༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་ཕོ་བྲང་དུ་རྒྱུད་སྟོད་གྲྭ་ཚང་དུ་ཆོས་ཐོག་འགྲིམ་བཞིན་པའི་དགེ་བཤེས་ཞལ་གྲངས་ ༡༠༧ ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ནས་འཛམ་གླིང་ས་ཕྱོགས་གང་ས་ནས་ཕེབས་པའི་མི་རིགས་སྣ་ཚོགས་ཀྱི་དད་ལྡན་མཇལ་བཅར་བ་བརྒྱ་ཕྲག་གསུམ་བརྒལ་བར་མཇལ་ཁ་བཀའ་དྲིན་སྩལ་སྐབས་རྒྱུད་སྟོད་གྲྭ་ཚང་དུ་ཆོས་ཐོག་འགྲིམ་བཞིན་པའི་དགེ་བཤེས་ཚོར་བཀའ་སློབ་སྩལ་དོན། རིས་མེད་ཀྱི་ཆོས་ལུགས་ཚང་མར་གུས་ཞབས་བྱེད་པའི་ལུང་པ་ཞིག་རེད། ངོས་རང་ལ་ཆ་བཞག་ན་ནང་པའི་དགེ་སློང་ཞིག་དང་། རྒྱ་གར་གཞུང་གིས་མཐོང་དང་ཡིད་ཆེས་ཧ་ཅང་ཡག་པོ་བྱེད་ཀྱི་འདུག ང་ཚོ་རྒྱ་གར་དུ་བསྡད་དེ་རིས་སུ་མ་ཆད་པའི་ཆོས་སྡེ་ནས་སློབ་སྦྱོང་བྱེད་ཐུབ་པ་དང་། སློབ་སྦྱོང་བྱས་པ་ལག་ལེན་ཏུ་བསྐྱལ་ནས་བསླབ་པ་གསུམ་གྱི་ཉམས་ལེན་ཡག་པོ་བྱས་ཏེ་ལམ་རིམ་ལ་སྦྱར་བ་དང་། སྐྱེས་བུ་གསུམ་གྱི་ལམ་གྱི་འགྲོ་སྟངས་ལ་དོ་སྣང་ཡག་པོའི་ཐོག་སོ་སོའི་རྒྱུད་ལ་སྦྱར་བ་ཡིན་ན་མི་ལུས་ཐོབ་པ་གོ་ཆོད་པ་རེད། དཔེར་ན། ངོས་རང་ལ་མཚོན་ན་ཟི་ལིང་ནས་ཡོང་བ་རེད། གཙོ་བོ་ཡོངས་འཛིན་རྣམ་པ་གཉིས་ཀྱི་ཞབས་ལ་གཏུགས་ན་ལམ་རིམ་དགའ་རབ་རྒྱུས་ཡོད་ཆགས་ཡོད། རྒྱུས་ཡོད་པ་དེ་ཉིན་རེ་བཞིན་ཞོགས་པ་ཡར་ལངས་པ་དང་ཆ་ཚང་ཞིག་སྒོམ་གྱི་ཡོད། མི་ཚེ་དོན་དང་ལྡན་པ་ཞིག་ཡོང་གི་འདུག
ལམ་རིམ་གྱི་བསམ་བློ་ཏོག་ཙམ་བཏང་ཡོང་སྐབས་རྐྱེན་ངན་གྲོགས་ལ་ཤར་བ་ཞིག་རེད། རྐྱེན་ངན་འདྲ་མིན་འཆར་ཡོང་སྐབས་ཁོང་ཁྲོ་ཟ་བ་དང་། ང་རྒྱལ་སྐྱེས་པ་ལྟ་བུ་མེད་པར་ཁོང་ཁྲོ་སྐྱེས་པའི་སྐབས་སུ་ཁོང་ཁྲོ་ཟ་སའི་ཡུལ་ལ་བརྩེ་བའི་ཡུལ་དང་། སྙིང་རྗེ་སྒོམ་པ་ལྟ་བུ་ཧ་ཅང་ཡག་པོ་འདུག ཤེས་བཞིན་དུ་ཁོང་ཁྲོ་སློང་མཁན་ཡོང་སྐབས་སུ་བཟོད་པའི་ཉམས་ལེན་བྱེད་དུས། ཁོང་ཁྲོ་སློང་མཁན་མེད་ན་བཟོད་པ་སྒོམ་རྒྱུ་མེད། ཁོང་ཁྲོ་སློང་མཁན་དེ་བཟོད་པ་སྒོམ་པའི་གྲོགས་ཆགས་འདུག དཔེར་ན། རྒྱ་མིས་བོད་པར་སྡུག་པོ་བཏང་ཡོང་སྐབས་ཁོང་ཁྲོ་ཟས་ནས་བསྡད་ཚེ་ཞེ་སྡང་འཕར་རྒྱུ་མ་གཏོགས་གཞན་མེད། རྒྱ་རིགས་ཆོས་གྲོགས་ཚོར་སྙིང་རྗེ་སྒོམ་པ་དང་། བཟོད་པའི་བློ་སྐྱེས་སྐབས་སོ་སོའི་སེམས་ལ་ཞི་བདེ་སླེབས་པ་ཞིག་དང་། རིམ་བཞིན་ངོ་ཤེས་པ་ཚོར་སེམས་ཀྱི་ཞི་བདེ་སྒྲུབ་ཐབས་བཤད་དུས་མི་ལ་ཕན་གྱི་འདུག དེ་ལྟར་ཡིན། བཀྲ་ཤིས་བདེ་ལེགས། ཞེས་བཀའ་སློབ་སྩལ་ཡོད། །
