༄༅། །འདི་གར་བོད་མི་མང་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས་ནས་བཏང་གནས་ནང་འཁོད་དོན། ཧིན་དྷུའི་བླ་ཆེན་ཤྲི་ནཱ་ར་ཡ་ན་གུ་རུའི་ཐེབ་རྩ་དང་། ཨི་ཊ་ལིའི་ཡེ་ཤུའི་ལྟེ་གནས་ཀྱི་ཆོས་ལུགས་བགྲོ་གླེང་ལྷན་ཁང་ཐུན་མོང་གི་གོ་སྒྲིག་འོག་ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༩ དང་ ༣༠ ཉིན་ཡེ་ཤུ་ལྟེ་གནས་ཨི་ཊ་ལིའི་ཝེ་ཊི་ཀན་དུ་ཆོས་ལུགས་འདྲ་མིན་གྱི་བླ་ཆེན་རྣམ་པ་དང་། དཔོན་རིགས་ཁག དེ་བཞིན་འཛམ་གླིང་གི་ཡུལ་གྲུ་དུ་མ་ནས་རྒྱ་གར་གྱི་མཁས་དབང་ཁག་མཉམ་ཞུགས་ཀྱིས་ཆོས་ལུགས་མཐུན་སྒྲིལ་གྱི་ལྷན་ཚོགས་ཤིག་བསྐོང་ཚོགས་གནང་ཡོད།
སྐབས་དེར་ཡེ་ཤུའི་བླ་ཆེན་པོབ་མཆོག་དབུ་བཞུགས་ཀྱིས་ཁོང་གིས་ཆོས་ལུགས་མཐུན་སྒྲིལ་གྱི་བགྲོ་གླེང་འདི་ལྟར་ཚོགས་པར་བསྔགས་བརྗོད་དང་། དེང་དུས་འཛམ་གླིང་ནང་དཀའ་ངལ་མང་པོ་བྱུང་བ་ནི་སྤྱི་ཚོགས་ཁྱོན་ཡོངས་ནས་ཆོས་ལུགས་ཁག་གི་བཟང་པོའི་བསླབ་བྱ་ལག་ལེན་ཡང་དག་པ་བསྟར་མ་ཐུབ་པ་ལས་བྱུང་བས། མ་འོངས་པར་མི་རིགས་འདྲ་མིན་དང་། རིག་གཞུང་འདྲ་མིན་གཙོ་བོར་མ་ཡིན་པར་བཟང་པོའི་བསླབ་བྱ་ལག་བསྟར་དགོས་གལ་ཆེ་བ་དང་། ཆོས་ལུགས་ཁག་འཆམ་མཐུན་གྱི་སྒོ་ནས་འཛམ་གླིང་ལ་ལེགས་སྐྱེས་འབུལ་ཐུབ་པ་དགོས་རྒྱུ་ནི་གལ་ཆེན་ཡིན་པར་གསུངས།
༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་དཔལ་བཟང་པོ་མཆོག་ནང་པའི་སྐུ་ཚབ་ཏུ་ཇི་ལྟར་གདན་ཞུས་ལྟར་ཆེད་ཕེབས་ཀྱིས་ཆོས་ལུགས་ཕན་ཚུན་མཐུན་སྒྲིལ་དགོས་གལ་ཆེ་བ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་སྐོར་ངོ་སྤྲོད་དང་ཆབས་ཅིག ཆོས་ལུགས་ཀྱི་ནུས་པ་མཉམ་སྤུངས་ཀྱིས་ད་ལྟའི་འཛམ་གླིང་ནང་གི་དཀའ་སྡུག་སྣ་མང་འཕྲད་བཞིན་པའི་གནས་སྟངས་རྣམས་སེལ་ཐབས། ལྷག་དོན་དུ་མ་འོངས་པར་ཆོས་ལུགས་མཐུན་སྒྲིལ་དམ་ཟབ་ཀྱི་སྒོ་ནས་འཛམ་གླིང་ཞི་བདེ་ཡོང་ཐབས། གཞོན་སྐྱེས་མི་རབས་གསར་པ་ཚོས་འཛམ་གླིང་ལ་ལེགས་སྐྱེས་འབུལ་ཐུབ་པར་བཟང་པོའི་ལམ་སྟོན་གནང་རྒྱུ་ནི་གལ་ཆེ་ཡིན་སྐོར་་གསུང་བཤད་ཀྱང་གནང་བ་མ་ཟད། བླ་ཆེན་པོབ་མཆོག་དང་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་དཔལ་བཟང་པོ་མཆོག་དངོས་སུ་མཇལ་འཕྲད་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་ཕྱག་དེབ་ཞིག་འབུལ་ལམ་ཞུས།
གོ་སྒྲིག་གནང་མཁན་ཚོས་ཕྱི་ལོ་ ༢༠༢༥ ལོར་ཨིན་ཡུལ་དུ་ཆོས་ལུགས་ལྷན་ཚོགས་ཤིག་བསྐྱང་འཆར་ཐོག་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་དཔལ་བཟང་པོ་མཆོག་ངེས་ཕེབས་ཡོང་བའི་རེ་བསྐུལ་དང་གསོལ་འདེབས་ཞུས་ཡོད། །
