༄༅། །ཕྱི་ལོ་ ༢༠༢༥ ཟླ་བ་ ༠༡ ཚེས་ ༢༤ ཉིན་རྒྱ་གར་ཨ་རུ་ཎཱ་ཅལ་མངའ་སྡེའི་གྲོང་ཁྲེར་ཨི་ཊ་ན་གར་དུ་ཡོད་པའི་རྡོ་རྗེ་མཁའ་འགྲོ་ཚོགས་ཁང་དུ་ཁོར་ཡུག་དང་བདེ་འཇགས་ཞེས་པའི་བགྲོ་གླེང་ཚོགས་འདུ་ཚོགས་ཡོད་པ་རེད། སྐབས་དེར་བློན་ཆེན་ཁག་དང་། གྲོས་ཚོགས་འཐུས་མི། བློན་ཆེན་ཟུར་པ། ཨི་ཊ་ན་གར་གྲོང་སྡེ་ལས་ཁུངས་ཀྱི་ཚོགས་མི། དེ་བཞིན་ཨ་རུ་ཎཱ་ཅལ་ཚོ་ཁག་གི་སྐུ་ཚབ་སོགས་ཁྱོན་ཚོགས་ཞུགས་པ་ ༧༠༠ ལྷག་ཕེབས་ཞུགས་གནང་ཡོད།
དེ་ཡང་ཚོགས་འདུའི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་དང་། དམིགས་བསལ་སྐུ་མགྲོན་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕེབས་ཞུགས་གནང་ཞིང་། ཐོག་མར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་ཏ་པིར་གྷའོ་མཆོག་ནས་ཕེབས་བསུའི་གསུང་བཤད་གནང་སྐབས་བགྲོ་གླེང་ཚོགས་འདུའི་དགོས་དམིགས་དང་། རྒྱ་ནག་གིས་བོད་ནང་སྟངས་འཛིན་ལོག་པ་རྐྱེན་གྱིས་བོད་ཙམ་མ་ཟད། རྒྱ་གར་གི་ཁོར་ཡུག་དང་བདེ་འཇགས་ལ་གནོད་སྐྱོན་ཕོག་སྲིད་པའི་སྐོར་གསལ་སྟོན་གནང་ཡོད། དེ་ནས་ཨ་རུ་ཎཱ་ཅལ་མངའ་སྡེའི་གྲོས་ཚོགས་འཐུས་མི་ཟུར་པ་སྐུ་ཞབས་རིན་ཆེན་མཁའ་འགྲོ་ཁེར་མེ་ལགས་ཀྱིས་ཚོགས་པའི་དགོས་དམིགས་དང་སྦྲགས། རྒྱ་གར་དང་བོད་བར་གྱི་ལོ་རྒྱུས་དང་རིག་གཞུང་གི་འབྲེལ་བའི་སྐོར་གསུང་བཤད་གནང་། དེ་མཚུངས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་། དམིགས་ཡུལ་སོགས་ཀྱི་ངོ་སྤྲོད་དང་། རྒྱ་གར་དང་བོད་དབར་གྱི་ལོ་རྒྱུས་ཐོག་གི་འབྲེལ་བའི་སྐོར་འགྲེལ་བརྗོད་གནང་ཡོད། ཁོང་གིས་ས་ཁུལ་འདིའི་ཐུན་མོང་གི་ཁོར་ཡུག་དང་རིག་གཞུང་གི་ཤུལ་བཞག་སྲུང་སྐྱོབ་ཆེད་རྒྱ་གར་གྱིས་འཕྲལ་དུ་བྱེད་སྒོ་སྤེལ་དགོས་པའི་གལ་གནད་དང་། བོད་ཀྱི་ཁོར་ཡུག་ཉམས་ཆག་འགྲོ་བཞིན་པ་དང་དེས་རྒྱ་གར་གྱི་བདེ་འཇགས་ལ་ཤུགས་རྐྱེན་ཐེབས་པའི་སྐོར་སེམས་འཚབ་གནང་ཡོད།
དེ་རྗེས་ཨ་རུ་ཎཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་བོད་དང་ཨ་རུ་ཎཱ་ཅལ་མངའ་སྡེའི་དབར་གྱི་ཁོར་ཡུག་དང་ས་ཁམས་སྣོད་བཅུད་ཀྱི་འབྲེལ་བའི་སྐོར་ནན་བརྗོད་དང་སྦྲགས། ཨ་རུ་ཎཱ་ཅལ་མངའ་སྡེའི་ས་མཚམས་སིམ་ལ་ཆིངས་ཡིག་འོག་གཏན་འབེབས་བྱས་པའི་ལོ་རྒྱུས་ཀྱི་རྨང་གཞི་དང་། རྒྱ་ནག་གི་བཙན་འཛུལ་སྲིད་བྱུས་ལ་སེམས་འཚབ་གནང་ཡོད། སྐུ་ཞབས་པདྨ་མཁའ་འགྲོ་མཆོག་གིས་རྒྱ་གར་གྱི་ས་མཚམས་དེ་བོད་དང་འབྲེལ་བ་ཡོད་པ་ལས་རྒྱ་ནག་དང་འབྲེལ་མེད་པའི་གསལ་