༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༣ ཉིན་བོད་མིའི་སྒྲིག་འཛུགས་ཀྱི་ཕྲི་དྲིལ་ལས་ཁུངས་ཀྱི་གོ་སྒྲིག་འོག་རྒྱ་གར་རྒྱལ་ས་ལྡི་ལིར་ཉིན་གསུམ་རིང་གི་དང་བླངས་བོད་དོན་ཞུ་གཏུག་དང་། ནུས་པ་གོང་མཐོར་ཆེད་ཟབ་སྦྱོང་གོ་སྒྲིག་ཞུས་ཡོད།
ཟབ་སྦྱོང་འདིས་གཙོ་བོ་རྒྱ་གར་བྱང་ཕྱོགས་ཁུལ་གྱི་ཤེས་ཡོན་བསྟི་གནས་ཁག་ཏུ་ཡོད་པའི་བོད་པའི་གཞོན་སྐྱེས་རྣམས་ལ་ཞུ་གཏུག་གནང་ཕྱོགས་དང་། འགོ་ཁྲིད་ཀྱི་ནུས་པ། དེ་བཞིན་འཚེ་མེད་ཞི་བའི་ལམ་ནས་འབྲེལ་མཐུད་གནང་ཕྱོགས་སོགས་ལ་དམིགས་ཏེ་ཟབ་ཁྲིད་གནང་རྒྱུ་ཡིན་པ་རེད།
དེ་ཡང་ཟབ་སྦྱོང་དབུ་འབྱེད་མཛད་སྒོར་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ནས་ཕེབས་ཞུགས་ཀྱིས་གསུང་བཤད་གནང་སྐབས་སྤྱིར་ཟབ་སྦྱོང་གི་དགོས་དམིགས་དང་། སྒོས་སུ་མཉམ་ཞུགས་པ་རྣམས་ལ་རྒྱ་གར་བྱང་ཕྱོགས་ཁུལ་དུ་བོད་དོན་ཞུ་གཏུག་རྒྱ་ཆེར་སྤེལ་དགོས་སྐོར་དང་། མཐོ་སློབ་ཁག་ཏུ་རྒྱ་གར་གྱི་གཞོན་སྐྱེས་དང་ལྷན་འབྲེལ་ལམ་ཡག་པོ་དགོས་སྐོར་ནན་སྐུལ་གནང་ཡོད། དེ་བཞིན་ཁོང་གིས་བོད་ཀྱི་ཐབས་རྩོད་མདུན་སྐྱོད་ཡོང་བར་གཞོན་སྐྱེས་རྣམས་ནས་རང་གི་རིག་གཞུང་དང་། ལོ་རྒྱུས། ས་གནས་ཀྱི་འཛིན་སྐྱོང་སྒྲོམ་གཞི་སོགས་ཀྱི་སྐོར་གོ་རྟོགས་དགོས་པའི་ནན་བརྗོད་གནང་ཡོད།
ཟབ་སྦྱོང་གི་ཉིན་དང་པོར་བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཀྱི་འགན་འཛིན་ཀརྨ་ལེགས་བཤད་ལགས་དང་། བསྟན་འཛིན་དབྱངས་སྐྱིད་ལགས་གཉིས་ཀྱིས་ཞུ་གཏུག་གི་ཐབས་བྱུས་དང་། འགོ་ཁྲིད་ཀྱི་ནུས་པ་འཕེལ་རྒྱས། འཚེ་མེད་ཞི་བའི་སྒོ་ནས་གྲོས་མོལ་གནང་ཐབས་བཅས་ཀྱི་བརྗོད་གཞིའི་ཐོག་བྱེད་སྒོ་ཁག་གི་བརྒྱུད་སྦྱོང་བརྡར་གནང་ཡོད།
སྐབས་དེར་དྷ་རམ་ས་ལ་དང་། ལྡི་ལི། པུ་ནེ། འབྲས་ལྗོངས། ཨོ་རི་ས། ཇཻ་པུར། ལ་དྭགས་བཅས་ནས་ཁྱོན་བསྡོམས་མཉམ་ཞུགས་པ་ ༣༥ ཕེབས་ཡོད་ཅིང་། ཟབ་སྦྱོང་རིང་ཞུ་གཏུག་ནུས་རྩལ་དང་། ཆེད་ལས་ཡར་རྒྱས། མ་འོངས་ལས་འཆར་ཁག་གི་ཐབས་བྱུས་འཆར་འགོད་བཅས་ཀྱི་སྐོར་སློབ་སྟོན་གནང་རྒྱུ་ཡིན་པ་རེད།
ལས་གཞི་འདི་ནི་བོད་མིའི་སྒྲིག་འཛུགས་ཀྱི་སྲིད་བྱུས་དང་མཐུན་པ་ལྟར་བཙན་བྱོལ་དུ་གནས་སྡོད་གཞོན་སྐྱེས་རྣམས་ལ་ཞུ་གཏུག་དང་། འགོ་ཁྲིད་ཀྱི་འགན་འཁུར་ཆེད་གྲ་སྒྲིག་གནང་ཆེད་ཡིན། ཟབ་སྦྱོང་གནང་མཁན་ཕྱི་དྲིལ་ལས་ཁུངས་ཀྱི་བོད་ཀྱི་ཞུ་གཏུག་ཚན་པའི་འབྲེལ་ལས་བསྟན་འཛིན་ཀུན་མཁྱེན་ལགས་དང་། རིན་ཆེན་ལགས། འཕགས་བོད་འབྲེལ་མཐུད་ལས་ཁང་གི་ལས་འཆར་འགན་འཛིན་ངག་དབང་ཆོས་ལྡན་ལགས་བཅས་ཡིན།།
