༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་བརྒྱད་པའི་གྲོས་ཆོད་ཨང་ ༢༠༢༤།༡༧།༨།༧ ལྟར། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་། ལས་དོན་བྱེད་ཕྱོགས་ཀྱི་སྒྲིག་གཞིར་བསྐྱར་བཅོས་ཁྲིམས་འཆར། ཡིག་ཆ་ཨང་ ༣༢ པ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ཐོག་བརྗོད་པ་དང་པོ་ཟིན་བསྟུན་དགོངས་འཆར་སྤྱི་མོས་གཞིར་བཟུང་། ཚོགས་དུས་དེའི་སྤྱི་ཡོངས་དགོངས་འཆར་དང་འཆར་ཟིན་སྔ་རྗེས་ལ་གཞིགས་ཏེ་འཐུས་ཀ་ཚང་བ་བཟོ་སླད་བསྐྱར་ཞིབ་ནན་ཏན་གྱིས་སྒྲིག་གཞི་དེ་རང་ངམ། ནང་དོན་དེར་བསྟུན་གྱིས་སྒྲིག་གཞི་ཞིག་ཟུར་དུ་གསར་བཟོས་དགོས་མིན་གང་དགེའི་སླད་སྤྱི་འཐུས་གསུམ་ལས་གྲུབ་པའི་ཆེད་འཛུགས་ཚོགས་ཆུང་ཞིག་བསྐོ་གཞག་དགོས་པ་གསལ་བ་ལྟར། དཔལ་ལྡན་ཚོགས་གཙོ་སྦྲེལ་པོས་ཕྱི་ལོ་ ༢༠༢༤ ཟླ་བ་ ༡༡ པའི་ཚེས་ ༡༤ ཉིན་ཚོགས་ཆུང་གི་མི་འགྲོར་སྤྱི་འཐུས་དབུ་དཀར་ཚང་གཡུ་སྒྲོན་ལགས་དང་། སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས། སྤྱི་འཐུས་བློ་བཟང་ཐུབ་བསྟན་ལགས་བཅས་ལ་བསྐོ་གཞག་བཀོད་ཁྱབ་གནང་བ་དང་། དེ་རིང་ཕྱི་ཟླ་ ༡༢ པའི་ཚེས་ ༦ ཉིན་སྤྱི་འཐུས་རྣམ་པ་གསུམ་དངོས་སུ་ལྷན་འཛོམས་ཀྱིས་ཚོགས་ཆུང་གི་ཚོགས་གཙོར་སྤྱི་འཐུས་དགེ་བཤེས་ལྷ་རམས་པ་གོ་བོ་བློ་བཟང་ཕན་བདེ་ལགས་དང་། ཚོགས་དྲུང་སྤྱི་འཐུས་དབུ་དཀར་ཚང་གཡུ་སྒྲོན་ལགས་བསྐོ་གཞག་གནང་ཡོད། 
དེ་ཡང་ཚོགས་ཆུང་གི་ཚོགས་མི་རྣམ་པས་ཐོག་མར་དཔལ་ལྡན་ཚོགས་གཙོ་སྦྲེལ་པོ་མཆོག་གི་དྲུང་དུ་ཆེད་བཅར་གྱིས་ལས་དོན་བྱེད་ཕྱོགས་ཀྱི་ལམ་སྟོན་ཞུས་རྗེས། ལས་དོན་དངོས་སུ་འགོ་འཛུགས་གནང་བ་དང་། ཚོགས་ཆུང་གི་གྲུབ་དོན་སྙན་ཐོ་དང་། ཁྲིམས་འཆར་ཟིན་བྲིས་བཅས་ཕྱི་ལོ་ ༢༠༢༥ ཟླ་བ་ ༣ ཚེས་ ༡༡ འགྱངས་མེད་ཚོགས་དྲུང་ལས་ཁུངས་སུ་འབུལ་གནང་ཐུབ་པ་དགོས་རྒྱུ་ཡིན་པ་བཅས། །
