༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཨེ་རི་ཀོ་ཡ་མ་ཏ་ནི་ (Eriko Yamatani) ལགས་ལ་འཚམས་འདྲིའི་གསུང་འཕྲིན་གནང་ཡོད།
དེ་ཡང་གསུང་འཕྲིན་ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས། ཉེ་ཆར་སྐུ་ཉིད་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོར་བསྐོ་བཞག་གནང་བར་ངས་བོད་མིའི་སྒྲིག་འཛུགས་དང་། བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན།
ཉི་འོང་སྐུ་ཚབ་དོན་གཅོད་བརྒྱུད་ཁྱེད་ཀྱི་དབུ་ཁྲིད་དང་། བོད་དོན་ཞུ་གཏུག་ཐོག་སྐུ་ལས་གནང་བཞིན་པ་ནི་སེམས་འགུལ་ཐེབས་འོས་པ་ཞིག་ཡིན། ཁྱེད་ཀྱིས་ཡུན་རིང་སྲིད་དབང་རིང་ལུགས་ཀྱི་མཉའ་གནོན་ཐོག་ངོ་རྒོལ་གསལ་པོ་དང་། བདེན་པ་བརྗོད་ཐུབ་པའི་སྙིང་སྟོབས་བཅས་ནི་འཛམ་གླིང་གི་དབུ་ཁྲིད་རྣམས་ལ་དམིགས་དཔེ་བཟང་པོ་ཞིག་ཡིན།
འདས་པའི་ལོ་མང་རིང་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཉི་འོང་ནང་བོད་དོན་ལ་རྒྱབ་སྐྱོར་དང་། གོ་རྟོགས་སྤེལ་བར་གལ་ཆེའི་ལས་དོན་མང་དག་གནང་ཡོད་པ་དང་། ད་ཆ་ཁྱེད་ཀྱི་དབུ་ཁྲིད་འོག་དེ་ལྟར་མཇལ་རྒྱུ་བྱུང་བ་ནི་བློ་སྤོབས་སྐྱེད་འོས་པ་ཞིག་ཡིན།
དེ་མཚུངས་ཕྱི་ལོ་ ༢༠༢༥ ཕྱི་ཟླ་ ༦ ནང་ཉི་འོང་དུ་ཚོགས་གཏན་འཁེལ་བའི་འཛམ་གླིང་གྲོས་ཚོགས་འཐུས་མིའི་ཚོགས་ཆེན་སྐབས་ཁྱེད་དང་ལྷན་དུ་མཉམ་ལས་དང་། རྒྱབ་སྐྱོར་མུ་མཐུད་ཐོབ་པའི་རེ་བ་ཡོད། ཚོགས་ཆེན་འདི་ནི་གྲོས་ཚོགས་འཐུས་མི་རྣམས་མཉམ་མཛོམས་ཀྱིས་བོད་དོན་ཐོག་རྒྱལ་སྤྱིའི་རྒྱབ་སྐྱོར་ཤུགས་ཆེ་གཏོང་རྒྱུའི་སྡིངས་ཆ་ཞིག་ཡིན་པ་དང་། ཚོགས་ཆེན་འདི་ལམ་ལྷོངས་ཡོང་བར་ཁྱེད་ཀྱི་དབུ་ཁྲིད་ལམ་སྟོན་གལ་ཆེན་པོ་ཆགས་ཡོད། ཅེས་དང་།
མཐར་དཔལ་ལྡན་སྲིད་སྐྱོང་མཆོག་གིས། ཁྱེད་ཀྱི་ཚོགས་གཙོའི་ལས་ཡུན་རིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་ལྷན་དུ་དྲང་བདེན་དང་། རང་དབང་། འགྲོ་བ་མིའི་ཐོབ་ཐང་ཆེད་ནུས་པ་མཉམ་སྤུངས་ཀྱིས་ཤར་བསྐྱོད་ཐུབ་པའི་རེ་བ་ཡོད་ཅེས་གསུངས། །
