༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མེའོ་ཆོས་འཕེལ་གླིང་བོད་མིའི་གཞིས་ཆགས་སུ་ཕེབས་འབྱོར་གྱིས་ས་གནས་ཀྱི་གཞུང་དང་གཞུང་ཁོངས་མ་ཡིན་པའི་ཚོགས་པ་ཁག་གི་ལས་ཁུངས་སུ་གཟིགས་སྐོར་དང་གཞིས་གྲོང་ཁག་ཏུ་འཚམས་གཟིགས་གནང་ཡོད་པ་མ་ཟད། གཞིས་གྲོང་ཁག་ལྔའི་སྤྱི་ཁང་དང་། ས་གནས་མི་མང་ཚོགས་ཁང་དབུ་འབྱེད་གནང་ཡོད་པ་རེད།
ཕྱི་ཚེས་ ༢༦ ཉིན་དཔལ་ལྡན་སྲིད་སྐྱོང་མཆོག་ས་གནས་རྫོང་དཔོན་ལས་ཁུངས་ཀྱི་གོ་སྒྲིག་འོག་རྒྱ་གར་མི་སེར་རྒྱལ་ཁབ་ཀྱི་དུས་དྲན་ཐེངས་ ༧༦ པའི་སྲུང་བརྩིའི་མཛད་སྒོར་དམིགས་བསལ་སྐུ་མགྲོན་དུ་ཕེབས་ཞུགས་གནང་ཡོད་ཅིང་། སྐབས་དེར་མེའོ་རྫོང་དཔོན་གཞོན་པ་སྐུ་ཞབས་ཨར་ཌི་ཐུང་གོན་ལགས་ཀྱང་ཕེབས་ཞུགས་གནང་ཡོད། མཛད་སྒོ་གྲུབ་མཚམས་བཀའ་ཤག་སྐབས་ ༡༦ པའི་མི་མང་ཚོགས་ཁང་བཟོ་སྐྲུན་ལས་གཞི་ལྟར་གཞིས་གྲོང་ཁག་ལྔའི་ནང་སྤྱི་ཁང་གསར་སྐྲུན་དང་། མི་མང་ཚོགས་ཁང་བཅས་ལེགས་གྲུབ་བྱུང་བར་དཔལ་ལྡན་སྲིད་སྐྱོང་མཆོག་གིས་གཞིས་ཆགས་སུ་འཚམས་གཟིགས་སྐབས་ཚོགས་ཁང་དྲུག་པོ་རིམ་བཞིན་དབུ་འབྱེད་གནང་རྗེས་མེའོ་སཾ་བྷོ་ཊ་ཉིན་སློབ་ཏུ་ཕེབས་ཏེ་གསུང་བཤད་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་སློབ་ཕྲུག་རྣམས་ལ་གློག་སྟོན་བརྙན་རིས་བརྒྱུད་བོད་མཐོ་སྒང་གི་གལ་གནད་སྐོར་ངོ་སྤྲོད་གནང་བ་དང་སྦྲགས། དེང་སང་གཞོན་སྐྱེས་ཚོས་མ་འོངས་མདུན་ལམ་ཆེད་སྤྱི་ཚོགས་གཞན་དང་འདྲེས་པའི་རྐྱེན་གྱིས་པདྨ་བཀོད་ཀྱི་ཡུལ་སྐད་རིམ་བཞིན་ཉམས་རྒུད་དུ་འགྲོ་བཞིན་ཡོད་སྟབས་དེ་སྲུང་སྐྱོབ་བྱེད་དགོས་པའི་སྐུལ་མ་གནང་།
དེ་རྗེས་དཔལ་ལྡན་སྲིད་སྐྱོང་མཆོག་གིས་མི་མང་ཚོགས་ཁང་དུ་མང་ཚོགས་ལ་གསུང་བཤད་གནང་སྐབས་དེ་སྔོན་ཨི་ཊ་ན་གར་དུ་ཚོགས་པའི་ཁོར་ཡུག་དང་བདེ་འཇགས་ཞེས་པའི་ཉིན་གཅིག་གི་བགྲོ་གླེང་ཚོགས་འདུ་སྐོར་ངོ་སྤྲོད་དང་འབྲེལ། ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་བཙན་བྱོལ་བོད་མིའི་བདེ་དོན་དང་། བོད་དོན་ཐོག་རྒྱབ་སྐྱོར་བརྟན་པོ་གནང་བར་བསྔགས་བརྗོད་གནང་ཡོད། བགྲོ་གླེང་ཚོགས་འདུའི་ཐོག་ཨ་རུ་ཎཱ་ཅལ་མངའ་སྡེ་གཞུང་གི་དཔོན་རིགས་ཁག་ཅིག་དང་། ཁྱབ་ཁོངས་ཚོ་ཁག་འདྲ་མིན་གྱི་ལས་སྣེ་རྣམ་པ་སོགས་མཉམ་ཞུགས་གནང་སྟེ་ཧ་ཅང་ལེགས་གྲུབ་བྱུང་བ་མ་ཟད། ལྷག་པར་ས་གནས་ཡུལ་མི་དང་བཙན་བྱོལ་བོད་མིའི་དབར་གྱི་གོ་ནོར་སེལ་ཐུབ་པ་བྱུང་། ཞེས་གསུངས།
