༄༅། །ཕྱི་ལོ་ ༢༠༢༤ ཟླ་ ༡༢ ཚེས་ ༡༠ ཉིན་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་རྒྱ་ནག་ཏུ་ཡོད་པའི་ཡུ་རོབ་མཐུན་ཚོགས་ཀྱི་ངོས་ནས་འཛམ་གླིང་གི་འགྲོ་བ་མིའི་ཐོབ་ཐང་སྲུང་སྐྱོབ་སླད་བསྒྲགས་གཏམ་ཞིག་སྤེལ་ཡོད། བསྒྲགས་གཏམ་དེའི་ནང་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་གཞིན་པའི་གནས་སྟངས་དང་། ལྷག་པར་བོད་ནང་གི་གནས་སྟངས་ལ་དམིགས་ཏེ་ཡུ་རོབ་མཐུན་ཚོགས་ནས་སྤྱི་དམངས་དང་། རིག་གཞུང་། ཆབ་སྲིད་ཀྱི་རང་དབང་ཉམས་རྒུད་འགྲོ་བཞིན་པའི་གནས་སྟངས་ལ་ཐུགས་འཚབ་ཆེན་པོ་ཡོད་པ་གསལ་སྟོན་གནང་ཡོད།
དེ་ཡང་ཡུ་རོབ་མཐུན་ཚོགས་ནས་རྒྱ་ནག་གིས་བོད་ནང་དུ་སྨྲ་བརྗོད་དང་། འདུ་འཛོམས། འགྲོ་འོང་གི་རང་དབང་བཅས་ཀྱི་ཐད་དམ་བསྒྲགས་ཆེན་པོ་བྱེད་བཞིན་པ་ནན་བརྗོད་གནང་བ་མ་ཟད། བོད་མི་ཚོར་ཕྱི་སྐྱོད་ལག་འཁྱེར་སྤྲོད་རྒྱུར་དམ་བསྒྲགས་དང་། བླ་སྤྲུལ་ཁག་གི་འགྲོ་འོང་ལ་དམ་བསྒྲགས་བྱེད་བཞིན་པས་བོད་མི་ཚོར་རྒྱལ་སྤྱིའི་ནང་འགྲོ་འོང་བྱ་རྒྱུར་ཚད་འཛིན་བྱེད་བཞིན་ཡོད་པ་གསལ་སྟོན་གནང་ཡོད།
དེ་བཞིན་ཡུ་རོབ་མཐུན་ཚོགས་ནས་རྒྱ་ནག་གཞུང་གིས་བོད་ནང་ཆོས་ཕྱོགས་ཀྱི་རང་དབང་ཐོག་དྲག་གནོན་དང་། བོད་བརྒྱུད་ནང་བསྟན་གྱི་ཆོས་ཕྱོགས་ཁག་རྒྱ་ནག་གཞུང་གི་ལྟ་གྲུབ་དང་མཐུན་པའི་ཐོག་བྱེད་སྒོ་སྤེལ་དགོས་པ་སོགས་ཚོད་འཛིན་བྱེད་བཞིན་པའི་ཐོག་ཐུགས་འཚབ་བསྟན་ཡོད།
བསྒྲགས་གཏམ་དེས་རྒྱ་ནག་གཞུང་གིས་བོད་ནང་གི་བོད་ཕྲུག་ཚོར་ཕ་མ་དང་ཁ་བྲལ་བཏང་བ་དང་། མི་རིགས་བཙན་བསྒྱུར་གྱི་གཏན་འཇགས་སློབ་གྲྭ་ཁག་བཙུགས་པ་དེས་བོད་ཀྱི་ངོ་བོ་དང་། སྐད་ཡིག་སྲུང་སྐྱོབ་ལ་ཉེན་ཁ་ཆེན་པོ་ཞིག་ལ་ངོས་འཛིན་གནང་བ་དང་སྦྲགས། བོད་ཀྱི་སྐད་ཡིག་དང་རིག་གཞུང་སྦྱོང་ས་མགོ་ལོག་འཇིགས་མེད་རྒྱལ་མཚན་ལགས་ཀྱི་སློབ་གྲྭ་ལྟ་བུ་བཙན་དབང་གིས་སྒོ་བརྒྱབ་པ་དང་། སློབ་གྲྭ་ཁག་ཏུ་རྒྱ་ཡིག་སློབ་གསོ་གཏོང་བཞིན་པ་དེས་བོད་ཀྱི་རིག་གཞུང་རྩ་མེད་བཟོ་བཞིན་པ་གསལ་སྟོན་གནང་ཡོད།
