༄༅། །བོད་མིའི་སྒྲིག་འཛུགས་ཀྱི་མགྲིན་ཚབ་པ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༥ ཉིན་ X དྲ་གནས་ཐོག་ཉེ་ལམ་རྒྱ་ནག་གཞུང་གིས་ཁེ་ན་ཌ་བོད་དོན་ལྷན་ཚོགས་དང་། ཁེ་ན་ཌ་ཡུ་གུར་ཐོབ་ཐང་རྩོད་ལེན་ཚོགས་པ་གཉིས་ཀྱི་འགན་འཛིན་གཙོས་པའི་འབྲེལ་ཡོད་མི་སྣ་ ༢༠ ལ་སྲིད་དོན་ཉེས་ཆད་བཀལ་བ་དེར་བོད་མིའི་སྒྲིག་འཛུགས་ནས་ངོ་རྒོལ་ཡོད་པ་དང་། ཁེ་ན་ཌ་གཞུང་གིས་དེའི་ལན་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དཔོན་རིགས་ཟུར་པ་དང་། ད་ལྟའི་དཔོན་རིགས་ཁག་ཅིག་གིས་ཚབས་ཆེའི་འགྲོ་བ་མིའི་ཐོབ་ཐང་རྡོག་རོལ་གཏོང་བའི་བྱ་སྤྱོད་ལ་ཉེས་ཆད་བཀལ་བར་བོད་མིའི་སྒྲིག་འཛུགས་ནས་དགའ་བསུ་དང་བསྔགས་བརྗོད་ཞུ་བཞིན་ཡོད། གནད་དོན་འདིས་ཁེ་ན་ཌ་གཞུང་གིས་འཛམ་གླིང་ཁྱོན་ཡོངས་སུ་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ཆོད་སེམས་ལ་འགྱུར་བ་མེད་པ་མཚོན་གྱི་ཡོད་ཅེས་བཀོད་འདུག
བོད་མིའི་སྒྲིག་འཛུགས་ཀྱི་མགྲིན་ཚན་པ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ཁེ་ན་ཌ་བོད་དོན་རྒྱབ་སྐྱོར་ཚོགས་པ་ནི། བོད་རྒྱ་གཉིས་ཀྱི་དཀའ་རྙོག་སེལ་ཐབས་སུ་གྲོས་མོལ་གོང་འཕེལ་གཏོང་མཁན་གྱི་ཚོགས་པ་ཞིག་ཡིན་པ་དང་། རྒྱ་ནག་གཞུང་གི་བྱ་སྤྱོད་འདིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནས་སྟངས་མངོན་གྱི་ཡོད་པ་ཡང་འགྲེལ་བརྗོད་གནང་ཡོད། །
