༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༡༡ ཉིན་འཇར་མན་གྲོང་ཁྱེར་ཕེརེངྐ་ཕོཌ་ (Frankfurt) ཏུ་རྟེན་གཞི་བྱས་པའི་བོད་ཁང་ནང་དུ་ཐོས་བསམ་རིན་པོ་ཆེ་མཆོག་དབུ་བཞུགས་ཐོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། འཇར་མན་རོགས་ཚོགས་ཀྱི་གཙོ་འཛིན་སྐུ་ཞབས་ཀར་སི་ཊེན་ཀིལེན་ (Dr. Carsten Klein) ལགས་དང་། འཇར་མན་བོད་དོན་ལས་འགུལ་ཁང་ (ICT) གི་འཛིན་སྐྱོང་འགན་འཛིན་སྐུ་ཞབས་ཀའི་མུ་ལར་ (Mr. Kai Muller) ལགས། ས་གནས་བོད་རིགས་ཚོགས་པའི་ཚོགས་གཙོ། ས་གནས་བོད་མི་བཅས་ལྷན་འཛོམས་ཀྱིས་ཉེ་ལམ་བོད་ཀྱི་གཞི་ཀ་རྩེའི་ཁུལ་གྱི་སྟོད་དིང་རིར་ས་ཡོམ་གྱི་གོད་ཆག་ཚབས་ཆེ་འོག གཞིས་བཞུགས་སྤུན་ཟླ་འདས་གྲོངས་སུ་གྱུར་བ་རྣམས་ལ་བསྔོ་བ་དང་། རྗེས་ཤུལ་ནང་མི་ཚོར་ལུས་སེམས་གཉིས་ཀྱི་དཀའ་སྡུག་བཟོད་བརླག་མེད་པ་མྱོང་བཞིན་པ་ལས་མགྱོགས་མྱུར་དུ་གྲོལ་ཆེད་སྨོན་ལམ་གསུང་འདོན་གནང་ཡོད། སྐབས་དེར་ཐོས་བསམ་རིན་པོ་ཆེས་བོད་ཁང་གི་ལས་དོན་གནང་ཕྱོགས་སྐོར་ལ་ངོ་སྤྲོད་གནང་བ་མ་ཟད། འབྱུང་འགྱུར་ལས་གཞི་གང་དང་གང་སྤེལ་འཆར་སྐོར་ངོ་སྤྲོད་གནང་ཡོད། ཕྱོགས་མཚུངས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ལྷན་འཛོམས་སྐབས་དེར་འཇར་མན་རོགས་ཚོགས་ལ་ད་བར་བོད་མིར་རྒྱབ་སྐྱོར་རམ་འདེགས་གནང་དང་གནང་མུས་ལ་ཡི་རང་བསྔགས་བརྗོད་དང་ཐུགས་རྗེ་ཆེ་ཞུས་པ་དང་སྦྲགས། ལེགས་གསོལ་མཚོན་ཕྱིར་སྟོན་པའི་ཞལ་ཐང་ཞིག་ཀྱང་ཕུལ་གནང་ཡོད་པ་བཅས།།