༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༥ འཁོར་བའི་དུས་དྲན་གྱི་གཞུང་འབྲེལ་མཛད་སྒོའི་སྐུ་མགྲོན་ནིའུ་ཛི་ལེནྜ་གྲོས་ཚོགས་འཐུས་་མི་སྐུ་ཞབས་ཇོ་སིབ་མུ་ནི་ (Joseph Mooney) མཆོག་དང་། ལྕམ་ཨིང་གྲིཌ་ལི་རི་ (Ingrid Leary) མཆོག ལྕམ་ཧེ་ལེན་ཝ་ཧིཊ་ (Helen White) མཆོག ཕི་ཇི་གྲོས་ཚོགས་འཐུས་མི་སྐུ་ཞབས་རི་ནེཤ་ཤར་མ་ (Rinesh Sharma) མཆོག་བཅས་ལས་གྲུབ་པའི་སྐུ་ཚབ་ཚོགས་ཆུང་ནས་གསར་འགོད་ལྷན་ཚོགས་ཤིག་སྤེལ་ཡོད།དེ་ཡང་ཐོག་མར་ནིའུ་ཛི་ལེནྜ་གྲོས་ཚོགས་འཐུས་མི་སྐུ་ཞབས་ཇོ་སིབ་མུ་ནི་མཆོག་གིས་ནིའུ་ཛི་ལེནྜ་དང་། ཕི་ཇི་གྲོས་ཚོགས་འཐུས་མི་རྣམས་བཞུགས་སྒར་དུ་ཕེབས་པ་ཐེངས་དང་པོ་ཆགས་ཀྱི་ཡོད་པ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༥ འཁོར་བའི་མཛད་སྒོར་ལྷན་ཞུགས་བྱ་རྒྱུ་བྱུང་བར་དགའ་ཚོར་ཆེན་པོ་བྱུང་ཚུལ་དང་། མཛད་སྒོ་འདི་གལ་ཆེན་པོ་ཞིག་ལ་ངོས་འཛིན་ཞུ་གི་ཡོད་པ་གསུངས། དེ་ནས་ཕི་ཇི་གྲོས་ཚོགས་འཐུས་མི་སྐུ་ཞབས་རི་ནེཤ་མཆོག་གིས་ཕི་ཇིའི་གྲོས་ཚོགས་འཐུས་མི་ཞིག་བཞུགས་སྒར་དུ་ཕེབས་པ་ཐོག་མར་ཆགས་ཀྱི་ཡོད་པ་མ་ཟད། བཞུགས་སྒར་དུ་ཕེབས་ཏེ་བོད་པའི་རིག་གཞུང་དང་གོམས་སྲོལ་བཅས་ཀྱི་སྐོར་རྒྱུས་ལོན་བྱ་རྒྱུ་གོ་སྐབས་བཟང་པོ་ཐོབ་ཡོད་པ་དང་། ཕི་ཇི་རྒྱལ་ཁབས་དང་བོད་མིའི་སྒྲིག་འཛུགས་བར་ཟམ་པ་ལྟ་བུའི་བརྒྱུད་ལམ་ཞིག་བསྐྲུན་རྒྱུ་འབད་བརྩོན་བྱ་རྒྱུ་ཡིན་ཞེས་གསུངས།
དེ་རྗེས་གསར་འགོད་པ་ཁག་ཅིག་གིས་མ་འོངས་པར་ནིའུ་ཛི་ལེནྜ་དང་ཕི་ཇིའི་གྲོས་ཚོགས་འཐུས་མི་གཞན་རྣམས་ཕེབས་འཆར་ཡོད་མེད་སྐོར་དྲི་སྐབས་སྐུ་ཞབས་ཇོ་སིབ་མུ་ནི་མཆོག་གིས་དེར་རང་ངོས་ནས་གྲོས་ཚོགས་འཐུས་མི་གཞན་ལ་བཞུགས་སྒར་དུ་ཕེབས་རྒྱུའི་སྐུལ་མ་གཏོང་རྒྱུ་ཡིན་པ་དང་། ནིའུ་ཛི་ལེནྜ་མི་མང་རྣམས་ནས་ཀྱང་བོད་དང་བོད་མིའི་གནད་དོན་སྐོར་དོ་སྣང་གནང་གི་ཡོད་པ་གསུངས་གྲུབ་མཚམས་གྲོས་ཚོགས་འཐུས་མི་ལྕམ་ཨིང་གྲིཌ་ལི་རི་མཆོག་གིས་སྐུ་ཞབས་ཇོ་སིབ་མཆོག་དང་ངོས་གཉིས་ཁ་གཏད་ཀྱི་ཚོགས་པ་ཡིན་ཡང་ཐེངས་འདིར་བཞུགས་སྒར་དུ་ལྷན་དུ་ཕེབས་པ་དེ་བོད་དོན་ཐོག་གདུང་སེམས་མཉམ་སྐྱེ་གཅིག་མཚུངས་ཡོད་པ་ཞིག་མཚོན་གྱི་ཡོད། ངས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བརྩི་ཡོད་ལ་ད་ལྟའི་མཉན་འཕྲང་ཆེ་བའི་དུས་ཚོད་འདིར་འགྲོ་བ་མིའི་ཐོབ་ཐང་གལ་གནད་ཆེན་པོ་ཡིན་པ་ངོས་འཛིན་ཞུ་ཡི་ཡོད་ཅེས་གསུངས།
དེ་ནས་སྐུ་ཞབས་མུ་ནི་མཆོག་གིས་དེང་སྐབས་རྒྱ་ནག་དང་ནིའུ་ཛི་ལེནྜ་དབར་གྱི་འབྲེལ་བ་ཡག་པོ་ཡོད་ཀྱང་ནིའུ་ཛི་ལེནྜ་རྒྱལ་ཁབ་ནས་རྒྱུན་དུ་འགྲོ་བ་མིའི་ཐོབ་ཐང་ཐོག་ལངས་ཕྱོགས་གསལ་པོ་ཡོད་ཅེས་དང་། གྲོས་ཚོགས་འཐུས་མི་ལྕམ་ཧེ་ལེན་མཆོག་གིས་འགྲོ་བ་མིའི་ཐོབ་ཐང་དང་། ཕྲུ་གུ་རྣམས་བཅའ་སྡོད་སློབ་གྲྭར་བཙན་དབང་གིས་འཇུག་པའི་གནས་སྟངས་ཐོག་སེམས་འཚབ་ཡོད་པ་མ་ཟད། གནད་དོན་དེ་དག་ཐོག་གྲོས་མོལ་གང་ཐུབ་གནང་རྒྱུ་གལ་ཆེན་པོ་ཡིན། དེ་བཞིན་ངའི་ལས་འགན་གཙོ་བོ་དེ་ནིའུ་ཛི་ལེནྜ་དུ་འབྱོར་སྐབས་ངས་གནས་ཚུལ་ཤེས་རྟོགས་བྱུང་བ་རྣམས་གྲོས་ཚོགས་འཐུས་མི་དང་མང་ཚོགས་ལ་གོ་རྟོགས་སྤེལ་རྒྱུ་དེ་ཆགས་ཡོད་ཅེས་གསུངས། ཕྱོགས་མཚུངས་སྐུ་ཞབས་རི་ནེཤ་མཆོག་ནས་ཀྱང་བོད་ནང་གི་ཛ་དྲག་གནས་སྟངས་དེ་ཕི་ཇི་གྲོས་ཚོགས་སུ་གླེང་རྒྱུ་ཡིན་པ་དང་། མ་འོངས་པར་བོད་དང་ཕི་ཇི་བར་གྲོས་མོལ་གྱི་གོ་སྐབས་གང་མང་ཡོང་བའི་རེ་བ་ཡོད་པ་གསུངས།
གཞན་ཡང་གྲོས་ཚོགས་འཐུས་མི་རྣམས་ནས་རྒྱ་ནག་གཞུང་ལ་བརྡ་ལན་གང་ཕུལ་འཆར་ཡོད་མེད་སྐོར་དྲི་སྐབས་ལྕམ་ཨིང་གྲིཌ་མཆོག་གིས་ང་ཚོ་འདིར་གྲོས་ཚོགས་འཐུས་མི་ཞིག་གི་ངོས་ནས་བཅར་ཡིན་པ་ལས་རྒྱལ་ཁབ་ཀྱི་གཞུང་གི་ཚབ་ཞུས་ཏེ་བཅར་བ་མིན། དེ་ཡང་ང་ཚོ་བཞུགས་སྒར་དུ་དེ་རིང་ལྟ་བུ་ཉིན་མོ་གལ་ཆེན་ཞིག་ཏུ་བཅར་བ་འདིས་བརྡ་ལན་གསལ་པོ་ཞིག་སྤྲོད་ཀྱི་ཡོད་པ་ངོས་འཛིན་བྱེད་ཀྱི་ཡོད་པ་དང་། རང་ཉིད་སྒེར་གྱི་ཆ་ནས་འགྲོ་བ་མིའི་ཐོབ་ཐང་གི་གནད་དོན་ཐོག་དོ་སྣང་ཡོད་མཁན་ཞིག་ཡིན་པ་མ་ཟད། མ་འོངས་པར་བོད་མིའི་སྒྲིག་འཛུགས་དང་ལྷན་དུ་མུ་མཐུད་འབྲེལ་ལམ་གོང་མཐོར་གཏོང་རྒྱུར་འབད་བརྩོན་བྱ་རྒྱུ་ཞེས་གསུངས་ཡོད་བཅས།།