དེ་མཚུངས་རྒྱ་ནག་གཞུང་གིས་དྲང་བདེན་གྱི་ཁྲིམས་ཞིབ་དང་། ཞི་བའི་སྒོ་ནས་བོད་མིའི་ཐོབ་ཐང་དང་རང་དབང་རྩོད་ལེན་བྱས་པར་འཛིན་བཟུང་བྱས་པའི་བོད་མི་ཆབ་སྲིད་བཙོན་པ་བྱ་བྲལ་རིན་པོ་ཆེ་དང་། ཨ་ཉག་སེང་སྒྲ་ལགས། སྒོ་ཤེས་རབ་རྒྱ་མཚོ་ལགས། མགོ་ལོག་དཔལ་ལྡན་ལགས། སེམས་སྐྱིད་སྒྲོལ་མ་ལགས། བཀྲ་ཤིས་རྡོ་རྗེ་ལགས་བཅས་ལ་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་གློད་བཀྲོལ་དགོས་པའི་ནན་བརྗོད་གནང་ཡོད།
ཡུ་རོབ་མཐུན་ཚོགས་ནས་བོད་ནང་གི་གནས་སྟངས་ཐོག་ལྟ་ཞིབ་དང་གྲོས་མོལ་གོང་འཕེལ་གཏོང་ཆེད་འབྲེལ་ཡོད་མི་སྣ་དང་ཚོགས་སྡེ་ཁག་ནས་བོད་ནང་ཕེབས་རྒྱུར་སྐུལ་མ་གནང་སྟེ་རྒྱལ་སྤྱིའི་ཐོག་ནས་བོད་ཀྱི་གནད་དོན་ལ་དོ་སྣང་གནང་རྒྱུ་གལ་ཆེན་པོ་ཡིན་པ་ནན་བརྗོད་གནང་ཡོད། དེ་ཡང་ཕྱི་ལོ་ ༢༠༢༤ ཟླ་བ་ ༦ པའི་ནང་ཡུ་རོབ་མཐུན་ཚོགས་དང་རྒྱ་ནག་དབར་འགྲོ་བ་མིའི་ཐོབ་ཐང་གི་གྲོས་མོལ་ཐེངས་ ༣༩ པ་གནང་སྐབས་བོད་ནང་གཟིགས་སྐོར་དུ་ཕེབས་ཡོད་པ་དེས་ཡུ་རོབ་མཐུན་ཚོགས་ནས་མུ་མཐུད་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་གླེང་སློང་གནང་རྒྱུར་དོ་སྣང་ཆེན་པོ་གནང་བཞིན་པ་མཚོན་གྱི་ཡོད།
ཐེངས་འདིའི་ ༢༠༢༤ ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་ཡུ་རོབ་མཐུན་ཚོགས་ངོས་ནས་བསྒྲགས་གཏམ་སྤེལ་བ་དེས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་མུ་མཐུད་དོ་སྣང་ཡོད་པ་མཚོན་གྱི་ཡོད། ཚོགས་ཆུང་གིས་རྒྱ་ནག་གིས་བོད་མིའི་ཐོབ་ཐང་ལ་བརྩི་བཀུར་དང་སྲུང་སྐྱོབ་བྱེད་དགོས་པ་དང་། རིག་གཞུང་སྲུང་སྐྱོབ། ཆོས་དད་རང་དབང་། སྨྲ་བརྗོད་རང་དབང་གི་ཐོབ་ཐང་བཅས་ཀྱི་གལ་གནད་ལ་ནན་བརྗོད་གནང་ཡོད། ཡུ་རོབ་མཐུན་ཚོགས་ནས་རྒྱ་ནག་ངོས་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ལམ་ལུགས་དང་བསྟུན་དགོས་པ་དང་། བོད་མི་ཚོར་རང་གི་ཆོས་དང་རིག་གཞུང་རྒྱུན་འཛིན་བྱེད་ཐུབ་པའི་ཁོར་ཡུག་བསྐྲུན་དགོས་པའི་འབོད་སྐུལ་གནང་ཡོད་པ་བཅས།།
