༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༢༤ ཉིན་རྒྱ་གར་ཨ་རུ་ཎཱ་ཅལ་མངའ་སྡེའི་གྲོང་ཁྲེར་ཨི་ཊ་ན་གར་དུ་ཡོད་པའི་རྡོ་རྗེ་མཁའ་འགྲོ་ཚོགས་ཁང་དུ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་སྐུ་ཞབས་པདྨ་མཁའ་འགྲོ་མཆོག་རྣམ་གཉིས་ནས་ཁོར་ཡུག་དང་བདེ་འཇགས་ཞེས་པའི་བགྲོ་གླེང་ཚོགས་འདུ་དབུ་འབྱེད་གནང་ཡོད། དེ་ཡང་དབུ་འབྱེད་མཛད་སྒོའི་ཐོག་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་ཏ་པིར་གྷའོ་མཆོག་དང་། ཨ་རུ་ཎཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་རིན་ཆེན་མཁའ་འགྲོ་ཁེར་མེ་ལགས། བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཏར་ཏ་རག་ལགས། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་ཁག་དང་། ཨ་རུ་ཎཱ་ཅལ་མངའ་སྡེའི་གཞུང་གི་བློན་ཆེན་ཁག ཆབ་སྲིད་མི་སྣ། དཔོན་རིགས། གཞན་ཡང་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་ཐོག་མ་སྐུ་ཞབས་པི་ཀེ་ཐུང་གོང་ལགས་ཕེབས་ཞུགས་གནང་ཡོད།
དེ་བཞིན་བསྟན་འཛིན་སྒང་བོད་མིའི་གཞིས་ཆགས་ཀྱི་ས་གནས་འགོ་འཛིན་རབ་བརྟན་ཚེ་རིང་ལགས་དང་། འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས། བསྟན་འཛིན་ས་གནས་འགོ་འཛིན་ལས་ཁུངས་ཀྱི་ལས་དྲུང་། ས་གནས་ཀྱི་ཚོགས་པ་ཁག་གི་ཚོགས་མི། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་ཕྱི་དྲིིལ་ལས་ཁུངས་གཉིས་ཀྱི་སྐུ་ཚབ་བཅས་ཕེབས་ཡོད།
མཛད་སྒོའི་ཐོག་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་ཏ་པིར་གྷའོ་མཆོག་གིས་གསུང་བཤད་གནང་སྐབས་རྒྱ་ནག་གཞུང་གིས་བོད་ནང་དུ་འགྲོ་བ་མིའི་ཐོབ་ཐང་རྡོག་རོལ་དང་། བོད་ནང་གི་རང་འབྱུང་གཏེར་ཁ་སོགས་བེད་སྤྱོད་ལོག་པ་གཏོང་བཞིན་པར་ཐེར་འདོན་གནང་བ་དང་སྦྲགས། བོད་ནང་གི་བདེ་འཇགས་དང་རང་དབང་མེད་པའི་གནས་སྟངས་འདིས་རྒྱ་གར་གཙོས་པའི་ས་མཚམས་རྒྱལ་ཁབ་ཁག་ལ་ཤུགས་རྐྱེན་སྤྲོད་རྒྱུ་ཡིན་པ་གསལ་སྟོན་གནང་ཡོད། ལྷག་པར་རྒྱ་ནག་གཞུང་གིས་ཡར་ཀླུང་གཙང་པོའི་ཉེ་འགྲམ་དུ་ཆུ་མཛོད་གསར་རྒྱག་གི་ཆོག་མཆན་ཐོབ་པའི་ཐད་སེམས་འཚབ་བསྟན་ཡོད། ཁོང་གིས་དཀའ་ངལ་འདིའི་ཐད་མཉམ་འབྲེལ་ངང་ངོ་རྒོལ་གྱི་རྣམ་པ་སྟོན་དགོས་པ་དང་། རྒྱ་གར་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྒྲིག་འཛུགས་ངོས་འཛིན་གནང་དགོས་པའི་འབོད་སྐུལ་ཞུས་གནང་ཡོད།
