༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཟླ་བ་འདིའི་ཟླ་འགོར་བོད་གཞིས་ཀ་རྩེའི་དིང་རི་རྫོང་ཁོངས་ཀྱི་གྲམ་མཚོ་དང་། ཆུ་ལྷོ། མཚོ་སྒོ། དེ་བཞིན་ས་སྐྱ་རྫོང་དང་། ངམ་རིང་། ལྷ་རྩེ། གཏིང་སྐྱེས་བཅས་ཀྱི་ས་ཁུལ་དུ་ས་ཡོམ་གྱི་གོད་ཆག་ཧ་ཅང་ཆེན་པོ་བྱུང་བའི་གནས་ཚུལ་ཐོན་པའི་ཉིན་དེ་རང་ལ་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་ཁྱབ་ཁོངས་བོད་རིགས་སྤྱི་མཐུན་ཚོགས་པ་ཚང་མར་གདུང་སེམས་མཉམ་སྐྱེད་ཀྱི་མཆོད་འབུལ་སྨོན་ལམ་ཚོགས་དགོས་པའི་རེ་སྐུལ་ཞུས་པ་བཞིན། བྱང་ཨ་རིའི་བོད་མི་གནས་སྡོད་ས་ཁུལ་ཚང་མས་རང་རང་ས་གནས་ཀྱི་གནས་སྟངས་དང་དུས་ཚོད་ལ་གཞིགས་ཏེ། མཆོད་འབུལ་སྨོན་ལམ་ཚོགས་པའི་ལམ་ནས་བོད་ནང་གི་མི་མང་ལ་ས་ཡོམ་གྱི་གོད་ཆག་ཤིན་ཏུ་ཆེན་པོ་བྱུང་བའི་ཡིད་སྐྱོའི་གནས་ཚུལ་ལ་གདུང་སེམས་མཉམ་སྐྱེད་མཚོན་པ་གནང་ཡོད།
གོད་ཆག་བྱུང་ནས་དེ་རིང་བར་བདུན་གཉིས་འགྲོ་གི་ཡོད་པ་དང་། བྱང་ཨ་རིའི་ས་གནས་ཁག་གིས་དུས་ཚོད་མི་འདྲ་བ་དང་། རྣམ་པ་མི་འདྲ་བའི་སྒོ་ནས་བསྔོ་བ་སྨོན་ལམ་འདེབས་པའི་འདུ་འཛོམས་གནང་ཡོད་པ་དང་། ས་གནས་ཁག་ཅིག་གིས་སྨོན་ལམ་གསུང་འདོན་གནང་བཞིན་པ། རེ་ཟུང་གིས་ད་དུང་ཞག་ཞེ་དགུའི་སྨོན་ལམ་ཚོགས་རྒྱུ་ཡིན་པའི་སྔོན་བརྡ་ཡང་ཟིན་པ་བཅས་ལ་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་ཐུགས་རྗེ་ཆེ་ཞུ་རྒྱུ་ཡིན།
སེམས་ཅན་གཞན་ལ་ལུས་སེམས་ཀྱི་དཀའ་ངལ་འཕྲད་སྐབས་བསྔོ་བ་དང་སྨོན་ལམ་འདེབས་རྒྱུ་ནི་ནང་པ་སངས་རྒྱས་པའི་ཐུན་མོང་མ་ཡིན་པའི་བྱེད་སྟངས་ཤིག་ཡིན་པས། བྱང་ཨ་རིའི་ས་གནས་ཚང་མའི་ནང་སྨོན་ལམ་ཚོགས་པ་འདིས་འདས་སོན་ཡོངས་ལ་ཕན་ཐོགས་ཆེན་པོ་བྱུང་ཡོད་པ་སྨོས་མེད་ཡིན་ལ། བཙན་བྱོལ་བོད་མིའི་སྤྱི་ཚོགས་ནས་ས་ཡོམ་གྱི་གོད་ཆག་ཁྲོད་འདས་སོན་བྱུང་བའི་མི་རྣམས་ལ་བསྔོ་བ་སྨོན་ལམ་གནང་རྒྱུ་ནི་མིག་སྔའི་གནས་སྟངས་འོག་གི་གདུང་སེམས་མཉམ་སྐྱེད་ཡག་ཤོས་ཤིག་ཡིན་པས་གོ་སྐབས་འདི་བརྒྱུད་ས་གནས་ཚང་མར་ཐུགས་རྗེ་ཆེ་ཞུ་རྒྱུ་ཡིན། །
