༄༅། །རྒྱ་གར་བྱང་ཤར་ཨ་རུ་ཎཱ་ཅལ་མངའ་སྡེའི་ནུབ་ཀམེངྒ་རྫོང་ཁུལ་འབུམ་ལ་བསྟན་འཛིན་སྒང་བོད་མིའི་གཞིས་ཆགས་ཀྱི་དཔལ་ལྡན་རྒྱུད་སྟོད་གྲྭ་ཚང་དུ་ཕྱི་ལོ་ ༢༠༢༥ ཟླ་བ་ ༡ ཚེས་ ༡༥ ཉིན་མོན་ཡུལ་སྐྱིད་མོ་ལྗོངས་ཀྱི་སྤྲུལ་སྐུ་རྣམ་གསུམ་གྲས་སྐུ་ཕྲེང་ ༡༠ པ་ལྷ་རྒྱལ་རིན་པོ་ཆེ་བསྟན་འཛིན་དབང་ཆེན་མཆོག་སྔ་དྲོར་དཔལ་ལྡན་རྒྱུད་སྟོད་གྲྭ་ཚང་དུ་ཕེབས་སྐབས་རིན་པོ་ཆེ་མཆོག་ལ་སེར་སྐྱ་མི་མང་ཡོངས་ནས་ཕེབས་བསུ་གཟབ་རྒྱས་ཞུས་ཡོད།
དེ་ཡང་རིན་པོ་ཆེ་མཆོག་གི་ཆིབས་ཞབས་རྣམ་པ་དང་། དགའ་ལྡན་བྱང་རྩེ་སྤུལ་སྐུ་ཐུབ་བསྟན་ཡར་འཕེལ་རིན་པོ་ཆེ་མཆོག ཨ་རུ་ཎཱ་ཅལ་མངའ་སྡེའི་གྲོས་ཚོགས་འཐུས་མི་ཚེ་བརྟན་ཆོས་འཕེལ་ལགས་བཅས་མཛད་སྒོར་ཕེབས་ཡོད། ཐོག་མར་རིན་པོ་ཆེ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་དཀར་གཙང་གི་མཇལ་དར་སྒྲོན་འབུལ་དང་། མར་མེ་ཞལ་ཕྱེ་གནང་སྟེ་ཞུགས་ཁྲིར་འཁོད་མཚམས་རྒྱུད་སྟོད་གྲྭ་ཚང་གི་ཕྱག་མཛོད་བྱམས་པ་ཚེ་རིང་ལགས་དང་ས་གནས་འགོ་འཛིན་རབ་བརྟན་ཚེ་རིང་ལགས་རྣམ་གཉིས་ནས་ལྷ་རྒྱལ་རིན་པོ་ཆེ་བསྟན་འཛིན་དབང་ཆེན་མཆོག་ལ་མཎྜལ་རྟེན་གསུམ་འདེགས་འབུལ་ཞུས། རིན་པོ་ཆེ་དབུ་ཞུགས་ཐོག་དཔལ་ལྡན་རྒྱུད་སྟོད་གྲྭ་ཚང་གི་དགེ་འདུན་པ་རྣམས་ནས་འཛམ་གླིང་ཞི་བདེའི་སླད་སྨོན་ལམ་གསུང་འདོན་དང་།ལྷག་པར་བོད་དིང་རི་གཙོས་པའི་ས་ཁུལ་ཁག་ཏུ་ས་ཡོམ་གྱི་གོད་ཆག་འཚབ་ཆེ་འོག་བོད་མི་འདས་གྲོངས་སུ་འགྱུར་བ་རྣམས་ཀྱི་ཆེད་དུ་མ་ཎི་གསོག་སྒྲུབ་ཞུས། ལྷ་རྒྱལ་རིན་པོ་ཆེ་བསྟན་འཛིན་དབང་ཆེན་མཆོག་ནས་དད་ལྡན་སེར་སྐྱ་མི་མང་རྣམས་ལ་གསུང་བཤད་གནང་སྟེ་ཆོས་ཕྱོགས་ཀྱི་མཛད་སྒོ་ལེགས་གྲུབ་བྱུང་ཡོད་པ་བཅས། །