དེ་རྗེས་ཨ་རུ་ཎཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་རིན་ཆེན་མཁའ་འགྲོ་ལགས་ཀྱིས་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་གཉིས་ངོ་སྤྲོད་དང་། དགོས་དམིགས་བཅས་ངོ་སྤྲོད་གནང་བ་གྲུབ་མཚམས་གསུང་དོན། ང་ཚོས་བཙན་བྱོལ་བོད་མི་ཙམ་མ་ཡིན་པར། རྒྱལ་ཁབ་ཀྱི་བདེ་འཇགས་དང་ཐད་ཀར་འབྲེལ་བ་ཡོད་པའི་རྩ་དོན་གི་ཆེད་དུ་རྒྱབ་སྐྱོར་བྱེད་བཞིན་ཡོད། ཅེས་དང་། རྒྱ་ནག་གིས་བོད་བཙན་བཟུང་མ་བྱས་གོང་ལ་ང་ཚོའི་ས་མཚམས་ཀྱི་བདེ་འཇགས་ལ་ཉེན་ཁ་མེད་ཅེས་འགྲེལ་བརྗོད་གནང་ཡོད།
དེ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་རྣམས་རྒྱ་གར་དུ་བཙན་བྱོལ་སླེབས་ནས་ལོ་ངོ་དྲུག་ཅུ་རེ་དྲུག་ཕྱིན་ཡོད་སྐོར་གསུང་སྐབས་བོད་མི་རྣམས་བཙན་བྱོལ་དུ་ཡུན་རིང་པོ་འདི་ལྟར་གནས་རྒྱུའི་རེ་བ་བྱས་མེད། རྒྱ་གར་དང་བོད་གཉིས་ལོ་རྒྱུས་ཐོག་ནས་སྐད་ཡིག་དང་ཆོས་ཕྱོགས་ཀྱི་འབྲེལ་བ་གལ་ཆེན་སྐོར་དང་། ༸རྒྱལ་བ་སྐུ་ཕྲེང་དྲུག་པ་ཨ་རུ་ཎཱ་ཅལ་གྱི་མི་རིགས་ཡིན་སྐོར་གསལ་བཤད་གནང་ཡོད།
དེ་མཚུངས་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་འབྲེལ་མང་གཙོ་ཀ་བ་གསུམ་གྱི་སྐོར་ངོ་སྤྲོད་གནང་ཞིང་། ལྷན་ཁང་རེ་རེ་ནས་བོད་ཀྱི་འཐབ་རྩོད་ཐོག་ཕྱག་ལས་གནང་བཞིན་ཡོད་པ་འགྲེལ་བརྗོད་གནང་ཡོད། ཁོང་གིས་རྒྱ་ནག་ནང་གི་བོད་ཀྱི་དགོན་སྡེ་ཁག་ནང་ཧི་མ་ལ་ཡའི་རི་རྒྱུད་ཀྱི་གྲྭ་བཙུན་བརྒྱ་ཆ་དྲུག་ཅུ་ལྷག་ཡོད་པ་མ་ཟད། ཁོང་ཚོས་རྒྱ་ནག་གིས་བོད་ནང་བོད་ཀྱི་ཆོས་ལུགས་རྩ་མེད་བཟོ་བཞིན་པའི་དུས་སུ་ཆོས་ལུགས་སྲུང་སྐྱོབ་བྱེད་བཞིན་ཡོད་ཅེས་གསུངས།
