༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༩ རེས་གཟའ་ཉི་མའི་དགོང་དྲོ། བྱང་ཨ་རི་བོད་ཀྱི་སྐུ་ཚབ་དོན་གཅོད་ལས་ཁུངས་ནས་ཕྱི་ལོ་གསར་པ་སླེབས་ལ་ཉེ་བའི་དུས་ཚོད་དང་བསྟུན། ས་གནས་ནིའུ་ཡོག་ཏུ་བོད་རྒྱའི་ཕྱི་ལོ་གསར་པ་དགོང་ཚོགས་ཞིག་གོ་སྒྲིག་ཞུས་པའི་ཐོག ནིའུ་ཡོག་ཉེ་འཁོར་དུ་གནས་བཞུགས་གནང་མཁན་རྒྱ་རིགས་མང་གཙོ་དོན་གཉེར་བ་དང་ཤེས་ལྡན་པ། ཉེ་ཆར་རྒྱ་ནག་ནས་གསར་དུ་འབྱོར་བའི་གཞོན་སྐྱེས་སོགས་ལས་གྲུབ་པའི་རྒྱ་རིགས་གྲོགས་པོ་གསར་རྙིང་ ༤༠ ཙམ་དང་། ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་སྐུ་ཚབ། ས་གནས་ཚོགས་པ་ཆེ་ཁག་དྲུག་གི་སྐུ་ཚབ། འདུ་འཛོམས་ལ་ཕྱག་རོགས་གནང་མཁན་ས་གནས་དབུ་མའི་ལམ་གྱི་རྒྱུན་ལས་སོགས་ལས་གྲུབ་པའི་བོད་པ་རྣམས་མཉམ་ཞུགས་ཀྱིས་དགོང་ཚོགས་འདི་བཞིན་བོད་རྒྱའི་དབར་བསམ་ཚུལ་བརྗེ་ལེན་ལྷུག་པོའི་ལས་རིམ་ཕན་ནུས་ལྡན་པ་ལེགས་གྲུབ་བྱུང་།
དགོང་ཚོགས་ཐོག་བྱང་ཨ་རི་སྐུ་ཚབ་དོན་གཅོད་ལས་ཁུངས་ཀྱི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ནས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ལྟ་གྲུབ་གཞི་ལ་བཞག་ནས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་འོག དོན་གཅོད་ཁང་ནས་རྒྱ་རིགས་འབྲེལ་མཐུད་ཀྱི་ལས་དོན་ལག་བསྟར་བྱེད་མུས་དང་། འབྱུང་འགྱུར་སྔར་ལྷག་གནང་རྒྱུ་ཡིན་པ་བཤད་པ་དང་། ཉེ་བའི་ཆར་སྐུ་འཚེ་འདས་པའི་ཉེ་རབས་བོད་ཀྱི་ལོ་རྒྱུས་ཞིབ་འཇུག་པ་ལྕམ་སྐུ་ལི་ཅང་ལིན་ལགས་འདས་གྲོངས་སོང་བར་དྲན་གསོ་ཞུས་པ་དང་ལྷན། དམ་པ་ཁོང་གིས་བྲིས་གནང་བའི་ལྷ་ས་ ༡༩༥༩ དང་ལྕགས་བྱ་ནམ་ཁར་འཕུར་བ་ཞེས་པའི་དཔེ་དེབ་དང་རྩོམ་ཡིག་སོགས་ནས་རྒྱ་མི་རིགས་ཙམ་མ་ཟད། ཕྱི་རྒྱལ་བ་མང་པོས་བོད་ཀྱི་དངོས་བདེན་ལོ་རྒྱུས་ཀྱི་གནས་བབ་མཁྱེན་རྟོགས་ཐུབ་པ་བྱུང་ཡོད་པར་ཐུགས་རྗེ་ཆེ་ཞུ་དང་ཁོང་གི་བྱས་རྗེས་ལ་ཕྱིར་དྲན་བྱས་ཡོད་པ་རེད། རྒྱ་རིགས་འབྲེལ་མཐུད་པས་ད་དུང་ཕྱི་ལོ་ ༢༠༢༥ ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགུང་གྲངས་ ༩༠ ཕེབས་པའི་གོ་སྟོན་གྱི་ལོ་ཡིན་པ་དང་། བོད་མིའི་སྒྲིག་འཛུགས་ནས་བྱམས་བརྩེའི་ལོ་སྲུང་བརྩི་ཞུས་ནས་ལོ་འཁོར་མོར་༸གོང་ས་མཆོག་གི་རླབས་ཆེན་གྱི་དགོངས་གཞི་ཁག་ངོ་སྤྲོད་སོགས་དང་འབྲེལ་བའི་ལས་གཞི་གང་མང་སྤེལ་རྒྱུ་ཡིན་ན། རྒྱ་རིགས་གྲོགས་པོ་རྣམས་ནས་ཀྱང་༸གོང་ས་མཆོག་གི་དགོངས་གཞི་ཁག་རྒྱ་རིགས་མི་མང་ལ་རྒྱུད་སྤེལ་གང་ཐུབ་གནང་བའི་འབོད་སྐུལ་ཞུས་ཡོད་པ་རེད།
འདུ་འཛོམས་འདིའི་ཐོག་ས་གནས་ནིའུ་ཡོག་གི་བློ་གསལ་སྐྱེས་ཚལ་བོད་ཡིག་སློབ་གྲྭའི་སློབ་ཕྲུག་རྣམས་ནས་རིག་གཞུང་འཁྲབ་སྟོན་གནང་བ་བརྒྱུད། རྒྱ་རིགས་རྣམས་ལ་བོད་མི་ཚོས་བཙན་བྱོལ་ནང་རང་གི་སྐད་ཡིག་དང་རིག་གཞུང་ཇི་ལྟར་སློབ་སྦྱོང་བྱས་ནས་མི་ཉམས་བརྒྱུད་འཛིན་གནང་བཞིན་པ་དང་། སློབ་གྲྭ་འདི་གའི་ནང་ཨ་རིའི་ནང་སྐྱེས་པའི་བོད་ཕྲུག་ ༤༠༠ བརྒལ་བར་བོད་ཀྱི་སྐད་ཡིག་དང་རིག་གཞུང་གི་སློབ་འཁྲིད་བྱེད་བཞིན་པ། སློབ་མ་སློབ་ཐོན་བྱུང་བ་ཚོས་སློབ་གྲྭར་ཕྱིར་འཁོར་ནས་སློབ་ཕྲུག་ཆུང་བ་ཚོར་སྐད་ཡིག་དང་རིག་གཞུང་འཁྲབ་སྟོན་གྱི་སློབ་དགེ་བྱས་བཞིན་པའི་གནས་བབ་སོགས། གང་ལྟར་བོད་མི་ཚོས་བོད་ནང་རྒྱ་ནག་དམར་ཤོག་གཞུང་གིས་སྐད་དང་རིག་གཞུང་རྩ་མེད་བཟོ་བཞིན་པར་འཐབ་རྩོད་བྱེད་བཞིན་པ། ཕྱི་རྒྱལ་དུ་ཡོད་པའི་བཙན་བྱོལ་སྤྱི་ཚོགས་ནང་རང་ནུས་ཡོད་ཚད་ཀྱིས་སྐད་ཡིག་རིག་གཞུང་གཅེས་ཉར་ལ་འབད་བརྩོན་བྱས་བཞིན་པ་ངོ་སྤྲོད་བྱུང་ཡོད། སྐབས་དེར་ཨ་རི་ནང་སྐྱེས་ནས་བློ་གསལ་སྐྱེས་ཚལ་སློབ་གླིང་ནས་སློབ་ཐོན་བྱུང་བའི་སློབ་ཕྲུག་སློབ་དགེ་གནང་བཞིན་པ་ནས་རང་གི་ཉམས་མྱོང་དང་བསམ་ཚུལ་ཚོགས་འཛོམས་ཀྱི་རྒྱ་རིགས་རྣམས་བཤད་གནང་ཡོད། བོད་རྒྱ་འབྲེལ་མཐུད་ཀྱི་ལས་དོན་འདིར་ཚོགས་ཁང་གི་མཐུན་རྐྱེན་གནང་མཁན་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཚེ་རིང་ལགས་ཀྱིས་སྤྱི་མཐུན་ཚོགས་པའི་སྐུ་ཚབ་ཐོག་རྒྱ་རིགས་གྲོགས་པོ་རྣམས་ལ་དགའ་བསུ་ཞུས་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཞིར་བཟུང་རྒྱ་རིགས་འབྲེལ་མཐུད་ཀྱི་ལས་དོན་ནི་གལ་འགངས་ཆེན་པོ་ཡིན་སྟབས། སྤྱི་མཐུན་ཚོགས་པའི་ངོས་ནས་མཐུན་འགྱུར་རོགས་སྐྱོར་སྔར་ཡོད་བཞིན་མུ་མཐུད་གནང་རྒྱུ་ཡིན་པ་འགྲེལ་བརྗོད་གནང་། ཚོགས་འཛོམས་ལ་ཕེབས་མཁན་རྒྱ་རིགས་ཚོའི་ནང་ནས་པེ་ཅིང་དཔྱིད་ཀའི་དུས་དེབ་ཀྱི་རྩོམ་སྒྲིག་པ་གྲགས་ཅན་སྐུ་ཞབས་ཧུ་ཕིང་ལགས་དང་། རྒྱ་ནག་འགྲོ་བ་མིའི་ཐོབ་ཐང་ཚོགས་པའི་འགན་འཛིན་དང་དྲུག་བཞི་དོན་རྐྱེན་སྐབས་སློབ་ཕྲུག་གི་འགོ་འཁྲིད་གནང་མྱོང་མཁན་སྐུ་ཞབས་ཀྲུའུ་ཧྥང་ཟོ་ལགས། རྒྱ་ནག་མང་གཙོ་ཚོགས་པའི་དྲུང་ཆེ་སྐུ་ཞབས་ཁྲིན་ཁྲོང་ཁྲོང་ལགས། བོ་སྟེང་དཔེ་བསྐྲུན་ཁང་གི་འགན་འཛིན་སྐུ་ཞབས་རུང་ཝེ་ལགས། དེ་བཞིན་རྒྱ་ནག་ནང་མི་རབས་གསར་པའི་ལས་འགུལ་ཏེ་ཤོག་དཀར་ལས་འགུལ་གྱི་འབོད་སྒྲ་སོགས་ཀྱི་ཐོག་ཕྱག་ལས་གནང་མཁན་གྱི་རྒྱ་རིགས་གཞོན་སྐྱེས་ཡང་རོའོ་ཧོས་ལགས་སོགས་ནས་གཏམ་བཤད་གནང་། ཁོང་རྣམས་ནས་༸གོང་ས་མཆོག་གི་རླབས་ཆེན་གྱི་མཛད་རྗེས་དང་འཚེ་མེད་ཞི་བའི་ལྟ་གྲུབ་བརྒྱུད་འཛམ་གླིང་ལ་ཞི་བདེའི་ཡོན་ཏན་དར་སྤེལ་གནང་བ་སོགས་ལ་བཀའ་དྲིན་རྗེས་དྲན་ཞུས་གནང་བ་དང་། ༸གོང་ས་མཆོག་གི་ཐུགས་བསྐྱེད་ལས་འཁྲུངས་པའི་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་ཞུས་ནས་བོད་རྒྱའི་དབར་འབྲེལ་མཐུད་ཀྱི་ལས་དོན་གལ་འགངས་ཆེན་པོ་ཡིན་པ་མུ་མཐུད་ཚང་མས་འབད་བརྩོན་སྔར་ལྷག་བྱེད་དགོས་པ་གསུངས། ལྕམ་སྐུ་ལི་ཅང་ལིན་ལགས་མཁྱེན་མཁན་སྐུ་ཞབས་ཧུ་ཕིང་ལགས་དབུས་པའི་གཏམ་བཤད་པ་རྣམས་ནས་ཁོང་གིས་བོད་ཀྱི་ལོ་རྒྱུས་ཀྱི་གནས་བབ་དངོས་བདེན་ཉེ་རབས་ལོ་རྒྱུས་ཀྱི་བརྩམས་ཆོས་ཀྱི་དེབ་དང་རྩོམ་ཡིག་སོགས་ནས་བརྒྱུད་སྤེལ་གནང་ཡོད་པ་སྒེར་སོ་སོ་ནས་ཕྱིར་དྲན་ཞུས་གནང་བ་ལྷན་མ་འོངས་པར་ཁོང་ལྟ་བུའི་བློ་དཀར་གྱི་རྒྱ་རིགས་མང་པོ་ཡོང་བའི་སྨོན་འདུན་ཞུས་གནང་སོང་།
ཚོགས་འཛོམས་ཀྱི་མཐའ་མ། ས་གནས་ནིའུ་ཡོག་དབུ་མའི་ལམ་ལས་འགུལ་ཁང་གི་ཚོགས་གཙོ་གཙོས་པའི་རྒྱུན་ལས་རྣམས་ནས་རྒྱ་རིགས་གྲོགས་པོ་ཚོར་བོད་ཀྱི་རིགས་གཞུང་འཁྲབ་སྟོན་དང་སྒོར་གཞས་སོགས་སློབ་འཁྲིད་གནང་ནས་ཚོགས་འཛོམས་འདི་བཞིན་དགའ་སྤྲོའི་ངང་ལེགས་གྲུབ་བྱུང་བ་དང་བཅས། །
