༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་བྱམས་པ་ཕུན་ཚོགས་ལགས་ཀྱིས་འཕྲོད་བསྟེན་དྲུང་ཆེའི་ལས་འཁུར་ཞུས་ཏེ་ཐེངས་དང་པོ་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་སྐོར་བསྐྱོད་ཕེབས་ཡོད། ད་ཐེངས་ཀྱི་འཚམས་གཟིགས་འདི་བཞིན་ས་གནས་ཀྱི་འཕྲོད་བསྟེན་དང་འབྲེལ་ལས་གཞིར་རྟོག་ཞིབ་དང་། ལྷག་པར་ཧོན་སུར་རབ་རྒྱས་གླིང་བོད་མིའི་གཞིས་ཆགས་སུ་མངོན་དགའ་སློབ་གྲྭ་རྒྱ་སྐྱེད་ཀྱི་ལས་གཞིར་གཟིགས་ཞིབ་གནང་རྒྱུར་དམིགས་ཏེ་ཆེད་ཕེབས་གནང་ཡོད།
དེ་ཡང་ཐོག་མར་འཕྲོད་བསྟེན་དྲུང་ཆེ་བྱམས་པ་ཕུན་ཚོགས་ལགས་ཀྱིས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་གནས་འཕྲོད་བསྟེན་སྨན་ཁང་གི་འབྲེལ་ཡོད་ལས་བྱེད་དང་། ཡན་ལག་སྨན་རྩིས་ཁང་གི་ལས་བྱེད། དེ་བཞིན་དགའ་ལྡན་ཤར་རྩེ་དང་། བྱང་རྩེ། སྒོ་མང་བཅས་སོ་སོའི་སྨན་ཁང་གི་འཛིན་སྐྱོང་འགན་འཛིན་དང་མཇལ་འཕྲད་གནང་བ་དང་འབྲེལ། དགའ་ལྡན་ཤར་རྩེའི་མཁན་རིན་པོ་ཆེ་མཆོག་དང་ལྷན་སྨན་ཁང་གི་གློག་པར་འཕྲུལ་ཆས་གསར་པ་དབུ་འབྱེད་གནང་ཡོད།
གཞན་ཡང་ས་གནས་སུ་འཕྲོད་བསྟེན་དང་འབྲེལ་བའི་ལས་གཞི་འགྲོ་བཞིན་པ་ཁག་ལ་རྟོག་ཞིབ་གནང་བ་མ་ཟད། ས་གནས་ཀྱི་རྒས་གསོ་ཁང་དུ་བོད་མི་རྒན་རྒོན་རྣམས་དང་ཐུག་འཕྲད་བཅས་གནང་ཡོད་པ་རེད། ཐེངས་འདིའི་འཚམས་གཟིགས་སྐབས་འཕྲོད་བསྟེན་དྲུང་ཆེ་དང་ལྷན་དུ་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བསོད་ནམས་ཆོས་སྒྲོན་ལགས་ལྷན་བཅར་ཞུས་ཡོད།
སྤྱིར་འཕྲོད་བསྟེན་ལས་ཁུངས་ཀྱི་དྲུང་ཆེ་བྱམས་པ་ཕུན་ཚོགས་ལགས་ནས་མུ་མཐུད་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་བོད་མིའི་གཞིས་ཆགས་སུ་འཚམས་གཟིགས་གནང་རྒྱུའི་ལས་རིམ་ཡོད་པ་རེད། །