དེ་ནས་ཁོང་གིས་འཛམ་གླིང་སྟེང་རྒྱ་ནག་གི་ཤུགས་རྐྱེན་ཤུགས་ཆེ་རུ་འགྲོ་བའི་གནས་སྟངས་དེས་རྒྱལ་སྤྱིའི་སྒྲིག་འཛུགས་ལ་གནོད་སྐྱོན་དང་། རྒྱ་གར་གྱི་བདེ་འཇགས་ལ་ཉེན་ཁ་ཇེ་ཆེར་འགྲོ་བཞིན་པའི་སྐོར་གསལ་སྟོན་གནང་བ་དང་ཆབས་ཅིག ས་ཁམས་ཆབ་སྲིད་དང་ཐབས་བྱུས་ཀྱི་དཀའ་ངལ་མཐའ་ཅིག་ཏུ་སེལ་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེད་འདོན་གནང་བའི་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་སྐོར་ངོ་སྤྲོད་གནང་ཡོད། དབུ་མའི་ལམ་ནི་བོད་རྒྱ་གཉིས་ཀྱི་རྩོད་རྙོག་ཞི་བའི་ལམ་ནས་སེལ་རྒྱུའི་ཐབས་ལམ་ཞིག་ཡིན་ཞེས་གསུངས་ཡོད།
དེ་རྗེས་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་ཐོག་མར་གོ་སྒྲིག་ཚོགས་ཆུང་དང་། མཉམ་ཞུགས་པ་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། བོད་ཀྱི་གནད་དོན་དང་། ཨ་རུ་ཎཱ་ཅལ་མངའ་སྡེའི་ཁོར་ཡུག་དང་བདེ་འཇགས་དབར་འབྲེལ་བ་ཡོད་སྐོར་གསུང་བཤད་གནང་། ཁོང་གིས་ང་ཚོའི་བྱང་ཕྱོགས་ཀྱི་ས་མཚམས་སུ་དཀའ་ངལ་འཕྲད་བཞིན་པ་དེས་ཉེན་ཁ་ཆེན་པོ་ཡོད་པ་དང་། དམིགས་བསལ་མངའ་སྡེའི་རྒྱུག་ཆུའི་མ་ལག་ལ་གནོད་སྐྱོན་ཆེན་པོ་ཐེབས་སྲིད་པ་རེད། ཅེས་གསུངས། དེ་བཞིན་བོད་མི་དང་ཨ་རུ་ཎཱ་ཅལ་མངའ་སྡེའི་མི་རིགས་དབར་ཆོས་ལུགས་དང་། ལོ་རྒྱུས་ཀྱི་འབྲེལ་བའི་སྐོར་འགྲེལ་བརྗོད་གནང་།
དེ་དང་ཕྱོགས་མཚུངས་སྐུ་ཞབས་པདྨ་མཁའ་འགྲོ་མཆོག་གིས་ཉེ་ལམ་ཨ་རིའི་སྲིད་གཞུང་ནས་བོད་རྒྱ་རྩོད་རྙོག་གི་ཁྲིམས་ཡིག་གཏན་འབེབས་གནང་བར་བསྔགས་བརྗོད་དང་། ཨ་རུ་ཎཱ་ཅལ་མི་མང་ནས་བཙན་བྱོལ་བོད་མི་སྐོར་རྒྱུས་ལོན་དགོས་གལ་ཡིན་པ་མ་ཟད། ཨ་རུ་ཎཱ་ཅལ་མི་རིགས་ཀྱི་གྲྭ་བཙུན་མང་དག་ཅིག་བོད་པའི་དགོན་སྡེ་ཁག་ཏུ་སློབ་གཉེར་གནང་བཞིན་པ་ནི་བོད་ཀྱི་ཆོས་ལུགས་རྒྱུན་སྐྱོང་བར་གལ་ཆེན་པོ་ཆགས་ཡོད་ཅེས་གསུངས་མཐར་སྐུ་ཞབས་ཏར་ཏ་རག་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་མཇུག་སྒྲིལ་ཡོད།
ཉིན་རྒྱབ་དཔལ་ལྡན་སྲིད་སྐྱོང་མཆོག་དང་། བོད་རིག་པ་མཁས་པ་དང་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ཟུར་པ་སྐུ་ཞབས་ཝི་ཛ་ཡ་ཀརནྟི་ (Vijay Kranti) ལགས་གཉིས་ཀྱི་ཁོར་ཡུག་དང་བདེ་འཇགས་ཞེས་པའི་བརྗོད་གཞི་ཐོག་གསུང་བཤད་ཟབ་རྒྱས་གནང་ཡོད། ཕྱི་དྲོ་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་དགོང་མོའི་གསོལ་ཚིགས་གོ་སྒྲིག་གནང་ཡོད་པ་བཅས།།
