༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༢༦ ཉིན་རྒྱ་གར་གཞུང་ཚབ་ནས་བེལ་ཇི་ཡམ་དང་། ལུག་ཛམ་བརྒ། ཡུ་རོབ་སྤྱི་མཐུན་རྒྱལ་ཁབ་བཅས་ལ་མགྲོན་འབོད་གནང་བ་ལྟར། བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། བེལ་ཇི་ཡམ་སྐུ་ཚབ་དོན་ཁང་གི་ཞུ་གཏུག་འབྲེལ་ལས་བསྟན་འཛིན་ཕུན་ཚོགས་ལགས་རྣམ་གཉིས་ (Steigenberger Wiltcher) ཞེས་པའི་གསོལ་མགྲོན་ཁང་དུ་རྒྱ་གར་མི་སེར་རྒྱལ་ཁབ་ཀྱི་ཉིན་མོ་སྲུང་བརྩིའི་མཛད་སྒོར་མཉམ་ཞུགས་གནང་ཡོད། མཛད་སྒོ་དེར་རྒྱལ་ཁབ་འདྲ་མིན་གྱི་གཞུང་ཚབ་དང་། ཡུ་རོབ་སྤྱི་མཐུན་རྒྱལ་ཁབ་ཀྱི་སྐུ་ཚབ་རྣམ་པ་བཅས་ཕེབས་ཡོད།
དེ་ཡང་གཞུང་ཚབ་སྐུ་ཞབས་སོ་རབ་ཀུ་མར་ (Saurabh Kumar) ལགས་ཀྱིས་རྒྱ་གར་དང་། ཡུ་རོབ་སྤྱི་མཐུན་རྒྱལ་ཁབ། བེལ་ཇི་ཡམ། ལུག་ཛམ་བརྒ་དབར་འབྲེལ་ལམ་གནང་ཕྱོགས་ཀྱི་ཐབས་བྱུས་སྐོར་དང་། འཛམ་གླིང་ཞི་བདེ་སྐྲུན་བར་རྒྱ་གར་གྱི་འགན་འཁྲི་ཆེན་པོ་ཡོད་པའི་སྐོར་ནན་བརྗོད་གནང་ཡོད།
མཛད་སྒོ་དེར་རྒྱ་གར་དང་རྒྱལ་ཁབ་གཞན་དབར་གྱི་འབྲེལ་ལམ་དང་། ལྷག་པར་ཕྱི་སྲིད་ཀྱི་འབྲེལ་ལམ་གོང་མཐོར་གཏོང་རྒྱུའི་གོ་སྐབས་བསྐྲུན་ཡོད། གཞན་ཡང་སྐབས་དེར་རིག་གཞུང་འཁྲབ་སྟོན་དང་། རྒྱ་གར་རིག་གཞུང་སྣ་འཛོམས་ལྡན་པའི་འགྲེམས་སྟོན་གོ་སྒྲིག་གནང་ཡོད་པ་བཅས།།
