༄༅། །འདི་གར་ཨིན་ལེན་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༢ ཚེས་ ༠༡ རེས་གཟའ་ཉི་མའི་ཉིན་ཨིན་ལེན་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ཨིན་ཇིའི་རྒྱལ་ས་ལོན་ཌོན་དུ་བཅའ་སྡོད་བྱེད་པའི་བོད་ཕྲུག་རྣམས་ལ་བོད་ཡིག་གཙོས་བོད་པའི་ཐུན་མོང་མ་ཡིན་པའི་རིག་གཞུང་དང་རྒྱལ་རབས་སོགས་སློབ་ཁྲིད་གནང་སླད་གཟའ་མཇུག་སློབ་གྲྭ་ཞིག་ཡོད་པ་དེར་འཚམས་གཟིགས་སུ་ཕེབས་ཡོད།
ཨིན་ལེན་སྐུ་ཚབ་དོན་ཁང་གི་ཐད་ཀའི་སྟངས་འཛིན་འོག་ཡོད་པའི་གཟའ་མཇུག་སློབ་གྲྭའི་འབྲེལ་ཡོད་ལས་བྱེད་དོན་ཁང་གི་དྲུང་ལས་བསྟན་འཛིན་མཛེས་ལྡན་ལགས་ནས་སློབ་གྲྭའི་ལོ་རྒྱུས་སྙིང་བསྡུས་སྙན་གསན་ཞུས་རྗེས། སློབ་དགེ་རྣམས་དང་། ཕ་མའི་ཚོགས་ཆུང་། དེ་བཞིན་པོ་ཏ་ལ། ལྷ་ས། ཡུམ་བུ་བླ་མཁར་དང་ནོར་གླིང་། སྒྲ་བརྙན་འཛིན་གྲྭ་བཅས་ཀྱི་འཛིན་གྲྭ་སོ་སོ་ངོ་སྤྲོད་གནང་བ་དང་ཆབས་ཅིག་གཟིགས་སྐོར་དུ་གདན་ཞུ་གནང་ཡོད།
སྐུ་ཚབ་དོན་གཅོད་ཀྱིས་འཛིན་གྲྭ་ཚང་མར་སྐར་ ༡༥ རེ་རྟོག་ཞིབ་གནང་མཚམས་སློབ་ཕྲུག་རྣམས་ལ་བོད་སྐད་སྐྱོན་དགོས་པ་དང་། སོ་སོའི་ཕ་ཡུལ་ངོ་མ་དེ་བོད་ཡིན་པ་སོགས་ངོ་སྤྲོད་དང་སློབ་གསོ་གནང་ཡོད། དེ་ནས་ཕ་མའི་ཚོགས་ཆུང་གཙོས་འབྲེལ་ཡོད་ཕ་མ་རྣམས་ལ་སོ་སོའི་ནང་ལ་བོད་སྐད་ངེས་པར་དུ་རྒྱག་དགོས་པ་དང་། དེ་ལྟར་གནང་བར་དུས་ཚོད་དང་འགྲོ་གྲོན་སོགས་གང་ཡང་དགོས་མེད་པར་ལས་སླ་པོའི་ཐོག་གནང་རྒྱུ་ཡོད་པ་དེ་ལྷོད་ཡངས་མེད་པར་དམ་ཟབ་གནང་དགོས། ང་ཚོ་བོད་མི་ཚོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཆེན་པོ་ཡོད་པ་ཁ་ཙམ་མིན་པར་ལག་ལེན་ཐོག་ངེས་པར་སྟོན་དགོས། ཕྱི་རྒྱལ་དུ་ཡོད་པའི་གཟའ་མཇུག་སློབ་གྲྭ་རྣམས་ནི་བོད་ཀྱི་སྐད་ཡིག་སྲུང་སྐྱོབ་གནང་མཁན་སྒྲིག་འཛུགས་གལ་འགངས་ཆེན་པོ་ཞིག་ཡིན་པར་སོང་། སློབ་གྲྭ་རྒྱུན་གནས་ཡོང་རྒྱུར་ཕ་མ་ཚོས་སློབ་ཕྲུག་གང་མང་མུ་མཐུད་གཏང་རྒྱུ་ཤིན་ཏུ་གལ་ཆེན་པོ་ཡིན་སྐོར་བཅས་གསུངས།
དེ་ནས་སློབ་གྲྭའི་དགེ་རྒན་ལྷན་དུ་བཞུགས་མོལ་གནང་སྐབས། དགེ་རྒན་རྣམས་ནས་སོ་སོ་ངོ་སྤྲོད་དང་སྦྲགས་སློབ་ཁྲིད་གནང་རྒྱུ་དཀའ་ལས་ཁག་པོ་ཡོད་པ་དེ་ལྟར་ཡང་། ཉེ་ཆར་དྷ་སར་དབྱར་ཁའི་སློབ་ཁྲིད་སྐབས་ཨིན་ལེན་ནས་ཡིན་པའི་སློབ་ཕྲུག་རྣམས་ཀྱི་བོད་ཀྱི་སྐད་ཡིག་གི་ཤེས་ཚད་གང་ལེགས་ཡོད་འདུག་པའི་སྐོར་ཐོས་དུས་གྲུབ་འབྲས་བཟང་པོ་ཞིག་ཐོན་གྱི་ཡོད་པ་ཤེས་ནས་རང་བཞིན་གྱིས་སེམས་ཤུགས་སླེབས་ཀྱི་འདུག་སྐོར་གསུངས།
དེ་རྗེས་སྐུ་ཚབ་དོན་གཅོད་ནས། དགེ་རྒན་རྣམས་ནས་སོ་སོའི་ལས་ཞོར་དུ་སྤྱི་སེམས་བཅངས་ནས་བོད་ཡིག་སློབ་ཁྲིད་གནང་བ་ནི་རླབས་ཆེན་གྱི་བྱ་གཞག་ཡིན་པས་བསྔགས་བརྗོད་དང་ཐུགས་རྗེ་ཆེ་ཞུས་གནང་བ་དང་སྦྲགས། ད་ཕན་བོད་ཀྱི་ལོ་རྒྱུས་ནང་ཧ་ལམ་བྱུང་མྱོང་མེད་པའི་སོ་སོའི་སྐད་ཡིག་འཆི་གསོན་གྱི་གནས་ལ་ཐུགས་ཡོད་པའི་གཉན་འཕྲང་ཅན་གྱི་དུས་ཚོད་འདི་ལྟ་བུར་སྐད་ཡིག་སྲུང་སྐྱོབ་ཀྱི་ལས་ལ་ཞུགས་པ་ནི་ལོ་རྒྱུས་ནང་གི་བྱས་རྗེས་ཡིན་པ་དང་། ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་མཐོ་བོར་ཕེབས་དུས་ང་ཚོས་སྔར་ལྷག་སེམས་ཤུགས་དང་འགན་འཁུར་བྱེད་པའི་ཐོག་ནས་༸རྒྱལ་བའི་དགོངས་བཞེད་སྒྲུབ་ཐུབ་པའི་འབད་བརྩོན་རྒྱུན་འཁྱོངས་གནང་བ་མ་ཟད། སོ་སོའི་སྤྲུན་གྲོགས་རྣམས་ལའང་རང་ནུས་གང་ལྕོགས་ཀྱིས་སྤྱི་དོན་བྱེད་དགོས་པའི་སྐུལ་མ་གནང་རོགས་སོགས་གསུངས།
དེ་ནས་ཕ་མའི་ཚོགས་ཆུང་གི་ཚོགས་མི་མཁྱེན་རབས་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སོང་བ་བཅས།།
