༄༅། །བོད་ཀྱི་ཟློས་གར་ཚོགས་པར་དམིགས་བསལ་སྒྱུ་རྩལ་སློབ་གཉེར་བ་གསར་བསྡུའི་གསལ་བསྒྲགས།

བོད་ཀྱི་ཟློས་གར་ཚོགས་པ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་དགོངས་བཞེད་འོག་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་རིག་གཞུང་རྒྱུན་འཛིན་དང་གོང་སྤེལ་ཡོང་རྒྱུར་དམིགས་ཏེ་གསར་འཛུགས་ཞུས་པའི་སྒྱུ་རྩལ་བསྟི་གནས་ཁང་ཞིག་ཡིན། སློབ་གཉེར་ཁང་འདི་ནས་ད་བར་སྒྱུ་རྩལ་སློབ་མ་ལྔ་བརྒྱ་ལྷག་དང་ཟློས་དགེ་བརྒྱ་ཡས་མས་གསོ་སྐྱོང་ཞུས་ཡོད་ཅིང་། དེ་དག་གིས་རང་གི་རྣམ་དཔྱོད་དང་སྒྱུ་རྩལ་ལ་གཞིགས་པའི་བོད་ཀྱི་རིག་གཞུང་སྲུང་སྐྱོབ་བྱུ་རྒྱུའི་འགན་འཁྲི་འཁུར་མུས་ཡིན།

གཞན་ཡང་སྒྱུ་རྩལ་པ་རྣམས་ལ་བོད་དོན་དྲིལ་བསྒྲགས་དང་བོད་ཀྱི་རིག་གཞུང་གོང་མཐོར་ཡོང་སླད་ཕྱི་རྒྱལ་ཡུལ་གྲུ་ཁག་ནང་འཁྲབ་སྟོན་སྐོར་སྐྱོད་གནང་རྒྱུའི་གོ་སྐབས་ཕུལ་དང་འབུལ་བཞིན་ཡོད་ལ། ད་བར་ཕྱི་རྒྱལ་ཡུལ་གྲུ་ཁག་བཞི་བཅུ་ལྷག་གི་ནང་བོད་ཀྱི་ཟློས་གར་ཚོགས་པའི་འཁྲབ་སྟོན་པ་རྣམས་ནས་སྐོར་སྐྱོད་ཞུས་ཐུབ་པ་བྱུང་ཡོད།

སྒྱུ་རྩལ་བསྟི་གནས་ཁང་འདི་ནས་བོད་ཀྱི་ཡུལ་ལུང་ཁག་གི་གཞས་སྣ་དང་། བཟོ་ཞིང་འབྲོག་གསུམ་གྱི་ལས་རྩོལ་གྱི་རྣམ་པ་གསལ་བའི་ཞབས་གཞས། བོད་ཀྱི་ལྷ་མོའི་སྒྱུ་རྩལ་དང་རོལ་ཆའི་རྣམ་གྲངས་སྤྱི་ལ་ཆེད་ལས་རང་བཞིན་གྱི་སློབ་ཁྲིད་ཞུ་མུས་ཡིན་པ་ལགས་ན། བོད་ཀྱི་ཟློས་གར་སྒྱུ་རྩལ་ཐོག་དོ་དབྱིངས་དང་སྤྲོ་བ་རབ་ཏུ་བརྟས་པའི་རང་རིགས་ཀྱི་གཞོན་སྐྱེས་ཁྲོད་འདི་ག་བོད་ཀྱི་ཟློས་གར་ཚོགས་པའི་དམིགས་གསལ་སློབ་གཉེར་བའི་ཁོངས་ཞུགས་བློ་ཡོད་རིགས་མཆིས་ཚེ་གཤམ་གསལ་ཆ་རྐྱེན་ཚང་བའི་དོན་གཉེར་ཅན་རྣམས་ནས་ཕྱི་ལོ་ ༢༠༢༥ ཟླ་ ༡ ཚེས་ ༣༡ འགྱངས་མེད་དགོས་མཁོའི་ཡིག་ཆ་ཁག་བོད་ཀྱི་ཟློས་གར་ཚོགས་པའི་སྤྱི་ཁྱབ་ཡིག་ཚང་དུ་ཆབ་འབུལ་ཞུ་དགོས།

བོད་ཀྱི་ཟློས་གར་ཚོགས་པའི་སློབ་གཉེར་བའི་སློབ་གནས་རིམ་པ།

༡། ཟློས་གར་གཞི་རིམ་གོང་མ་ལོ་བཞི།

༢། ཟློས་གར་ཉེ་བའི་གཙུག་ལག་རབ་འབྱམས་པ་ལོ་གསུམ།

༣། ཟློས་གར་གཙུག་ལག་རབ་འབྱམས་པ་ལོ་གཉིས།

དགོས་ངེས་ཆ་རྐྱེན།

༡།  བོད་ཀྱི་ཟློས་གར་སྒྱུ་རྩལ་ལ་དོ་དབྱིངས་དང་སྤྲོ་སྣང་ལྡན་པའི་སྒོ་ནས་སློབ་གཉེར་བྱེད་འདུན་ཡོད་པ།

༢།  དང་བླངས་དཔྱ་དངུལ་ལག་དེབ་འབུལ་བབ་གཙང་འབུལ་ཟིན་པའི་ཤོག་ངོས་དང་པོ་དང་མཐའ་མའི་ངོ་བཤུས།

