༄༅། །ཨིན་ཡུལ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་ཨིན་ཡུལ་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ ༣༥ འཁོར་བའི་དུས་ཆེན་སྲུང་བརྩིའི་མཛད་སྒོར་ཨིན་ཡུལ་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ལྷན་ཞུགས་གནང་ཡོད།
དེ་ཡང་དུས་ཆེན་མཛད་སྒོའི་ཐོག་བོད་མི་དང་། བོད་དོན་རྒྱབ་སྐྱོར་བ་སོགས་མཉམ་ཞུགས་གནང་ཐོག་སྐུ་ཚབ་དོན་གཅོད་ཚེ་རིང་དབྱངས་སྐྱིད་ལགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཚེ་ཧྲིལ་པོ་འགྲོ་བ་མིའི་བདེ་དོན་ཐོག་ཐུགས་ཁུར་མཛད་འགན་བཞེས་པར་བཀའ་དྲིན་རྗེས་དྲན་ཞུས་པ་དང་སྦྲགས། བོད་མི་རྣམས་ནས་བོད་དོན་བསྟན་པ་ཆབ་སྲིད་ཐོག་ནུས་པ་མཉམ་སྤུངས་ཞུས་ཏེ་འགན་ཁུར་དགོས་པའི་ལམ་སྟོན་གནང་བ་མ་ཟད། ལྷག་པར་བོད་མི་གཞོན་སྐྱེས་ཚོས་བོད་ཀྱི་ཆོས་དང་རིག་གཞུང་ལ་དོ་སྣང་དང་སློབ་སྦྱོང་གནང་དགོས་པའི་རེ་སྐུལ་གནང་ཡོད་པ་རེད།
གཞན་ཡང་སྐུ་མགྲོན་དུ་ཕེབས་པའི་དཔལ་ས་སྐྱ་པའི་འཁོན་གདུང་ཨ་སངྒ་བཛྲ་རིན་པོ་ཆེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་ལམ་སྟོན་ཇི་ཕེབས་བོད་མི་དང་མགོན་པོ་མཆོག་གི་རྗེས་འཇུག་གདུལ་བྱ་རྣམས་ནས་ཉམས་ལེན་གནང་དགོས་པའི་ལམ་སྟོན་གནང་རྗེས་རིན་པོ་ཆེ་ནས་ཨིན་ཡུལ་སྐུ་ཚབ་དོན་གཅོད་ཟུར་པ་ཕར་སི་བསོད་ནམས་ཚེ་རིང་ལགས་དང་། ཨིན་ཡུལ་བོད་རིགས་སྤྱི་མཐུན་ཚོགས་པའི་ལས་ཁྱུར་ཚོགས་མི་རྣམས་ལ་ཕྱག་འཁྱེར་སྩལ་ཡོད།
ཆེ་བསྟོད་སྐུ་མགྲོན་ (Royal Borough of Greenwich) གྲོང་སྡེའི་སྤྱི་ཁྱབ་སྐུ་ཞབས་ཇིཊ་ར་ན་བྷཊ་ (Jit Ranabhat) ལགས་ནས་ས་གནས་སུ་བོད་མིའི་སྤྱི་ཚོགས་ནས་ལེགས་སྐྱེས་གང་ལེགས་འབུལ་ཡོད་པ་མ་ཟད། གྲོང་སྡེའི་སྤྱི་ཁྱབ་ནས་ཕྱི་ལོ་ ༢༠༢༥ ཟླ་བ་ ༠༣ ནང་གྲོང་སྡེའི་ལས་ཁུངས་སུ་བོད་ཀྱི་རྒྱལ་དར་སྒྲེང་འཛུགས་མཛད་སྒོར་ཚོགས་བཅར་བ་རྣམས་མགྲོན་འབོད་གནང་ཡོད། དེ་བཞིན་ཨིན་ཡུལ་བོད་རིགས་སྤྱི་མཐུན་ཚོགས་པའི་ཚོགས་གཙོ་ཕུན་ཚོགས་ནོར་བུ་ལགས་ཀྱིས་སྤྱི་མཐུན་ཚོགས་པའི་ཚོགས་མི་གསར་པ་རྣམ་པ་ངོ་སྤྲོད་དང་སྦྲགས། སྤྱི་མཐུན་ཚོགས་པའི་ངོས་ནས་བོད་དོན་དྲིལ་བསྒྲགས་དང་ཞུ་གཏུག་ལས་དོན་ཐོག་འབད་རྩོལ་མུ་མཐུད་གནང་རྒྱུའི་ནན་བརྗོད་གནང་བ་མ་ཟད། ཡོང་འགྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་སྲུང་བརྩི་ཞུ་ཕྱོགས་ཐེ་བའི་འབྱུང་འགྱུར་ལས་གཞི་ཁག་གི་སྐོར་ངོ་སྤྲོད་གནང་ཡོད་པ་རེད།
གཞན་ཡང་མཛད་སྒོའི་ཐོག་བོད་ཀྱི་རིག་གཞུང་འཁྲབ་སྟོན་དང་། སྒོར་གཞས། དུས་ཆེན་དང་འབྲེལ་བའི་འདྲི་གླེང་འགྲན་བསྡུར་སོགས་གོ་སྒྲིག་ཞུས་ཡོད་པ་བཅས།། 
