༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡༢ པའི་ཚེས་ ༡༠ ཉིན་གྱི་དགོང་དྲོ་བོད་མི་མང་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་། སྤྱི་འཐུས་ཡེ་ཤེས་སྒྲོལ་མ་ལགས་རྣམ་གཉིས་ནས་ནི་ཐར་ལན་ཌི་གནས་སྡོད་བོད་མི་རྣམས་ཐུག་འཕྲད་ཀྱིས་གསུང་བཤད་དང་། དེ་བཞིན་ས་གནས་བོད་རིགས་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། བོད་རང་བཙན་སློབ་ཕྲུག་ཚོགས་པ། བོད་དོན་རྒྱབ་སྐྱོར་ཚོགས་པ་བཅས་ཚོགས་པ་ཁག་བཞིའི་འབྲེལ་ཡོད་འགན་ཁུར་བ་རྣམས་དང་ལྷན་བོད་དོན་དང་འབྲེལ་བའི་ཚོགས་འདུ་བཅས་ཚོགས་ཏེ། ཐེངས་འདིའི་ཡུ་རོབ་ནི་ཐར་ལན་ཌི་རྒྱལ་ཁབ་ནང་གི་བོད་དོན་ཞུ་སྐུལ་སོགས་ཀྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད་པ་རེད།
དེ་ཡང་ཕྱི་ཚེས་ ༡༠ ཉིན་གྱི་དགོང་དྲོ་ནི་ཐར་ལན་ཌི་གནས་སྡོད་བོད་རིགས་མང་ཚོགས་རྣམས་འདུ་འཛོམས་ཐོག ས་གནས་སུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༥ འཁོར་བའི་དུས་དྲན་སྲུང་བརྩིའི་ཐོག་བོད་མི་མང་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་། སྤྱི་འཐུས་ཡེ་ཤེས་སྒྲོལ་མ་ལགས་རྣམ་གཉིས་གདན་ཞུས་ལྟར་ཆེད་ཕེབས་དང་སྦྲགས། དེ་གའི་མང་ཚོགས་རྣམས་ཐུག་འཕྲད་ཀྱིས་གསུང་བཤད་གནང་ཡོད་པ་རེད། 
དེ་ཡང་ལས་རིམ་གྱི་ཐོག་མར་ས་གནས་བོད་རིགས་ཚོགས་པའི་ཚོགས་གཙོ་ནོར་བུ་ལགས་ཀྱིས་ཚོགས་པའི་ལས་བསྡོམས་དང་འབྲེལ་བའི་ཐོག་གསུང་བཤད་དང་། སྦར་སིལ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཕྱོགས་ཕེབས་བོད་མི་མང་སྤྱི་འཐུས་རྣམ་པ་གཉིས་ངོ་སྤྲོད་དང་འཚམས་འདྲིའི་གསུང་བཤད་བཅས་གནང་རྗེས། བོད་མི་མང་སྤྱི་འཐུས་རྣམ་པ་གཉིས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཛད་འཕྲིན་དང་། བོད་མིའི་སྒྲིག་འཛུགས་ཀྱི་ལས་དོན་སྐོར་ངོ་སྤྲོད་གསུང་བཤད་དང་། མང་ཚོགས་ཀྱིས་དོགས་འདྲི་ཕུལ་བ་ཁག་ལ་ལན་འདེབས་གསལ་བཤད་གནང་།
