༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༣ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག ཉིན་གྲངས་གསུམ་རིང་ས་རཱ་མཐོ་རིམ་སློབ་གཉེར་ཁང་དུ་དབུ་མའི་ལམ་གྱི་སྲིད་བྱུས་སྐོར་ཟབ་སྦྱོང་གནང་བའི་ཐོག་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ཀྱིས་གསུང་བཤད་གནང་ཡོད།
དེ་ཡང་ཟབ་སྦྱོང་སྐབས་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་དབུ་མའི་ལམ་གྱི་ངོ་བོ་དང་འཕེལ་རིམ། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱིས་མང་མོས་ཐོག་སྲིད་བྱུས་གཏན་འབེབས་གནང་ཕྱོགས་སྐོར་གོ་རྟོགས་སྤེལ་ཡོད།
དེ་མཚུངས་ཟབ་སྦྱོང་རིང་གྲོས་མཐུན་གན་རྒྱའི་སྐོར་དང་། མང་གཙོའི་ལམ་ནས་དབུ་མའི་ལམ་གྱི་སྲིད་བྱུས་གཏན་འབེབས་གནང་ཕྱོགས། བོད་མིའི་སྒྲིག་འཛུགས་ངོས་ནས་བོད་ཀྱི་དཀའ་རྙོག་སེལ་ཐབས་ཀྱི་ལངས་ཕྱོགས་བཅས་ཀྱི་སྐོར་འགྲེལ་བརྗོད་གནང་ཡོད།
དེ་བཞིན་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་ཀྱིས་ན་གཞོན་རྣམས་ནས་བོད་ཀྱི་དཀའ་རྙོག་དང་། བོད་ཀྱི་ལོ་རྒྱུས་གནས་བབ་ཐོག་འགན་འཁྲི་དང་དོ་སྣང་ལེགས་པོ་གནང་དགོས་པ་ནན་བརྗོད་གནང་ཡོད། སྐབས་དེར་ཕྱི་དྲིལ་དྲུང་འཕར་བསྟན་འཛིན་ལེགས་བཤད་ལགས་དང་མཉམ་ཞུགས་པར་ཕན་ཚུན་དབུ་མའི་ལམ་ཐོག་དྲི་བ་དྲིས་ལན་དང་བགྲོ་གླེང་གང་མང་གནང་ཞིང་། མཉམ་ཞུགས་པ་རྣམས་ནས་ཀྱང་དབུ་མའི་ལམ་གྱི་སྲིད་བྱུས་དང་། བོད་ནང་ཀྱི་གནས་བབ་སྐོར་གོ་རྟོགས་ཐོབ་ཡོད།
ཟབ་སྦྱོང་རིང་ཕྱི་དྲིལ་ལས་ཁུངས་ཀྱི་བོད་དོན་ཞུ་གཏུག་ཚན་པའི་འབྲེལ་ལས་བསྟན་འཛིན་དཔལ་མོ་ལགས་དང་། དབུ་མའི་ལམ་ཚན་པའི་འབྲེལ་ལས་རིན་ཆེན་ལགས་གཉིས་ཀྱིས་གཙོ་སྐྱོང་གནང་ཡོད་པ་བཅས།།
