༄༅། །བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ངོས་ནས་ཕྱི་ལོ་གསར་ཚེས་ཀྱི་དགའ་སྟོན་གྱི་ཉིན་མོར་བོད་ཕྱི་ནང་གཉིས་ཀྱི་བོད་མི་སྤྱི་དང་། ལྷག་པར་བོད་དོན་དང་དྲང་བདེན་ལ་རྒྱབ་སྐྱོར་གནང་མཁན་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་གྲངས་མེད་ཞུ་བ་དང་སྦྲགས། ཕྱི་ལོ་ ༢༠༢༥ ཟླ་བ་ ༡ ཚེས་ ༡ སྟེ་ལྷག་དཀར་དགེ་བའི་ཉིན་བཟང་ལ་འདི་ལས་ནས་བོད་པའི་བྱིས་པ་ཚོའི་ཆེད་དུ་གསར་བཟོ་ཞུས་པའི་བསྟན་འཛིན་གྱི་འཛམ་གླིང་ཞེས་པའི་ཕྱོགས་ཚད་གསུམ་ལྡན་གྱི་བྱིས་པའི་འགུལ་བརྙན་ཁོངས་ཀྱི་ལེའུ་བཞི་པ་ ༼ བོད་ཀྱི་ལོ་གསར་གྲ་སྒྲིག ༽ ཞེས་པ་ཤེས་རིག་ལས་ཁུངས་ཀྱི་བོད་ཡིག་སློབ་སྦྱོང་དྲྭ་ཚིགས་དང་། ཡུ་ཊུབ་དྲྭ་བརྙན་ཐོག་ཤར་གཏོང་ཞུས་ཡོད་ལ། གོང་གསལ་དྲྭ་ཐག་བརྒྱུད་གཟིགས་རྒྱུ་ཡོད་པ་མ་ཟད། ཕབ་ལེན་ཡང་གནང་ཐུབ་ཀྱི་ཡོད་པས། མ་འོངས་བོད་ཀྱི་སོན་རྩ་རྣམ་པས་དགྱེས་གཟིགས་ཡོང་བ་ཞུ།
དེ་ཡང་དེང་གི་ཆར་འགུལ་བརྙན་ནི་སློབ་ཁྲིད་རིག་པའི་ཐབས་ལམ་གལ་ཆེའི་གྲས་སུ་བརྩི་བཞིན་པ་ལྟར། བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཕྱི་ལོ་ ༢༠༡༦ ལོ་ནས་བཟུང་ཕྱོགས་ཚད་གསུམ་ལྡན་དང་གཉིས་ལྡན་གྱི་བྱིས་པའི་འགུལ་བརྙན་བཟོ་སྐྲུན་གྱི་ལས་གཞི་བྱེད་འགོ་བཙུགས་གནང་ཡོད།
སྤྱིར་འགུལ་བརྙན་རིགས་ནི་ཕྲུ་གུ་རྒན་གཞོན་སྤྱི་དང་། ལྷག་པར་བྱིས་པ་ཆུང་ཆུང་ཚོའི་སྐད་ཡིག་གོང་འཕེལ་དང་། རིག་གཞུང་ངོ་སྤྲོད། ལུས་སེམས་བདེ་སྐྱིད། བཟང་སྤྱོད་ཀྱི་བསླབ་བྱ། ཚན་རྩིས་ངོ་སྤྲོད། གཞས་དང་རོལ་མོའི་སྒྱུ་རྩལ་སོགས་བརྒྱུད་སྤེལ་སོགས་ལ་ཕན་ནུས་ཆེན་པོ་ཡོད་པར་བརྟེན། ཤེས་རིག་ལས་ཁུངས་ཀྱིས་བོད་པའི་བྱིས་པ་ཡོངས་ཀྱི་ཆེད་དུ་འགུལ་བརྙན་དེ་རིགས་གང་མང་བཟོ་སྐྲུན་ཐུབ་པར་འབད་བརྩོན་སྔར་ལྷག་ཞུ་བཞིན་ཡོད།
གོང་གསལ་འགུལ་བརྙན་གྱི་འགྲོ་གྲོན་ཡོངས་རྫོགས་ཨ་རིའི་རོགས་ཚོགས་ (USAID) ནས་མཐུན་འགྱུར་གནང་བ་ཞིག་ཡིན་པ་བཅས། །