མཐར་བོད་རིགས་ཚོགས་པའི་དྲུང་ཆེ་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས་མི་མང་ཐུག་འཕྲད་ཀྱི་ལས་རིམ་མཇུག་བསྒྲིལ་བ་དང་། གཞན་ཡང་མཛད་སྒོའི་ཐོག་ས་གནས་ཀྱི་སྔོན་འགྲོ་སློབ་གྲྭ་ནས་འཛིན་རིམ་ལྔ་པ་བར་གྱི་བོད་པའི་སློབ་ཕྲུག་རྣམས་ནས་རིག་གཞུང་གཞས་སྣ་འཁྲབ་སྟོན་གཟིགས་འབུལ་ཞུས་གནང་འདུག
ཕྱི་ཚེས་ ༡༡ ཉིན་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ལས་ཁུངས་སུ་སྤྱི་འཐུས་རྣམ་པ་གཉིས་ནས་དེ་གའི་འབྲེལ་ལས་རྣམ་པ་དང་། ས་གནས་བོད་རིགས་ཚོགས་པའི་ཚོགས་གཙོ་དབུས་པའི་ཚོགས་མི་རྣམ་པ། ས་གནས་བོད་རང་བཙན་སློབ་ཕྲུག་ཚོགས་པའི་ཚོགས་མི་རྣམ་པ། བོད་དོན་རྒྱབ་སྐྱོར་ཚོགས་པ་བཅས་ཚོགས་པ་བཞིའི་འགན་བཞེས་མཁན་རྣམས་དང་ལྷན། མ་འོངས་བོད་དོན་འཐབ་རྩོད་གནང་ཕྱོགས་ཐོག་ལེགས་སྤེལ་ཉེས་འགོག་གི་ཚོགས་འདུ་ཞིག་ཚོགས་ཤིང་། དེའི་སྐབས་གོང་གསལ་ཚོགས་པ་དེ་དག་གིས་བོད་དོན་ཐོག་ལས་འགུལ་གང་དང་གང་སྤེལ་བའི་ལས་དོན་སྐོར་སྙན་སེང་དང་། རྒྱལ་སྤྱིའི་ཐོག་བོད་ཀྱི་རྩ་དོན་གྱི་ནུས་པ་གོང་མཐོར་གཏོང་ཐབས། ཡུ་རོབ་སྤྱི་མཐུན་རྒྱལ་ཁབ་ནང་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུར་འབད་བརྩོན་གནང་རྒྱུ། ཡུ་རོབ་རྒྱལ་ཁབ་སོ་སོའི་ཕྱི་སྲིད་ལས་ཁུངས་ཀྱི་རྒྱ་ནག་སྡེ་ཚན་གྱི་འབྲེལ་ཡོད་རྣམས་དང་ལྷན་མཇལ་འཕྲད་གནང་སྟེ། བོད་ནང་གི་ཛ་དྲག་གནས་སྟངས་སྐོར་གླེང་སློང་དང་རྒྱ་ནག་ནང་མཐོང་མཆན་ཞུ་མི་དགོས་པར་ཡུལ་སྐོར་འགྲོ་ཆོག་པའི་ཆ་རྐྱེན་འོག ཡུ་རོབ་ཀྱི་མི་སེར་ལག་ཁྱེར་ཡོད་པའི་བོད་མི་རྣམས་གཉེན་འཕྲད་དུ་བསྐྱོད་སྐབས་གནམ་ཐང་དུ་རྒྱ་གཞུང་གིས་དཀའ་ངལ་བཟོ་བཞིན་ཡོད་པའི་ཐོག་ཞུ་སྐུལ་གནང་དགོས་པ་སོགས་མ་འོངས་པར་བོད་ཀྱི་རྩ་དོན་ཐོག་ལས་དོན་གནང་ཕྱོགས་ཐོག་བཀའ་བསྡུར་ལྷུགས་པོ་གནང་ཡོད་འདུག
དེ་ནས་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གིས་ཕྱོགས་ཕེབས་བོད་མི་མང་སྤྱི་འཐུས་རྣམ་པ་གཉིས་ཀྱིས་གཙོས་ཚོགས་བཅར་བ་ཡོངས་ལ་དགོང་དྲོའི་གསོལ་སྟོན་ཞིག་བཤམས་རྗེས། ཐེངས་འདིའི་ཡུ་རོབ་ནི་ཐར་ལན་ཌི་རྒྱལ་ཁབ་ནང་གི་བོད་དོན་ཞུ་སྐུལ་གྱི་ལས་རིམ་ཁག་ཡོངས་སུ་ལེགས་གྲུབ་བྱུང་ཡོད་པ་བཅས། །
