༄༅། །ཡུ་རོབ་གྲོས་ཚོགས་སུ་བོད་དོན་རྒྱབ་སྐྱོར་གྱི་གནས་བབ་སྲ་བརྟན་གཏོང་བའི་གལ་གནད་དང་འབྲེལ། ཡུ་རོབ་གྲོས་ཚོགས་འཐུས་མི་སྐུ་ཞབས་ཊེ་ནི་ཡ་སི་ཛ་ལི་མཱ་སེ་ (Dainius Zalimas) ལགས་ཀྱིས་འགན་འཁུར་རྐང་བཞེས་དང་གྲོས་ཚོགས་འཐུས་མི་གྲངས་ ༢༠ ལྷག་གིས་རྒྱབ་སྐྱོར་འོག་ཕྱི་ལོ་ ༢༠༢༥ ཟླ་བ་ ༡ ཚེས་ ༢༩ རེས་གཟའ་ལྷག་པའི་ཉིན་བེལ་ཇི་ཡམ་གྱི་རྒྱལ་ས་སྦར་སིལ་དུ། ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་འཛུགས་གནང་བའི་མཛད་སྒོ་ཞིག་ཚོགས་ཡོད།

ཡུ་རོབ་མཐུན་ཚོགས་ཀྱི་རྒྱལ་ཁབ་བཅུ་གཉིས་ཀྱི་གྲོས་ཚོགས་འཐུས་མི་གྲངས་ ༧ དང་ལས་བྱེད་རྣམ་པ་མཉམ་འཛོམས་ཡོད་པའི་དབུ་འབྱེད་མཛད་སྒོའི་ཐོག་ལི་ཐུ་ཝི་ནི་ཡ་ (Lithuania) ནས་ཡིན་པའི་ཡུ་རོབ་གྲོས་ཚོགས་འཐུས་མི་དང་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་སྐུ་ཞབས་ཊེ་ནི་ཡ་སི་ཛ་ལི་མཱ་སེ་ (Dainius Zalimas) ལགས་ཀྱིས། གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་དགོས་དམིགས་སྐོར་གསུང་བཤད་གནང་བ་དང་སྦྲགས། རྒྱལ་སྤྱིའི་སྟེང་བོད་མིའི་གནས་སྟངས་གསལ་སྟོན་དང་གཞི་རྩའི་རང་དབང་སྲུང་སྐྱོབ་གོང་འཕེལ་སླད་དྲིལ་བསྒྲགས་གནང་རྒྱུའི་ཆོད་སེམས་བརྟན་པོ་ཡོད་པ་གསུང་འདུག ལྷག་པར་གྲོས་ཚོགས་འཐུས་མི་ཁོང་གིས་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་འཛུགས་གནང་བ་འདི་ཡིས་བོད་དོན་འཐབ་རྩོད་ཀྱི་ལས་འགུལ་ལ་གོམ་སྟབས་གལ་ཆེན་ཞིག་ཡིན་སྐོར་དང་འབྲེལ། གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ངོས་ནས་བོད་མིའི་རང་དབང་དང་ཐོབ་ཐང་ཐད་ཞུ་གཏུག་གནང་རྒྱུ་ཡིན་སྐོར་གསུང་པ་མ་ཟད། ཡུ་རོབ་གྲོས་ཚོགས་སུ་གླེང་སློང་གནང་རྒྱུ་ཡིན་པ་གསུང་འདུགདབུ་འབྱེད་མཛད་སྒོའི་ཐོག་བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་མཛད་སྒོའི་ཐོག་ཕེབས་པའི་གྲོས་ཚོགས་འཐུས་མི་རྣམས་ལ་ཉེ་ཆར་བོད་ནང་བྱུང་བའི་ས་ཡོམ་གྱི་གོད་ཆག་སྐོར་དང་། ད་ལྟའི་བོད་ནང་གི་ཛ་དྲག་གནས་སྟངས་སྐོར་གསལ་བཀྲོལ་གནང་ཡོད།

གཞན་ཡང་སྐུ་ཚབ་དོན་གཅོད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་ ༩༠ ལ་ཕེབས་པའི་༸སྐུའི་གོ་སྟོན་དང་བསྟུན། བོད་མིའི་སྒྲིག་འཛུགས་ནས་འཛམ་གླིང་ཁྱོན་ཡོངས་སུ་ལོ་འཁོར་མོར་བྱམས་བརྩེའི་ལོ་ཞེས་སྲུང་བརྩི་ཞུ་གཏན་འཁེལ་བའི་སྐོར་དང་། འདི་ལོའི་ཕྱི་ཟླ་ ༦ ནང་ཉི་འོང་གི་རྒྱལ་ས་ (Tokyo) ཚོགས་གཏན་ཁེལ་བའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་དགུ་པའི་ཐོག་གྲོས་ཚོགས་འཐུས་མི་རྣམ་པ་མཉམ་ཞུགས་ཡོང་བའི་རེ་སྐུལ་ཞུས་འདུག

ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་འཛུགས་ཀྱི་མཛད་སྒོ་འདིའི་ཐོག་བེལ་ཇ་ཡམ་སྐུ་ཚབ་དོན་ཁང་གི་ཡུ་རོབ་བོད་དོན་འབྲེལ་མཐུད་པ་བསྟན་འཛིན་ཕུན་ཚོགས་ལགས་དང་། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་མེ་ཊན་ (Vincent Metten) ལགས་དང་ཚོགས་པའི་ཞུ་གཏུག་ལས་བྱེད་ལྕམ་སྐུ་མེ་ལ་ནི་ (Melanie) ལགས་ཀྱང་ལྷན་ཞུགས་གནང་འདུག །