༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༩ ཉིན་ཨ་རིའི་སྲིད་འཛིན་ཟུར་པ་སྐུ་ཞབས་ཇིམྨི་ཀ་ཊར་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༣༠ ཉིན་སྲིད་འཛིན་ཟུར་པའི་བུ་ཅིཔ་ཀ་ཊར་ལགས་ཀྱི་མཚན་ཐོག་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན། སྲིད་འཛིན་ཟུར་པ་ཀ་ཊར་མཆོག་གིས་དོན་སྙིང་ལྡན་པའི་མི་ཚེ་སྐྱེལ་ཡོད། ཁོང་གིས་ལོ་ངོ་བཅུ་ཕྲག་མང་པོའི་རིང་དབུལ་ཕོངས་དང་ཉམ་ཐག་ལ་རོགས་རམ་གནང་བ་མ་ཟད། རྩོད་རྙོག་ཁག་ཞི་བའི་ལམ་ནས་སེལ་ཐབས་དང་། འཛམ་གླིང་ཁྱོན་ཡོངས་སུ་མང་གཙོ་དང་འགྲོ་བ་མིའི་ཐོབ་ཐང་གོང་མཐོར་གཏོང་ཆེད་འབད་བརྩོན་རྒྱུན་མི་ཆད་པ་གནང་ཡོད།
ཁོང་གིས་ལོ་མང་པོའི་རིང་གཞན་ཕན་གྱི་ལས་དོན་ཐོག་མུ་མཐུད་ཧུར་བརྩོན་གནང་བ་དེས་ང་ཚོ་ཚང་མར་གཞན་ཕན་གྱི་མི་ཚེ་ཇི་ལྟར་སྐྱེལ་དགོས་པའི་མིག་དཔེ་བཟང་པོ་བསྟན་ཡོད། ཕྱི་ལོ་ ༢༠༠༢ ལོར་ནོ་སྦེལ་ཞི་བདེའི་གཟེངས་རྟགས་ཚོགས་ཆུང་ནས་ཁོང་གིས་འགྲོ་བ་མིའི་བདེ་དོན་ཆེད་མཛད་རྗེས་ལ་ངོས་འཛིན་གནང་བའི་ཐོག་ཁོང་ལ་ནོ་སྦེལ་ཞེ་བདེའི་གཟེངས་རྟགས་ཕུལ་ཡོད། ཅེས་དང་།
དེ་བཞིན་སྲིད་འཛིན་ཟུར་པ་ཀ་ཊར་མཆོག་གིས་བོད་ཀྱི་གནས་སྟངས་ཐོག་ཐུགས་སྣང་དང་ཐུགས་ཁུར་ཆེན་པོ་གནང་བ་དང་། བོད་མིའི་དཀའ་སྡུག་སེལ་ཐབས་སུ་ལས་འགུལ་སྤེལ་གནང་བར་ངོས་རང་དང་། བོད་མི་རྣམས་ནས་རྟག་ཏུ་བཀའ་དྲིན་རྗེས་དྲན་ཞུ་བཞིན་ཡོད། །
