༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༤ ཉིན་སུད་སི་གྲོང་ཁྱེར་ཛུ་རིག་ཏུ་སུད་སི་དང་བླངས་བོད་དོན་ཞུ་གཏུག་ལས་འགུལ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་གྲགས་ཆེ་བའི་ནོ་སྦེལ་ཞི་བདེ་གཟེངས་རྟགས་འབུལ་ལམ་མཛད་ནས་ལོ་ངོ་ ༣༥ འཁོར་བའི་དུས་དྲན་གྱི་ཉིན་མོ་དང་སྟབས་བསྟུན་ནས་བོད་དོན་གོ་རྟོགས་སྤེལ་ཡོད།
དེ་ཡང་དང་བླངས་ཞུ་གཏུག་པ་རྣམས་ནས་བོད་ནང་གི་ཛ་དྲག་གནས་སྟངས་སྐོར་གོ་རྟོགས་དང་། གཞོན་སྐྱེས་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན། དེ་བཞིན་དང་བླངས་བོད་དོན་ཞུ་གཏུག་ལས་འགུལ་སྐོར་གོ་རྟོགས་སྤེལ་ཡོད། སྐབས་དེར་བོད་པའི་གཞོན་སྐྱེས་རྣམས་ལ་འདྲི་རྩེད་དང་། རི་མོའི་འགྲན་བསྡུར་བརྒྱུད་ནས་བོད་ནང་གི་གནས་སྟངས་སྐོར་གོ་རྟོགས་སྤེལ་བ་མ་ཟད། གཞོན་སྐྱེས་རྣམས་ཀྱི་བསམ་བློའི་ནུས་པ་དང་། གསར་གཏོད་ཀྱི་ནུས་པ་གོང་མཐོར་གཏོང་བར་ཕན་ཐོགས་བྱུང་ཡོད།
གཞན་ཡང་གཞོན་སྐྱེས་ཁྲོད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བྱམས་བརྩེ་དང་། ཞི་བདེ། མཐུན་སྒྲིལ་བཅས་ཀྱི་དགོངས་གཞི་བཟང་པོ་རྣམས་ཁྱབ་སྤེལ་ཆེད་མགོན་གང་ཉིད་ཀྱི་བཀའ་སློབ་དང་། སྐུ་པར་ཅན་གྱི་ཕྱག་དེབ་འགྲེམས་སྤེལ་གནང་ཡོད།
མཛད་སྒོ་འདི་བརྒྱུད་གཙོ་བོ་ཚོགས་ཞུགས་པ་རྣམས་ལ་བོད་ནང་གི་གནས་སྟངས་དང་། རྒྱལ་སྤྱིའི་སྟེང་བོད་ཀྱི་འཐབ་རྩོད་ཡུན་གནས་ཐུབ་པར་དང་བླངས་བོད་དོན་ཞུ་གཏུག་གི་ལས་འགན་སྐོར་ངོ་སྤྲོད་གནང་ཐུབ་ཡོད་པ་བཅས།།