༣།   རྒྱ་གར་དུ་གནས་སྡོད་ཆོག་པའི་སྐྱབས་བཅོལ་ལག་འཁྱེར་ (R.C) གྱི་ངོ་བཤུས་དང་། དེ་མིན་རྒྱ་གར་གྱི་ (Passport) ཡིན་ན་དེའི་ངོ་བཤུས།

༤།   རང་ལོ་ཉི་ཤུ་རྩ་ལྔ་ལས་མ་བརྒལ་བ་དགོས།

༥།    གཟུགས་ཐང་ལས་འཕེར་ཡིན་པའི་ཚད་ལྡན་སྨན་པའི་ངོས་སྦྱོར་སྟེང་དོ་བདག་གི་འདྲ་པར་ཐོག་སྨན་པའི་མཚན་རྟགས་ཡོད་པ།

༦།    ཉུང་མཐའི་ཤེས་ཚད་འཛིན་རིམ་བརྒྱད་པ་སློབ་མཐར་སོན་པ་ཞིག་དགོས་རྒྱུ།

འདེམས་རྒྱུགས་ལས་རིམ།

༡།    དོ་བདག་རང་ཉིད་ནས་གླུ་གཞས་དང་རོལ་ཆ། ཞབས་བྲོ་སོགས་འཁྲབ་སྟོན་སྒྱུ་རྩལ་གྱི་བརྙན་ཐུང་སྐར་མ་ ༢ ལས་མ་བརྒལ་བ་ཞིག་བརྙན་པར་བཅོས་སྒྲིག་གང་ཡང་མེད་པར་གཤམ་གསལ་ཞལ་པར་ཨང་གྲངས་བརྒྱུད་སྐད་འཕྲིན་ནང་བསྐུར་དགོས་རྒྱུ།

༢།    དྲྭ་ཐོག་ལས་རིམ་ནས་སྔོན་འགྲོའི་འདེམས་སྒྲུག་བྱུང་རིགས་དངོས་གཞིའི་འདེམས་རྒྱུགས་བོད་ཀྱི་ཟློས་གར་དུ་་བྱ་རྒྱུ།

ཐུགས་སྣང་།

༡།  ལོ་བཞིའི་རིང་ཟློས་གར་གཞི་རིམ་གོང་མའི་ནང་རྨང་གཞིའི་སྦྱོར་བརྡར་རྐང་བྲོ་གླུ་གཞས་དང་གཏམ་བརྗོད། རོལ་ཆ། ལྷ་མོ། བོད་ཡིག་དང་ཨིན་ཡིག་སོགས་ཀྱི་སྦྱོང་བརྡར་སྤྲོད་རྒྱུ་དང་། དེ་ནས་རྒྱུགས་སྤྲོད་ཐོན་རིགས་ལ་ཟློས་གར་ཉེ་བའི་གཙུག་ལག་རབ་འབྱམས་པའི་མཐོ་རིམ་སློབ་སྦྱོང་གི་གོ་སྐབས་ཕུལ་ཏེ་གླ་ཕོགས་ཞུ་ལེན་ཆོག་རྒྱུ།

༢།  ཟློས་གར་གཞི་རིམ་གོང་མ་སློབ་ཡུན་ལོ་བཞིའི་རིང་ཟས་གོས་གནས་མལ་དང་སློབ་སྦྱོང་སོགས་རིན་མེད་མཐུན་འགྱུར་ཞུ་རྒྱུ་དང་། ཚོགས་པའི་སྒྲིག་གཞི་གཞིར་བཟུང་སྦྱོང་བརྡར་བསྒྲུབས་རྗེས་ཞབས་ལོའི་དུས་ཡུན་མ་ཚང་གོང་དགོངས་ཞུ་བྱ་དགོས་བྱུང་ཚེ། དུས་ཡུན་དེ་དག་རིང་གི་སློབ་ཡོན་འགྲོ་གྲོན་ཆ་ཚང་གཏན་འབེབས་ལྟར་ཕྱིར་སློག་དགོས་རྒྱུ།

 གོང་གསལ་ལག་འཁྱེར་དང་ཡིག་ཆ་ཁག་གི་ངོ་བཤུས་སྟེང་བོད་མིའི་སྒྲིག་འཛུགས་ཀྱི་ལས་བྱེད་ཟུང་དྲུང་ཡན་ནམ་ས་གནས་འགོ་འཛིན། སློབ་གྲྭའི་སློབ་སྤྱི་བཅས་གང་རུང་ནས་ངོ་བཤུས་ཡིག་ཆར་འཁྲུལ་མེད་དག་མཆན་མཚན་རྟགས་ངེས་པར་ཞུ་དགོས་པ་བཅས་ཀྱི་གསལ་བསྒྲགས་སུ།

གློག་འཕྲིན་ཁ་བྱང་། [email protected]

འབྲེལ་གཏུགས་ཁ་པར་ཨང་། 8894996646 (WhatsApp)

བོད་ཀྱི་ཟློས་གར་ཚོགས་པའི་སྤྱི་ཁྱབ་ཡིག་ཚང་ནས། ཕྱི་ལོ་ ༢༠༢༤ ཟླ་ ༡༢ ཚེས་ ༢༦ ལ།།