༄༅། །ཕྱི་ལོ་ ༢༠༢༤ ཟླ་ ༡༡ ཚེས་ ༢༦ ནས་ ༢༩ བར་ཉིན་བཞི་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་རྒྱ་གར་བྱང་ཕྱོགས་ཁུལ་དུ་བོད་པའི་སློབ་ཕྲུག་རྣམས་ལ་སློབ་ཡོན་གོ་རྟོགས་ཀྱི་ལས་གཞི་སྤེལ་ཡོད།དེ་ཡང་ལས་གཞི་འདི་བརྒྱུད་བོད་པའི་སློབ་ཕྲུག་རྣམས་ལ་ཤེས་རིག་ལས་ཁུངས་ཀྱི་སློབ་ཡོན་སྐོར་གོ་རྟོགས་དང་། ད་ལྟ་ཤེས་རིག་སློབ་ཡོན་བཞེས་མཁན་སློབ་ཕྲུག་རྣམས་ཀྱི་གནས་སྟངས། དེ་བཞིན་མ་འོངས་ཡར་རྒྱས་གཏོང་ཕྱོགས་སྐོར་རྒྱུས་ལོན་ཞུ་རྒྱུ་ཡིན་པ་རེད།
ཤེས་རིག་སློབ་ཡོན་ཚན་པའི་འགན་འཛིན་བསོད་ནམས་བཟང་མོ་ལགས་དང་། འབྲེལ་ཡོད་ལས་བྱེད་བསོད་ནམས་ཆོས་སྒྲོན་ལགས་རྣམ་གཉིས་ནས་རྒྱ་གར་བྱང་ཕྱོགས་སུ་ཡོད་པའི་ཇ་ལནདྷར་དང་། ཅན་དྷི་གྷར། སྡེ་ར་ལྡུན། དེ་བཞིན་བོད་ཁྱིམ་བཟོ་རིག་སྒྱུ་རྩལ་སློབ་གཉེར་བསྟི་གནས་ཁང་བཅས་སུ་བོད་པའི་སློབ་ཕྲུག་མང་པོ་སློབ་སྦྱོང་བྱེད་བཞིན་ཡོད་པས་ས་གནས་དེ་དག་ལ་དམིགས་ནས་ལས་རིམ་གོ་སྒྲིག་གནང་ཡོད།
ཤེས་རིག་སློབ་ཡོན་གོ་རྟོགས་ཀྱི་ལས་གཞི་དེ་བརྒྱུད་མཐོ་སློབ་ཁག་ཏུ་ཡོད་པའི་བོད་པའི་སློབ་ཕྲུག་རྣམས་ལ་སློབ་ཡོན་ལས་གཞི་དང་། སློབ་ཡོན་ཕུལ་ཕྱོགས་ཀྱི་ཆ་རྐྱེན། སྙན་ཞུ་འབུལ་བའི་རིམ་པ། དེའི་ཕན་ཡོན་བཅས་ཀྱི་སྐོར་གོ་རྟོགས་སྤེལ་ཡོད།
དེ་ཡང་ལས་གཞི་དེའི་ནང་མཉམ་ཞུགས་གནང་མཁན་ (Lovely Professional University) གློག་ཀླད་རིག་པའི་ (BCA) སློབ་མ་བསྟན་འཛིན་ཆོས་རབ་ལགས་ཀྱིས་ཤེས་རིག་ལས་ཁུངས་ཀྱི་སློབ་ཡོན་འོག་ངའི་སློབ་གྲོགས་མང་པོ་ཞིག་ལ་དཔལ་འབྱོར་གྱི་དཀའ་ངལ་མེད་པའི་ཐོག་ནས་སློབ་སྦྱོང་བྱ་རྒྱུའི་གོ་སྐབས་ཐོབ་ཡོད་ཅེས་དང་། པན་ཇབ་གཙུག་ལག་ཁང་དུ་གཙུག་ལག་རབ་འབྱམས་གནང་བཞིན་པ་ཀུན་བཟང་ལྷ་མོ་ལགས་ཀྱིས་ང་འདྲ་བའི་སྤྱི་ཚོགས་གཞན་དུ་སློབ་སྦྱོང་བྱེད་མཁན་བོད་སློབ་ཕྲུག་རྣམས་ལ་དེ་འདྲ་བའི་གོ་རྟོགས་ཀྱི་ལས་རིམ་དེ་ཕན་ཐོགས་ཆེན་པོ་འདུག་ཅེས་གསུངས་ཡོད།
ལས་གཞི་དེར་བོད་མིའི་དོན་གྲུབ་གླིང་སློབ་གྲྭ་དང་། བོད་ཁྱིམ་བཟོ་རིག་སྒྱུ་རྩལ་སློབ་གཉེར་བསྟི་གནས་ཁང་། སངས་རྒྱས་སྨན་ལྷ་ཐེབས་རྩ་བཅས་ཚོགས་པ་འདྲ་མིན་དང་། ས་གནས་གཞོན་ནུ་ལྷན་ཚོགས་ཀྱི་ཚོགས་མི་ཁག་ཅིག གཞན་ཡང་མི་སྒེར་ཁག་ཅིག་ནས་རྒྱབ་སྐྱོར་གནང་ཡོད།
སློབ་ཡོན་གོ་རྟོགས་ཀྱི་ལས་གཞི་འདི་ནི་ཕྱི་ལོ་ ༢༠༢༣ ལོར་རྒྱ་གར་ལྷོ་ཕྱོགས་སུ་དབུ་འཛུགས་གནང་ཞིང་། འདི་ལོའི་ཕྱི་ཟླ་ ༡༡ ནས་རྒྱ་གར་བྱང་ཕྱོགས་ཁུལ་དུ་ལས་རིམ་ཐེངས་གཉིས་པ་དེ་སྤེལ་ཡོད། ལས་གཞི་འདི་བརྒྱུད་ཤེས་རིག་ལས་ཁུངས་ནས་བོད་པའི་སློབ་ཕྲུག་རྣམས་ལ་ཤེས་ཡོན་གྱི་གོ་སྐབས་བསྐྲུན་རྒྱུ་དང་། སློབ་ཕྲུག་དང་ཐད་ཀར་འབྲེལ་གཏུག་བྱས་ཏེ་སློབ་ཡོན་ཞུ་ཕྱོགས་སྐོར་དགོས་ངེས་ལམ་སྟོན་གནང་ཡོད་པ་བཅས།།
