༄༅། །ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བདེའི་དེད་དཔོན་༸གོང་ས་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག བོད་ལུགས་ལྟར་ན་དགུང་གྲངས་དགུ་བཅུར་ཕེབས་པའི་སྐུའི་གོ་སྟོན་དང་སྐུ་ཚེ་༸ཞབས་པད་མི་འགྱུར་རྡོ་རྗེའི་ཁམས་སུ་བརྟན་པར་བཞུགས་པའི་ཞབས་རིམ། སྤྱི་སྒེར་བསོད་ནམས་ཀྱི་ཚོགས་གོང་མཐོར་སྤེལ་བའི་ཆེད་དང་ཐུགས་དགྱེས་པའི་མཆོད་སྤྲིན་དུ་དམིགས་ནས། རྒྱ་བལ་ཁུལ་སོགས་ཕྱི་རྒྱལ་ཡུལ་གྲུ་ཁག་མི་འདྲ་བ་བཅུ་དྲུག་ཙམ་ནས་ཀིརྟི་ཚང་དང་དམིགས་བསལ་འབྲེལ་ཡོད་དང་། གདན་ས་གསུམ་སོགས་ནས་འབྲེལ་ཡོད་བླ་སྤྲུལ་དགེ་འདུན་པ་དང་། ཀིརྟིའི་བྱེས་པ་གྲྭ་ཚང་། ཀིརྟིའི་བྱེས་པ་གྲྭ་ཚང་གི་གྲྭ་ཟུར་མཐུན་ཚོགས་ཀྱིས་གཙོས་པའི་སེར་སྐྱ་ཕོ་མོ་གང་མང་རྡོ་རྗེ་གདན་ཀིརྟིའི་སྒར་བསམ་ཡས་གླིང་དུ་ལྷན་འཛོམས་ཐོག ཀིརྟིའི་བྱེས་པ་གྲྭ་ཚང་དུ་གཞུང་ཆེན་བཀའ་པོད་ལྔའི་བསླབ་པ་མཐར་སོན་པའི་དགེ་བཤེས་དམ་འཇོག་དང་འབྲེལ་རྗེའི་མཛད་ཆེན་བཞིའི་ཡ་གྱལ་སྨོན་ལམ་ཆེན་མོ་འཕར་མ་ཕྱི་ལོ་ ༢༠༢༥ ཟླབ་་ ༡ ཚེས་ ༧ ཉིན་རྒྱབ་འཚོགས།
ཕྱི་ཚེས་ ༨ ནས་ ༡༠ བར་ཀིརྟིའི་དགོན་ཁག་ཏུ་གནའ་རབས་ཚོགས་སྲོལ་ཡོད་པ་ཇི་བཞིན་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ པ་ཁྲི་ཟུར་རིན་པོ་ཆེ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དབུ་བཞུགས་ཐོག ཉིན་གསུམ་རིང་ཞོགས་པ་ཆུ་ཚོད་ ༦:༣༠ ནས་དགོང་མོའི་ཆུ་ཚོད་ ༨།༠༠ བར་རློན་ཚོགས་གསུམ་དང་། གཞུང་ཆེན་བཀའ་པོད་ལྔའི་དམ་བཅའ་ཁག་གསུམ། སྐམ་ཚོགས་གཅིག་བཅས་འཚོགས་པ་མ་ཟད། སྨོན་ལམ་སྐམ་ཚོགས་ཐ་མའི་ཉིན་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཟུར་རིན་པོ་ཆེ་མཆོག་དང་འབྲས་སྤུངས་བློ་གསལ་གླིང་གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་དང་མཁན་ཟུར་རྣམ་གཉིས། ༸སྐྱབས་རྗེ་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་དབུས་འབྲས་བློ་གླིང་གྲྭ་ཚང་གི་བླ་སྤྲུལ་རྣམ་པ་བཅས་སྨོན་ལམ་ཆེན་མོའི་ཚོགས་མགོན་དུ་ཕེབས།
ཕྱི་ཚེས་ ༡༡ ཉིན་བཀའ་དྲིན་རྗེས་དྲན་གྱི་གཟེངས་རྟགས་འབུལ་བཞེས་ཀྱི་མཛད་སྒོ་བསྐྱངས་པའི་དབུ་བཞུགས་སུ་དགའ་ལྡན་ཁྲི་ཟུར་རིན་པོ་ཆེ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང་། ༸སྐྱབས་རྗེ་ཁྲི་ཟུར་མཁས་དབང་སློབ་དཔོན་ཟམ་གདོན་རིན་པོ་ཆེ་མཆོག འབྲས་བློ་གླིང་གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་དགེ་བཤེས་ཡེ་ཤེས་ལྷུན་གྲུབ་མཆོག་དང་། འབྲས་བློ་གླིང་མཁན་ཟུར་དགེ་བཤེས་བསམ་གཏན་མཆོག དཔལ་ལྡན་དགའ་ལྡན་ཕོ་བྲང་གི་སྐུ་ཚབ་སྐུ་སྒེར་དྲུང་ཆེ་བློ་བཟང་སྦྱིན་པ་ལགས། བོད་མིའི་སྒྲིག་འཛུགས་དཔལ་ལྡན་སྲིད་སྐྱོང་དང་ཆོས་རིག་བཀའ་བློན་གྱི་སྐུ་ཚབ་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་སོགས་ཀྱིས་གཙོས་པའི་སྐུ་མགྲོན་དང་འབྲེལ་ཡོད་སེར་སྐྱ་མི་མང་རྣམས་ལྷན་འཛོམས་ཐོག སྤྱི་ནོར་༸གོང་ས་༸རྒྱལ་བའི་དབང་པོར་བཀའ་དྲིན་རྗེས་དྲན་གྱི་མཛད་སྒོ་བསྐྱངས་པར་ཆོས་རིག་དྲུང་ཆེ་བདུད་འདུལ་རྡོ་རྗེ་ལགས་ནས་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་སྟེ་ཁྲི་ཟུར་རིན་པོ་ཆེ་མཆོག་ལ་མཎྜལ་རྟེན་གསུམ་འདེགས་འབུལ་དང་འབྲེལ་བཀའ་དྲིན་རྗེས་དྲན་གྱི་གསོལ་འདེབས་༸སྙན་ཞུ་སོགས་འབུལ་ལམ་ཞུས།།
