༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༠༨ ཉིན་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཡ་མ་ཏ་ནི་ཨེ་རི་ཀོ་ལགས་ཉི་འོང་སྐུ་ཚབ་དོན་ཁང་དུ་ཆེད་ཕེབས་ཀྱིས་བོད་ནང་དུ་ས་ཡོམ་ཕོག་པའི་ཡིད་སྐྱོའི་གནས་ཚུལ་ཐོན་པར་གདུང་སེམས་མཉམ་སྐྱེད་གནང་བ་དང་འབྲེལ་ས་ཁུལ་དེར་མི་རྒྱུ་ཟོག་གསུམ་ལ་གྱོང་གུན་ཆེན་པོ་བྱུང་བར་བློ་ཕམ་དང་། བོད་ནང་གི་གནས་སྟངས་གང་མྱུར་དྲག་སྐྱེད་ཡོང་བའི་སྨོན་ལམ་གནང་ཡོད།
སྐབས་དེར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྕམ་སྐུ་ཡ་མ་ཏ་ནི་ལགས་ནས་གདུང་སེམས་མཉམ་སྐྱེད་གནང་བར་ཐུགས་རྗེ་ཆེ་ཞུས་པ་དང་། སྤྱི་ཚོགས་དྲྭ་ལམ་ཁག་ནས་བསྡུ་རུབ་བྱས་པའི་པར་རིས་དང་སྦྲགས་གནོད་འཚེ་ཕོག་པའི་ས་ཁུལ་གྱི་གནས་སྟངས་སྐོར་འགྲེལ་བརྗོད་གནང་ཡོད། ཁོང་གིས་ས་ཡོམ་བྱུང་རྐྱེན་གཙོ་བོ་དེ་རྒྱ་ནག་གིས་བོད་ནང་དུ་ཆུ་རགས་བཟོ་བསྐྲུན་གྱི་ལས་གཞི་ཡིན་སྲིད་པ་དང་། ལྷག་པར་བོད་ནས་རྒྱ་གར་དང་། བཱངྒ་ལ་དེཤ་བཅས་སུ་འབབ་པའི་ཡར་ཀླུང་གཙང་པོའི་ཐོག་རྒྱ་ནག་གིས་བྱེད་བཞིན་པའི་ལས་གཞི་དེ་དག་གིས་ཡིན་སྲིད་པའི་སྐོར་གསུངས་ཡོད། དེ་མིན་ཚན་རིག་པ་ཚོས་ཕྱི་ལོ་ ༢༠༡༠ ལོར་མཚོ་སྔོན་སྐྱེ་རྒུ་མདོར་ས་ཡོམ་རྐྱེན་པས་མི་གྲངས་ ༣༠༠༠ ཙམ་གྱི་ཚེ་སྲོག་ཤོར་ཡོད་པ་དེ་ཡང་ས་གནས་དེ་དག་ཏུ་རྒྱ་ནག་གིས་ཆུ་རགས་བཟོ་བསྐྲུན་དང་། གཏེར་ཁ་སྔོག་འདོན་གྱི་བྱེད་སྒོ་ཤུགས་ཆེ་རུ་བཏང་བ་དེས་ཡིན་པར་ངོས་འཛིན་བྱེད་ཀྱི་ཡོད།
ལྕམ་སྐུ་ཡ་མ་ཏ་ནི་ཨེ་རི་ཀོ་ལགས་དང་། སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་རྣམ་གཉིས་ནས་བོད་ནང་གི་གནས་སྟངས་དང་། རྒྱ་ནག་གི་མི་སེར་སྤེལ་ཡུལ་གཏན་འཇགས་སློབ་གྲྭ དེ་བཞིན་ཆོས་དད་རང་དབང་གི་གནས་བབ་སོགས་ཀྱི་སྐོར་གྲོས་བསྡུར་མུ་མཐུད་གནང་ཡོད། སྐབས་དེར་ཁོང་མོའི་ལྷན་དུ་དྲུང་ཡིག་ཧ་ཡ་མི་ཛཱུ་ལགས་དང་། ཝ་ཏ་ན་བྷི་ལགས་གཉིས་ལྷན་བཅར་ཞུས་ཡོད་པ་རེད། གཞན་ཡང་གཙུག་ལག་སློབ་གཉེར་ཁང་གི་སློབ་ཕྲུག་ཁག་ཅིག་ཉི་འོང་སྐུ་ཚབ་དོན་ཁང་དུ་ཕེབས་ཏེ་ལྕམ་སྐུ་ཡ་མ་ཏ་ནི་ལགས་དང་ལྷན་བོད་དོན་ཐོག་གླེང་མོལ་གནང་བའི་གནས་ཚུལ་ཞིག་ཉི་འོང་གི་གསར་ཁང་ (Sankei Shinbum) ནང་དུ་འདོན་སྤེལ་གནང་ཡོད།
ཕྱི་ལོ་ ༢༠༢༥ ཟླ་བ་ ༠༡ ཚེས་ ༧ ཉིན་གྱི་སྔ་དྲོ་བོད་དིང་རི་རྫོང་གི་ས་ཁུལ་དུ་ས་ཡོམ་ཤུགས་ཚད་ ༧.༡ ཅན་ཞིག་བྱུང་སྟེ་གཏོར་བཤིག་དང་གནོད་སྐྱོན་ཚབས་ཆེན་བྱུང་ཡོད། གནས་ཚུལ་དེ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་གསོ་སྩལ་ཡོད་པ་དང་། རྒྱ་གར་ལྷོ་ཕྱོགས་བཀྲ་ཤིས་ལྷུན་པོ་དགོན་དུ་གནོད་འཚེ་ཕོག་པ་རྣམས་ཀྱི་ཆེད་དམིགས་གསལ་སྨོན་ལམ་གསུང་འདོན་གནང་རྒྱུ་ཡིན་པ་རེད། དེ་བཞིན་བོད་མིའི་སྒྲིག་འཛུགས་ངོས་ནས་གཞུང་འབྲེལ་མཆོད་འབུལ་སྨོན་ལམ་ཞིག་གོ་སྒྲིག་གནང་ཡོད་པ་དང་། ཉི་འོང་སྐུ་ཚབ་དོན་གཅོད་ནས་ཀྱང་གང་མྱུར་སྨོན་ལམ་ཞིག་གོ་སྒྲིག་ཞུ་རྒྱུ་ཡིན་པ་བཅས།།
