༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༧ ཉིན་གྱི་ཞོགས་པ་བོད་ཀྱི་སྟོད་དིང་རི་ས་ཁུལ་གཙོས་ས་གནས་ཁག་འགའ་ཤས་ལ་ས་ཡོམ་ཤུགས་ཚད་རིམ་པ་ ༧.༡ བརྒྱབ་སྟེ་ད་ལྟའི་ཆར་མི་གྲངས་བརྒྱ་ཕྲག་བརྒལ་བ་རྐྱེན་འདས་དང་རྨས་སྐྱོན་ཕོག་པ། དེ་བཞིན་ཁང་ཁྱིམ་གཏོར་བཤིག་ཚབས་ཆེ་བྱུང་བ་དང་། དགུན་དུས་ཀྱི་གྲང་ངར་ཆེ་བའི་སྐབས་དེར་ཟས་གོས་གནས་མལ་སོགས་ཀྱི་དཀའ་ངལ་འཕྲད་བཞིན་ཡོད་པའི་གནས་ཚུལ་གསར་འགྱུར་བརྒྱུད་ལམ་དུ་ཐོན་པར་ཡིད་སྐྱོ་བློ་ཕམ་ཚད་མེད་བྱུང་། རྐྱེན་འདས་སུ་གྱུར་བ་རྣམས་ལ་བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་རིས་མེད་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པས་བསྔོ་སྨོན་མཛད་བཞིན་ཡོད་ལ། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་རྐྱེན་འདས་སུ་སོང་བ་རྣམས་འཕགས་མཆོག་འཇིག་རྟེན་མགོན་པོས་རྗེས་སུ་བཟུང་བའི་བསྔོ་སྨོན་སྐྱབས་ཞུ་དང་། རྗེས་ཤུལ་ནང་མི་རྣམས་ལ་ཐུགས་གསོ་ཞུ་བ་དང་སྦྲགས། རྨས་སྐྱོན་ཕོགས་པའི་རང་རིགས་རྣམས་ལ་སྨན་བཅོས་ཀྱི་མཐུན་རྐྱེན་ཡོང་ཐབས་དང་། དེ་དག་མགྱོགས་ནས་མྱུར་དུ་དྲག་སྐྱེད་ཡོང་བའི་སྨོན་འདུན་ཞུ་རྒྱུ་མ་ཟད། སྡོད་ཁྱིམ་སོགས་ཀྱི་དཀའ་ངལ་ལས་གྲོལ་བའི་མཐུན་འགྱུར་ཡོང་བ་སྤྱི་སྒེར་ཡོངས་ལ་འབོད་སྐུལ་ཞུ་རྒྱུ་བཅས། བོད་མི་མང་སྤྱི་འཐུས་ལྷན་ཚོགས་ནས། རབ་གནས་ཤིང་འབྲུག་ཕྱི་ལོ་ ༢༠༢༥ ཟླ་ ༡ ཚེས་ ༧ ལ།།