༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ། འཇར་མན་རོགས་ཚོགས་ (FNF) གོ་སྒྲིག་འོག་ཝེས་ཊར་ཊལྜ་ (Westerwald) ཞེས་པའི་ས་གནས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་ལྷན་འཚིག་ཇ་ཁང་ཞིག་ཏུ་ལྷན་འཛོམས་ཀྱིས། བོད་དོན་རྒྱབ་སྐྱོར་གྱི་རྣམ་འགྱུར་ཤུགས་ཆེ་བསྟན་ཡོད།སྐབས་དེར་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་འཚིག་ཇ་ཁང་གི་སྒོ་འགྲམ་དུ་བོད་ཀྱི་རྒྱལ་དར་མཇལ་མ་ཐག་སེམས་ནང་དགའ་སྣང་གི་ཚོར་བ་ཧ་ཅང་སྐྱེ་ཞིང་། མཚོན་རྟགས་དེ་ནི་བོད་མིར་མཚོན་ན་ཧ་ཅང་རྩ་ཆེ་ཞིག་ཡིན་སྟབས་རྣམ་འགྱུར་དེར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད། བཀའ་བློན་རྒྱ་རི་སྒྲོལ་མ་མཆོག་གིས་འཇར་མན་རང་དབང་མང་གཙོ་ཚོགས་པའི་གྲོས་ཚོགས་འཐུས་མི་ལྕམ་སྐུ་སེནྜ་ར་ཝི་སར་ (Sandra Weeser) ལགས་ཕེབས་ནས་བོད་དང་བོད་མིར་རྒྱབ་སྐྱོར་གྱི་རྣམ་འགྱུར་ཤུགས་ཆེ་བསྟན་གནང་བར་ཐུགས་རྗེ་ཆེ་ཞུས་ཡོད།
ལྷན་འཛོམས་སྐབས་བོད་ནང་གི་ཛ་དྲག་གནས་སྟངས་སྤྱི་དང་། ལྷག་པར་ཕྱི་ལོ་ ༢༠༠༨ ནས་བཟུང་རྒྱ་ནག་གཞུང་གིས་བོད་མི་ཚོར་དམ་བསྒྲགས་སུན་གཙེར་ཧ་ཅང་ཆེ་རུ་བཏང་རྐྱེན་བོད་མི་ཚོ་འུ་ཐུག་ཐབས་ཟད་ཀྱིས་ཕྱི་ལོ་ ༢༠༠༩ ལོ་ནས་ད་བར་བོད་མི་ ༡༥༧ གྱིས་རང་ལུས་མེར་སྲེག་བཏང་སྐོར་གསུངས།
གཞན་ཡང་བཀའ་བློན་མཆོག་གིས་བོད་རྒྱ་འབྲེལ་མོལ་གྱི་བརྒྱུད་རིམ་སྐོར་གསུང་དོན། ཕྱི་ལོ་ ༢༠༠༡ ལོར་ཡུ་རོབ་གྲོས་ཚོགས་ནས། རྒྱ་ནག་གཞུང་གིས་གལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་པའི་བཙན་བྱོལ་བོད་མིའི་སྐུ་ཚབ་དང་ལྷན་བོད་རྒྱའི་དཀའ་རྙོག་སེལ་ཐབས་ཆེད་སྐད་ཆ་མ་བཤད་པ་ཡིན་ན། ཡུ་རོབ་གྲོས་ཚོགས་ཀྱིས་བཙན་བྱོལ་བོད་གཞུང་ངོས་འཛིན་བྱ་རྒྱུ་ཡིན་པའི་ཉེན་བརྡ་བཏང་ཡོད། གནོན་ཤུགས་དེ་ལྟ་བུའི་འོག་ནས་རྒྱ་ནག་གཞུང་གིས་ཕྱི་ལོ་ ༢༠༠༢ ལོར་བོད་རྒྱ་འབྲེལ་མོལ་འགོ་འཛུགས་བྱས་ཡོད་སྐོར་གསུངས།
དེ་བཞིན་བཙན་བྱོལ་བོད་མི་རྣམས་སྐྱབས་བཅོལ་བའི་གནས་སྟངས་འོག་རྒྱལ་ཁབ་འདྲ་མིན་ནང་གནས་ཡོད་སྟབས། ཡུལ་མི་དང་མི་འདྲ་བར་སྐབས་རེ་ཡིག་ཆའི་ཐོག་ནས་དཀའ་ངལ་འཕྲད་བཞིན་པའི་གནས་སྟངས་སྐོར་གསུང་སྐབས་བོད་དོན་རྒྱབ་སྐྱོར་ཚོགས་མི་ཚོས་གང་ཐུབ་རོགས་རམ་གནང་རྒྱུའི་རྣམ་འགྱུར་གསལ་འདོན་གནང་ཡོད། 
ལྷན་འཛོམས་སྐབས་འཇར་མན་གྲོས་ཚོགས་འཐུས་མི་ལྕམ་སྐུ་ས་བྷི་ནེ་ཌིཌ་མར་ (Sabine (SPD) ལགས་དངོས་སུ་བཅར་ཐུབ་མེད་ཀྱང་བོད་དོན་རྒྱབ་སྐྱོར་དང་གདུང་སེམས་མཉམ་སྐྱེའི་ཕྱག་བྲིས་ཤིག་གནང་བ་དེ་སྒྲོགས་སྦྱང་གནང་འདུག རྒྱབ་སྐྱོར་བ་ཞིག་གི་དྲི་བར་ལན་འདེབས་དང་སྦྲགས། རྒྱ་གར་ཆབ་སྲིད་ཚོགས་པ་ (Samajwadi Party) མགྲིན་ཚབ་པ་སྐུ་ཞབས་གྷན་ཤྱམ་ཏི་ཝ་རི་ (Ghanshyam Tiwari) ལགས་ཀྱིས་བོད་དོན་ཐོག་རྒྱ་གར་ཆབ་སྲིད་ཚོགས་པ་ཚང་མས་ཁ་གཅིག་གྲག་ཐོག་ནས་རྒྱབ་སྐྱོར་གྱི་ལངས་ཕྱོགས་འཛིན་བཞིན་ཡོད་པ་གསུངས།
དེ་ཡང་ཝེས་ཊར་ཊལྜ་ (Westerwald) ས་གནས་བོད་དོན་རྒྱབ་སྐྱོར་ཚོགས་པའི་ལས་འཆར་ལྟར་ན། འབྱུང་འགྱུར་ཕྱི་ཟླ་ ༣ ཚེས་ ༡༠ ཉིན་འཇར་མན་གྱི་ས་གནས་ཁག་ལྔ་བརྒྱ་ཙམ་གྱི་ནང་རྒྱལ་དར་ཉིན་མོ་ (Flag Day) སྲུང་བརྩི་ཞུ་ཆེད་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་ཡིན་པ་བཀའ་བློན་མཆོག་ལ་སྙན་གསན་ཞུས་སོང་། སྤྱིར་ཝེས་ཊར་ཊལྜ་ (Westerwald) ས་གནས་བོད་དོན་རྒྱབ་སྐྱོར་ཚོགས་པ་དེ་བཞིན་ཕྱི་ལོ་ ༢༠༠༨ ལོར་གསར་འཛུགས་གནང་བ་ཞིག་ཡིན་འདུག
