས་རོགས་ལིའོ་པིན་ཧྲིན་ (Liao bensheng) ལགས་དང་། ཐའེ་ཝན་དབུས་གཞུང་གཉེར་གཙུག་ལག་སློབ་གཉེར་ཁང་གི་འབུམ་རམས་མ་ཀྲའོ་ཧྲུའི་ཧྭ་ (Zhai shuhua) ལགས། ལོ་ཙཱ་བ་ཧྲི་རུབ་ཤམ་ (Shi ruxiang) ལགས། དེ་སྔོན་ཐའེ་བོད་འབྲེལ་ལམ་ཐེབས་རྩ་ལས་ཁུངས་ཀྱི་དྲུང་ཆེ་གཞོན་པ་ཟུར་པ་སྐུ་ཞབས་ཝུང་ཧྲི་ཇེ་ (Weng shijie) ལགས། ཧྥ་ཀོབ་ནང་ཆོས་གཙུག་ལག་སློབ་གཉེར་ཁང་གི་ནང་ཆོས་སྡེ་ཚན་གྱི་འགན་འཛིན་སློབ་དཔོན་དིན་ཝེ་རིན་(Deng weiren) ལགས་བཅས་ནས་རང་ཉིད་ཀྱི་བརྗོད་གཞི་དང་འབྲེལ་བའི་གསུང་བཤད་དང་བགྲོ་གླེང་གནང་ཡོད།མཐའ་མ་ཚོགས་འདུ་མཇུག་བསྡུའི་མཛད་སྒོར་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། ཞོན་གཙང་གཙུག་ལག་སློབ་གཉེར་ཁང་གི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ཚོགས་གཙོ་བཙུན་མ་ཧྲི་ཀྲའོ་ཧུའེ་ (Shi zhaohui) ལགས། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་སྐུ་ཚབ་ཚོགས་གཞོན་དགེ་བཤེས་སྣང་སྣང་ལགས་བཅས་ནས་གསུང་བཤད་གནང་གྲུབ་རྗེས་ཚོགས་འདུ་རྒྱལ་ཁའི་ངང་གྲོལ་ཡོད་པ་རེད། །