བཤད་གནང་བ་དང་། རྒྱ་ནག་གིས་བོད་ས་དྲག་ཤུགས་ཀྱིས་བཙན་བཟུང་བྱས་པར་སྐྱོན་བརྗོད་གནང་བ་མ་ཟད། རྒྱ་ནག་གིས་ཡར་རྒྱས་ཀྱི་མིང་ཐོག་ནས་བོད་ཀྱི་རིག་གཞུང་རྩ་མེད་གཏོང་བཞིན་པར་སྐྱོན་བརྗོད་གནང་ཡོད། ཚོགས་འདུའི་མཐར་ཨ་རུ་ཎཱ་ཅལ་མངའ་སྡེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཏར་ཏ་རག་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་མཇུག་བསྒྲིལ་ཡོད།
ཉིན་རྒྱབ་ཀྱི་ཚོགས་ཐུན་དེར་ར་ཇིབ་གྷན་དྷི་གཙུག་ལག་སློབ་གཉེར་ཁང་གི་དཔོན་གཞོན་པ་སྐུ་ཞབས་མོཇི་རི་བྷ་ལགས་ཀྱིས་གཙོ་སྐྱོང་གནང་ཡོད་ཅིང་། དེའི་ནང་བོད་དོན་ཉམས་ཞིབ་པ་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་བི་ཇེ་ཀ་རན་ཏི་ལགས་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྣམ་གཉིས་ཀྱིས་གསུང་བཤད་གནང་ཡོད།
དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་བོད་དེ་ཨེ་ཤི་ཡའི་ཆུ་མཛོད་ཡིན་པའི་སྐོར་ཞིབ་ཕྲའི་ངོ་སྤྲོད་གནང་བ་དང་། རྒྱ་ནག་གིས་ཆུ་མཛོད་གསར་རྒྱག་གི་ལས་གཞིའི་རྐྱེན་པས་བོད་ཀྱི་ཁོར་ཡུག་ཉམས་ཆག་འགྲོ་བཞིན་པའི་གནད་དོན་འཕྲལ་དུ་སེལ་དགོས་པ་དང་། དེས་ཨ་རུ་ཎཱ་ཅལ་མངའ་སྡེའི་ས་བབ་ཆབ་སྲིད་བདེ་འཇགས་ལ་ཤུགས་རྐྱེན་ཐེབས་པའི་སྐོར་ནན་བརྗོད་གནང་ཡོད། ཚོགས་ཐུན་དེའི་མཇུག་ཏུ་ཚོགས་བཅར་བ་རྣམས་ཀྱིས་དཔལ་ལྡན་སྲིད་སྐྱོང་མཆོག་དང་སྐུ་ཞབས་བི་ཇེ་ཀ་རན་ཏི་ལགས་སུ་ཐད་ཀར་དྲི་བ་ཞུ་རྒྱུ་དང་། གནད་དོན་གལ་ཆེན་ཁག་གི་ཐོག་བགྲོ་གླེང་བྱ་རྒྱུ་གོ་སྐབས་ཐོབ་ཡོད།
སྐབས་དེར་བོད་ཀྱི་འགྲེམས་སྟོན་ཁང་གི་གོ་སྒྲིག་འོག་འཕགས་བོད་གཉིས་དབར་གནའ་དེང་གི་འབྲེལ་ལམ་འཕེལ་རྒྱས་འགྲོ་ཚུལ་སྐོར་འགྲེམས་སྟོན་གནང་ཡོད། གཞན་ཡང་བགྲོ་གླེང་ཚོགས་འདུ་དེར་འཕགས་བོད་འབྲེལ་མཐུད་ལས་ཁང་ནས་རྒྱ་གར་དང་བོད་དབར་གྱི་འབྲེལ་ལམ་གོང་འཕེལ་གཏོང་བ་མ་ཟད། ཚོགས་ཞུགས་པ་རྣམས་ལ་བོད་དོན་དང་། བོད་དོན་ཐོག་རྒྱ་གར་གི་དབུ་ཁྲིད་རྣམ་པའི་དགོངས་ཚུལ་གྱི་དེབ་རིགས་འགྲེམས་སྤེལ་གནང་ཡོད། དེ་བཞིན་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས་ཀྱིས་སྐུ་མགྲོན་རྣམས་ལ་རྒྱ་གར་དང་བོད་དབར་གྱི་འབྲེལ་བ་རྒྱུན་གནས་མཚོན་པའི་དྲན་རྟེན་ཕྱག་རྟགས་ཕུལ་ཡོད། མཐར་བོད་དོན་རྒྱབ་སྐྱོར་ཚོགས་པའི་ཚོགས་གཞོན་སྐུ་ཞབས་སུ་རེན་དྲ་ཀུ་མར་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་བགྲོ་གླེང་ལེགས་པར་མཇུག་བསྒྲིལ་ཡོད། །
