༄༅། ། ཕྱི་ལོ་ ༢༠༢༥ ཟླ་བ་ ༡ ཚེས་ ༡ ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ན་གཞོན་རོགས་སྐྱོར་ཚན་པས་བོད་མིའི་མདུན་ལམ་སློབ་སྟོན་ཁང་དུ་སྤྱོད་སྒོ་མང་བའི་ལས་རིགས་སྦྱོང་བརྡར་ཁང་གསར་དུ་དབུ་འཛུགས་གནང་ཡོད། སྐབས་དེར་སྐུ་མགྲོན་གཙོ་བོར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཆེད་ཕེབས་ཀྱིས་དབུ་འབྱེད་གནང་ཡོད།
དེ་ཡང་སྦྱོང་བརྡར་ཁང་དེ་བརྒྱུད་གཞོན་སྐྱེས་རྣམས་ལ་དམིགས་པའི་ནུས་པ་གོང་འཕེལ་གྱི་ལས་རིགས་འདྲ་མིན་ཐོག་སྦྱོང་བརྡར་གནང་གི་ཡོད། དེའི་ཁོངས་སུ་ཤི་བཟོ་རྩལ་དང་། བག་ལེབ་བཟོ་རྩལ། འཚིག་ཇ་བཟོ་རྩལ་བཅས་ཀྱི་སྦྱོང་བརྡར་འདྲ་མིན་ཐོག་གཞོན་སྐྱེས་ཚོར་ལས་ཞུགས་གནང་རྒྱུའི་གོ་སྐབས་ཡོད། ཟླ་འདིའི་ཚེས་ ༡ ཉིན་སུ་ཤི་བཟོ་རྩལ་གྱི་སྦྱོང་བརྡར་འགོ་འཛུགས་གནང་ཡོད་པའི་ནང་མཉམ་ཞུགས་པ་གྲངས་ ༢༡ བྱུང་ཡོད།
སྐབས་དེར་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་མཐུན་རྐྱེན་གསར་པ་འདིའི་བརྒྱུད་བོད་པའི་ན་གཞོན་རྣམས་ཀྱིས་རིན་ཐང་ལྡན་པའི་ནུས་རྩལ་དང་། རང་ཁ་རང་གསོའི་ནུས་པ་སྐྱེད་སྲིང་བྱེད་དགོས་སྐོར་ནན་བརྗོད་གནང་། ན་གཞོན་རོགས་སྐྱོར་ཚན་པས་བོད་ཀྱི་ན་གཞོན་རྣམས་ལ་ཤེས་ཡོན་དང་ལག་ཤེས་སྦྱོང་བརྡར་སྤྲོད་པའི་དཔལ་འབྱོར་དང་སྤྱི་ཚོགས་ཀྱི་གོང་འཕེལ་ཆེད་རོགས་སྐྱོང་གནང་བཞིན་ཡོད་པ་བཅས།།
