དེ་ཡང་ཉིན་གྲངས་གསུམ་གྱི་ཟབ་སྦྱོང་འདིའི་ཐོག་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇིཏ་ཀུ་མར་ (Sujeet Kumar) ལགས་ཀྱིས་བོད་ཀྱི་གནད་དོན་གལ་གནད་ཇི་ཆགས་དང་། རྒྱ་གར་གྱི་ཆབ་སྲིད་མི་སྣའི་ཁྲོད་བོད་དོན་ལ་གཟིགས་ཚུལ་ཞེས་པའི་བརྗོད་གཞིའི་ཐོག་གསུང་བཤད་དང་། ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ས་གནས་དང་རྒྱལ་ཡོངས་རིམ་པའི་ཐོག་བོད་དོན་ཞུ་གཏུག་ཐད་སློབ་སྟོན། ཀལ་ཀཏྟཱ་གཙུག་ལག་སློབ་གཉེར་ཁང་གི་སློབ་དཔོན་ལས་རོགས་འཇིགས་མེད་ཡེ་ཤེས་བླ་མ་ལགས་ཀྱིས་ཉེ་རབས་བོད་ཀྱི་ལོ་རྒྱུས་དང་། བོད་དོན་བདེན་མཐའ་གསལ་ཐབས་སུ་ཧི་མ་ལ་ཡའི་རི་རྒྱུད་ཀྱི་གལ་གནད་སྐོར་གསུང་བཤད། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་བོད་ཀྱི་སྣོད་བཅུད་མ་ལག་སྲུང་སྐྱོབ་སྐོར་གསུང་བཤད། ཕྱི་དྲིལ་བོད་དོན་ཞུ་གཏུག་ཚན་པའི་ལས་བྱེད་བསྟན་འཛིན་ཀུན་མཁྱེན་ལགས་དང་བསྟན་འཛིན་རིན་ཆེན་ལགས་རྣམ་གཉིས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་དང་། དང་བླངས་བོད་དོན་ཞུ་གཏུག་གི་ལས་གཞིའི་སྐོར་གསུང་བཤད། ལྡི་ལི་དང་བླངས་བོད་དོན་ཞུ་གཏུག་གི་འབྲེལ་མཐུད་པ་བསྟན་འཛིན་ལྷ་མཚོ་ལགས་ཀྱིས་ས་གནས་སུ་བོད་དོན་ཞུ་གཏུག་གི་ལས་འགུལ་ཇི་སྤེལ་དང་། འབྱུང་འགྱུར་གྱི་ཐབས་བྱུས་སྐོར་གསུང་བཤད་གནང་ཡོད།

གཞན་ཡང་ཟབ་སྦྱོང་ཐོག་ལྡི་ལི་འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས་རྒྱ་གར་གྲོས་ཚོགས་འཐུས་མི་དང་ཆབ་སྲིད་དབུ་ཁྲིད་རྣམས་ལ་བོད་དོན་ཞུ་གཏུག་གནང་ཕྱོགས་སྐོར་ཟབ་ཁྲིད་དང་། བོད་དོན་ལས་འགུལ་བསྟི་གནས་ཁང་གི་དྲ་ལམ་བདེ་འཇགས་ལྟ་ཞིབ་པ་བསྟན་འཛིན་མཐའ་ཡས་ལགས་ཀྱིས་སྤྱི་ཚོགས་དྲ་ལམ་བརྒྱུད་ཞུ་གཏུག་གི་ཐབས་བྱུས་དང་། དྲ་ཐོག་ཏུ་བོད་དོན་ཁྱབ་སྤེལ་གྱི་ཐབས་ལམ་སྐོར་ཟབ་ཁྲིད་བཅས་གནང་ཡོད། །