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མི་ཚོར་སྙེམ་ཆུང་ངང་གནས་དགོས་པ་དང་། མངའ་སྡེའི་མི་མང་དང་གཞུང་གཉིས་ཀའི་རྒྱབ་སྐྱོར་ལ་རྟག་ཏུ་བཀའ་དྲིན་རྗེས་དྲན་དགོས་པའི་ནན་སྐུལ་གནང་སྟེ་ས་གནས་ཡུལ་མི་དང་མཉམ་དུ་འབྲེལ་ལམ་དམ་ཟབ་གཏོང་རྒྱུའི་ནན་བརྗོད་གནང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་ ༡༦ པའི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་འོག་རྒྱལ་སྤྱིའི་སྟེང་བོད་དོན་ཞུ་སྐུལ་གྱི་ཆབ་སྲིད་ལས་དོན་དང་། བཙན་བྱོལ་བོད་མིའི་སྤྱི་ཚོགས་བདེ་དོན། འཛིན་སྐྱོང་ལས་དོན་སོགས་གྲུབ་འབྲས་གང་བྱུང་བ་ཡོངས་རྫོགས་མགོན་པོ་མཆོག་གི་དབུ་ཁྲིད་ལམ་སྟོན་དང་ཐུགས་ཀྱི་བྱིན་མཐུ་ལ་བརྟེན་ནས་བྱུང་བ་ཡིན་པར་གསལ་བཤད་གནང་།
དེ་མཚུངས་དཔལ་ལྡན་སྲིད་སྐྱོང་མཆིག་གིས་བཙན་བྱོལ་བོད་མིའི་མི་འབོར་གྱི་གནས་སྟངས་ཤེས་རྟོགས་བྱ་རྒྱུ་གལ་ཆེན་པོ་ཡིན་པ་དང་། རྒྱ་ནག་གཞུང་གིས་བོད་ཀྱི་ངོ་བོ་རྩ་མེད་བཟོ་རྒྱུའི་སྲིད་བྱུས་ལ་ངོ་རྒོལ་དང་། བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་ཆེད་བོད་ཀྱི་ལོ་རྒྱུས་ལ་བལྟ་ཀློག་དགོས་པའི་འབོད་སྐུལ་གནང་། དེ་བཞིན་དཔལ་ལྡན་སྲིད་སྐྱོང་མཆོག་གིས་ཉེ་ཆར་ཨ་རིའི་སྲིད་གཞུང་ནས་བོད་དོན་ཐོག་གཏན་འབེབས་གནང་བའི་ཁྲིམས་ཡིག་ལྟ་བུའི་བོད་དོན་རྒྱབ་སྐྱོར་གྱི་གྲུབ་འབྲས་གལ་ཆེན་ཁག་ངོས་འཛིན་གནང་བ་དང་། བོད་མིའི་སྒྲིག་འཛུགས་ཀྱི་སྒྲོམ་གཞི་ཚགས་ཚུད་སླད་བོད་ཀྱི་གྲངས་འཛིན་དཔེ་མཛོད་གསར་བཟོའི་ལས་གཞི་དང་། སྲི་ཞུའི་ལས་བྱེད་རྣམས་ཀྱི་ནུས་རྩལ་མཐོར་འདེགས་སོགས་ལས་གཞི་སྐོར་ངོ་སྤྲོད་གནང་ཡོད།
ཐེངས་འདིའི་རྒྱ་གར་བྱང་ཤར་ཁུལ་གྱི་འཚམས་གཟིགས་སྐབས་དཔལ་ལྡན་སྲིད་སྐྱོང་མཆོག་དང་ལྷན་དུ་ནང་སྲིད་ལས་ཁུངས་ཀྱི་དྲུང་གཞོན་བསོད་ནམས་སྟོབས་རྒྱལ་ལགས་དང་དྲུང་ལས་དབུ་མ་འཕྲིན་ལས་ལགས་བཅས་ལྷན་བཅར་ཞུས་ཡོད་པ་བཅས།།
