༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༡༣ ཉིན་དབུས་འོས་བསྡུ་ལས་ཁང་དུ་འོས་བསྡུ་ལས་ཁང་དང་ལས་བྱེད་འདེམས་བསྐོ་ལྷན་ཁང་གཉིས་ཀྱི་དྲུང་ཆེ་གཅིག་ལྕོགས་གུང་ཟུར་བསྟན་འཛིན་ལེགས་གྲུབ་ལགས་དང་། དབུས་འོས་བསྡུ་ལས་ཁང་གི་དྲུང་ཆེ་གསར་པ་བློ་བཟང་ཆོས་གྲགས་ལགས་གཉིས་ཀྱི་དབར་རྩིས་སྤྲོད་རྩིས་ལེན་ལེགས་པར་གྲུབ་ཡོད་པ་དང་། དབུས་འོས་བསྡུ་ལས་ཁང་གི་དྲུང་ཆེ་བློ་བཟང་ཆོས་གྲགས་ལགས་ནས་ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༨ ཉིན་འོས་བསྡུ་ལས་ཁང་གི་དྲུང་ཆེའི་ལས་འགན་དབུ་འཛུགས་ཞུས་ཡོད།
དྲུང་ཆེ་གསར་རྙིང་དབར་རྩིས་སྤྲོད་རྩིས་ལེན་གྲུབ་མཚམས་དབུས་འོས་བསྡུ་འགན་འཛིན་མཆོག་དང་། ལས་བྱེད་འདེམས་ལྷན་གྱི་ཚོགས་གཙོ་མཆོག དེ་བཞིན་འོས་བསྡུ་དང་འདེམས་ལྷན་གཉིས་ཀྱི་ལས་བྱེད་ཐུན་མོང་ནས་འཚམས་འདྲིའི་མཇལ་དར་སྒྲོན་རྗེས་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་ཞུས་ཡོད།
དྲུང་ཆེ་བློ་བཟང་ཆོས་གྲགས་ལགས་ཕྱི་ལོ་ ༢༠༠༣ ཟླ་བ་ ༠༢ ཚེས་ ༡༡ ཉིན་དྲུང་ལས་གནས་རིམ་ཐོག་བསྐོ་གཞག་གིས་དྷ་ས་ས་འགོ་ལས་ཁུངས་དང་ཧིན་བོད་མཛའ་ཚོགས་ཀྱི་དྲུང་ཡིག་དུ་ལས་འགན་བཀོད་སྒྲིག་གནང་བ་དང་། ཕྱི་ལོ་ ༢༠༠༣ ཟླ་བ་ ༠༨ ཚེས་ ༣༠ ཉིན་དྲུང་ལས་གནས་རིམ་དུ་ལས་བྱེད་ངོ་མར་བསྐོ་གཞག་གིས་ལས་འགན་རང་འཇགས། ཕྱི་ལོ་ ༢༠༠༦ ཟླ་བ་ ༠༢ ཚེས་ ༡༧ ནས་སྤོན་ཊ་ཆོལ་གསུམ་ས་གནས་འགོ་འཛིན། ཕྱི་ལོ་ ༢༠༠༧ ཟླ་བ་ ༠༡ ཚེས་ ༢༠ ནས་ཕྱི་དྲིལ་ལས་ཁུངས་ཀྱི་དྲུང་ལས། ཕྱི་ལོ་ ༢༠༠༩ ཟླ་བ་ ༠༡ ཚེས་ ༢༡ ནས་དྲུང་གཞོན་གནས་རིམ་དུ་གནས་སྤར། ཕྱི་ལོ་ ༢༠༡༣ ཟླ་བ་ ༠༩ ཚེས་ ༠༩ ནས་ཟུང་དྲུང་གནས་རིམ་དུ་གནས་སྤར།
ཕྱི་ལོ་ ༢༠༡༧ ཟླ་བ་ ༠༡ ཚེས་ ༠༡ ནས་ཉི་འོང་སྐུ་ཚབ་དོན་གཅོད་ལས་ཁུངས་ཀྱི་ཟུང་དྲུང་དུ་གནས་སྤོས། ཕྱི་ལོ་ ༢༠༢༠ ཟླ་བ་ ༠༨ ཚེས་ ༡༧ ཉིན་དྲུང་འཕར་གནས་རིམ་དུ་གནས་སྤར་གྱིས་བཀའ་དྲུང་ཡིག་ཚང་དུ་གནས་སྤོས། ཕྱི་ལོ་ ༢༠༢༤ ཟླ་བ ༡༢ ཚེས་ ༠༢ ནས་དྲུང་ཡིག་ཆེན་མོའི་གནས་རིམ་དུ་གནས་སྤར་གྱིས་དབུས་འོས་བསྡུ་ལས་ཁང་གི་དྲུང་ཆེར་བསྐོ་གཞག་གནང་ཡོད་པ་བཅས།།
