༄༅། །ཕྱི་ལོ་ ༢༠༢༥ ཟླ་བ་ ༡ ཚེས་ ༨ ཉིན་གྱི་ཕྱི་དྲོ་ཆུ་ཚོད་ ༣།༣༠ ཐོག་ཐའེ་ཝན་བོད་ཀྱི་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་དང་། དྲུང་ཆེ་མི་འགྱུར་གཡུ་སྒྲོན་ལགས། ལས་ཁུངས་ལས་བྱེད་བཅས་ནས་ཐའེ་ཝན་ངལ་རྩོལ་ལྷན་ཁང་གི་བློན་ཆེན་གསར་པ་སྐུ་ཞབས་ཧུང་ཧྲིན་ཧན་ (HUNG SUN HAN) མཆོག་གི་ལས་ཁུངས་སུ་ངོ་བཅར་གྱིས་བོད་མི་མང་སྤྱི་འཐུས་ལྷན་ཚོགས་ཀྱི་འཚམས་འཕྲིན་ཕུལ་ཏེ་བོད་མི་མང་སྤྱི་འཐུས་ལྷན་ཚོགས་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ཁོང་ལ་ཐའེ་ཝན་ངལ་རྩོལ་ལྷན་ཁང་གི་བློན་ཆེན་དུ་བསྐོ་གཞག་གནང་པར་འཚམས་འདྲི་དང་སྦྲགས་ངལ་རྩོལ་ལྷན་ཁང་གི་མ་འོངས་ལས་དོན་ཐ་དག་ལམ་ལྷོངས་ཡོང་བའི་བཀྲ་ཤིས་སྨོན་འདུན་ཞུས་གནང་ཡོད། སྐུ་ཞབས་ཧུང་ཧྲིན་ཧན་ (HUNG Sun Han) མཆོག་ནས་དེ་སྔ་ཐའེ་ཝན་གྲོས་ཚོགས་སྐབས་བཅུ་པའི་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་དང་། སྐབས་བཅུ་གཅིག་པའི་ཚོགས་གཙོས་འགན་འཁུར་ཞུས་ཡོད། མཇལ་འཕྲད་ཞུས་པའི་སྐབས་སུ་བོད་དིང་རི་རྫོང་ཁུལ་གཙོས་པའི་གཡས་གཡོན་དུ་ས་ཡོམ་གིས་གོད་ཆག་བྱུང་བའི་གནས་ཚུལ་འགྲེལ་བརྗོད་གསལ་བཤད་ཞུས།གཞན་ཡང་ཕྱི་ལོ་ ༢༠༢༥ ཟླ་བ་ ༡ ཚེས་ ༨ ཉིན་གུང་ཆུ་ཚོད་ ༡ ནས་ ༢ བར་ཐའེ་ཝན་གཞུང་ཁོངས་མིན་པའི་ཚོགས་པའི་ལས་ཁུངས་སུ་ཐའེ་ཝན་སྐུ་ཚབ་དོན་གཅོད་དབུས་ཞུགས་ཀྱིས་རིང་མིན་གསུམ་བཅུ་དུས་དྲན་སྲུང་བརྩི་ཞུ་ཕྱོགས་དང་འབྲེལ་གྲ་སྒྲིག་ཚོགས་འདུ་ཞིག་ཚོགས་གནང་ཡོད། ཚོགས་འདུའི་ཐོག་ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༨ དང་། དེ་བཞིན་ཕྱི་ལོ་ ༢༠༢༥ ཟླ་བ་ ༡ ཚེས་ ༡ རེས་གཟའ་ལྷག་པ་བཅས་སུ་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་སུ་སྐུ་ཚབ་དོན་གཅོད་དབུས་ཞུགས་ཐོག་ཐའེ་སྡོད་བོད་རིགས་ཚོགས་པའི་ཚོགས་གཙོ་དང་ཚོགས་གཞོན། རྒྱུན་ལས་བཅས་ལྷན་འཛོམས་ཀྱིས་ཕྱི་ལོ་ ༢༠༢༥ ལོའི་གསུམ་བཅུ་དུས་དྲན་སྲུང་བརྩི་ཞུས་ཕྱོགས་ཐད་ལ་གོ་བསྡུར་ཐག་གཅོད་ཇི་བྱུང་གཞིར་བཞག་གིས་ཕྱི་ལོ་ ༢༠༢༥ ལོའི་གསུམ་བཅུ་དུས་དྲན་གྱི་བརྗོད་གཞི་དང་གསར་འགོད་གསལ་བསྒྲགས། འཕྲད་དར་གྱི་འབོད་ཚིག་ལ་སོགས་བོད་དིང་རི་རྫོང་ཁུལ་གྱི་ས་ཡོམ་བྱུང་རྐྱེན་དང་འབྲེལ་བའི་གནད་དོན་ཇི་ལྟར་འཇོག་དགོས་མིན། གཞན་ལས་འགུལ་སྐབས་སུ་སྐུ་མགྲོན་སྣེ་ལེན་ཞུ་ཕྱོགས་བཅས་ཀྱི་ཐད་གོ་བསྡུར་རིམ་པར་ཞུས་ཡོད། །