༄༅། ། ཕྱི་ལོ་ ༢༠༢༤ ཟླ་བ་ ༡༢ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིངྒ་མཆོག་སྐུ་ཚེའི་འཕེན་པར་རྫོགས་པར་ཁོང་གི་བཟའ་ཟླ་ལྕམ་སྐུ་གུར་ཤ་རན་ཀོོར་ལགས་ལ་ཐུགས་གསོའི་གསུང་འཕྲིན་གནང་ཡོད།
དེ་ཡང་ཐུགས་གསོའི་གསུང་འཕྲིན་ནང་དཔལ་ལྡན་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་བོད་མིའི་སྒྲིག་འཛུགས་དང་། བོད་མི་ཡོངས་ཀྱི་ཚབ་ཞུས་ཏེ་ནང་མི་ཉེ་འབྲེལ་ཡོངས་ལ་ཐུགས་གསོ་ཞུས་ཡོད།
སྐུ་ཞབས་མན་མོ་ཧན་སིངྒ་མཆོག་གིས་སྲིད་བློན་གྱི་ལས་འཁུར་བཞེས་པའི་རིང་། རྒྱ་གར་གྱི་དཔལ་ཡོན་དར་རྒྱས་སུ་གཏོང་བའི་མཛད་རྗེས་འདི་ཉིད་མང་ཚོགས་ཀྱིས་རྟག་ཏུ་དྲན་ངེས་ཡིན།
སྲིད་བློན་ཁོང་གིས་རྒྱ་གར་གྱི་དཔལ་འབྱོར་གོང་འཕེལ་གཏོང་བར་ཕུགས་རྒྱང་རིང་པོའིོ་ཐབས་ལམ་དང་། དེ་བཞིན་ཁོང་གིས་མང་གཙོ་དང་། སྣ་མང་ལམ་ལུགས། བྱམས་བརྩེ་བཅས་ཀྱི་ལྟ་གྲུབ་བརྟན་པོ་བཟུང་བར་བརྟེན་རྒྱ་གར་ཡུལ་འདི་བཞིན་འཛམ་གླིང་ཐོག་མཐུན་སྒྲིལ་དང་། མཉམ་གནས་ཀྱི་མཚོན་རྟགས་ལྟ་བུ་ཆགས་ཡོད། ཅེས་དང་།
རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིངྒ་མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བཀུར་དང་། བོད་མི་མང་ལ་རྒྱབ་སྐྱོར་ལྷོད་མེད་གནང་ཡོད་སྐོར་དང་འབྲེལ། དམ་པ་ཁོང་གིས་བོད་དོན་ཐོག་ཐུགས་འཁུར་ཆེ་བཞེས་གནང་བར་རྟག་ཏུ་དྲན་ངེས་ཡིན། ཞེས་གསུངས། །
