༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་གྲོང་ཁྱེར་སན་ཧྥ་རན་སི་སི་ཀོ་ (San Francisco) ཕེབས་འབྱོར་སྐབས་བོད་མི་མང་ཚོགས་ནས་ཕེབས་བསུ་སྣེ་ལེན་ཞུས་ཡོད། དེ་རྗེས་སྦར་ཀི་ལི་སློབ་གྲྭའི་ཚོགས་ཁང་དུ་བོད་མི་མང་ཚོགས་ལ་གསུང་བཤད་གནང་ཡོད།
དེ་ཡང་ཐོག་མར་དཔལ་ལྡན་སྲིད་སྐྱོང་མཆོག་གིས་བོད་ཀྱི་གནད་བསྡུས་ ༢༠།༢༠ ཡི་རྩོམ་པ་པོ་དང་། བོད་དོན་རྒྱབ་སྐྱོར་བ་སྐུ་ཞབས་མ་ཧི་ཀལ་ཝེན་ཝལཊ་ལགས་ལ་ཆེ་བསྟོད་གནང་བ་དང་སྦྲགས། ཁོང་གིས་ཐབས་ལམ་འདྲ་མིན་བརྒྱུད་བོད་ཀྱི་ཐབས་རྩོད་གོང་འཕེལ་གཏོང་བར་བསྔགས་བརྗོད་གནང་ཡོད། དེ་ནས་སྐུ་ཞབས་མ་ཧི་ཀལ་ལགས་ཀྱིས་རང་ཉིད་བོད་ཙམ་མ་ཡིན་པར་རང་དབང་ཐོབ་ཟིན་པའི་རྒྱལ་ཁབ་གཞན་གྱི་ཐབས་རྩོད་ཐོག་ལས་དོན་སྤེལ་བ་ཁག་ངོ་སྤྲོད་དང་། ལོ་རྒྱུས་ཀྱི་འགྱུར་བ་ནི་ངེས་པར་དུ་འབྱུང་རྒྱུ་ཡིན་པ་ནན་བརྗོད་ཀྱིས་དབང་འཛིན་རྒྱལ་ཁབ་ཅིག་ཀྱང་གཏན་དུ་གནས་མྱོང་མེད་ལ་རྒྱ་ནག་གཞུང་ཡང་ཉམས་རྒུད་འགྲོ་ངེས་ཡིན་ཞེས་གསུངས།
དེ་བཞིན་དཔལ་ལྡན་སྲིད་སྐྱོང་མཆོག་གིས་བོད་མི་མང་ཚོགས་ལ་གསུང་བཤད་གནང་བ་དང་། མང་ཚོགས་ནས་འཛམ་གླིང་ཡུལ་གྲུ་གང་སར་ཁ་ཐོར་དུ་གནས་པའི་བོད་མི་རྣམས་ཀྱི་དཀའ་ངལ་དང་། དེ་བཞིན་བོད་མིའི་སྒྲིག་འཛུགས་ངོས་ནས་ཕྱིའི་རྒྱལ་ཁབ་ཁག་ཏུ་སློབ་གྲྭ་གསར་འཛུགས་གནང་འཆར་ཡོད་མེད་ཐད་བཀའ་འདྲི་ཞུས་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་མི་ནི་སོ་ཊའི་བོད་མི་རྣམས་ནས་གཏན་འཇགས་སློབ་གྲྭ་དང་བོད་པའི་གྲོང་ཁྱེར་གྱི་ལས་གཞི་ཐོག་ལས་དོན་སྤེལ་བཞིན་པའི་སྐོར་གསལ་སྟོན་དང་སྦྲགས། ལས་གཞི་དེ་དག་བརྒྱུད་བོད་མི་རྣམས་རུབ་སྡོད་དུ་གནས་ཐུབ་པ་དང་། གཞོན་སྐྱེས་རྣམས་རང་གི་སྐད་ཡིག་དང་། རིག་གཞུང་བཅས་ཀྱི་ཁྲོད་འཚར་ལོངས་བྱེད་ཐུབ་པའི་རེ་བ་ཡོད་ཅེས་གསུངས།
དེ་མཚུངས་དཔལ་ལྡན་སྲིད་སྐྱོང་མཆོག་སན་ཧྥ་རན་སི་སི་ཀོའི་གཟའ་འཇུག་སློབ་གྲྭར་འཚམས་གཟིགས་དང་། སློབ་ཕྲུག་དང་ཕ་མ་ལྷན་མཇལ་འཕྲད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་སློབ་གྲྭའི་ནང་བོད་ཀྱི་སྐད་ཡིག་དང་། ཞབས་བྲོ། གླུ་དབྱངས་སོགས་ཀྱི་བརྒྱུད་བོད་ཀྱི་རིག་གཞུང་རྒྱུན་འཛིན་དང་དར་སྤེལ་གཏོང་བར་བསྔགས་བརྗོད་གནང་། དེ་རྗེས་དཔལ་ལྡན་སྲིད་སྐྱོང་མཆོག་གིས་འཛམ་གླིང་སྟེང་བོད་ཀྱི་གལ་གནད་ཅེས་པའི་བརྗོད་གཞིའི་ཐོག་གསུང་བཤད་གནང་བ་དང་འབྲེལ་བོད་མི་མང་དག་ཅིག་རང་གི་ཕ་ཡུལ་སྐོར་གོ་རྟོགས་མེད་པས་གཞོན་སྐྱེས་རྣམས་ནས་བོད་ཀྱི་ལོ་རྒྱུས་ཐོག་དོ་སྣང་དགོས་པའི་ནན་བརྗོད་གནང་ཡོད། དེ་བཞིན་བོད་ཀྱི་ལོ་རྒྱུས་དང་། ས་ཁམས་ཆབ་སྲིད་ཀྱི་གལ་གནད་སྐོར་འགྲེལ་བརྗོད་ཚུད་པའི་བོད་མིའི་སྒྲིག་འཛུགས་ཀྱི་ཕུགས་དམིགས་ཡིག་ཆ་ཀློག་དགོས་པའི་འབོད་སྐུལ་གནང་ཡོད།
གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མི་རྣམས་ནས་ལྷག་དཀར་ཉིན་མོར་ཞབས་བྲོ་འཁྲབ་རྒྱུ་ཙམ་མ་ཡིན་པར་། བོད་སྐད་ཐོག་བཀའ་མོལ་གནང་སྟེ་འབྲེལ་བ་དམ་ཟམ་གཏོང་དགོས་པའི་འབོད་སྐུལ་གནང་། དེ་ལྟར་གནང་ཚེ་སྤྲོ་སྣང་ཆེ་རུ་འགྲོ་བ་མ་ཟད། རང་གི་སྐད་ཡིག་དང་རིག་གཞུང་ལ་དགའ་ཞེན་དང་གོ་རྟོགས་ཤུགས་ཆེ་རུ་འགྲོ་རྒྱུ་ཡིན་པ་གསལ་བཤད་གནང་།
དེ་ནས་གཞོན་སྐྱེས་རྣམས་ནས་རྒྱ་ནག་གིས་བོད་ནང་ཡར་རྒྱས་བཏང་ཡོད་པའི་འགྲེལ་བརྗོད་རྒྱག་བཞིན་པའི་ཐོག་བཀའ་འདྲི་ཞུས་སྐབས་དཔལ་ལྡན་སྲིད་སྐྱོང་མཆོག་གིས་རྒྱ་ནག་གི་ཁ་ཕྱོགས་གཅིག་པའི་བཤད་སྲོལ་དེར་སྐྱོན་བརྗོད་གནང་སྟེ། ལས་གཞི་དེ་དག་བོད་ཀྱི་ཁོར་ཡུག་དང་སྤྱི་ཚོགས་ལ་གནོད་པའི་གནད་དོན་དེ་དག་རྒྱ་ནག་གིས་སྣང་མེད་བྱེད་བཞིན་ཡོད་པ་གསལ་སྟོན་གནང་ཡོད། དེ་བཞིན་ཁོང་གིས་མང་ཚོགས་ལ་བོད་ནང་དུ་ཡར་རྒྱས་ཀྱི་རྣམ་པ་དེར་དཔྱད་ཞིབ་ནན་པོ་གནང་དགོས་པའི་འབོད་སྐུལ་གནང་ཞིང་། ལས་གཞི་དེ་དག་ལས་སུ་ལ་ཁེ་ཕན་ཐོབ་ཀྱི་ཡོད་མེད་དང་། ཁོར་ཡུག་དང་སྤྱི་ཚོགས་ལ་གནོད་སྐྱོན་ཇི་ལྟར་ཐེབས་ཀྱི་ཡོད་མེད་བཅས་ཀྱི་སྐོར་ཞིབ་འཇུག་གནང་དགོས་པའི་གལ་གནད་སྐོར་གསུངས།
གཞན་ཡང་དཔལ་ལྡན་སྲིད་སྐྱོང་མཆོག་སན་ཧྥ་རན་སི་སི་ཀོར་བཞུགས་པའི་རིང་བོད་དོན་རྒྱབ་སྐྱོར་བ་ཁག་དང་ལྷན་ཚོགས་འདུ་དང་། རྒྱུད་སྟོད་དགེ་རྩ་ཚོགས་པར་འཚམས་གཟིགས། དེ་བཞིན་ ABC གསར་ཁང་གིས་བཅར་འདྲི་དང་ལེན་གནང་ཡོད། ཕྱི་ཚེས་ ༢༤ ཉིན་དཔལ་ལྡན་སྲིད་སྐྱོང་མཆོག་སན་ཧྥ་རན་སི་སི་ཀོ་ནས་ཕེབས་ཐོན་གནང་སྟེ་ཨ་རིའི་གཞུང་འབྲེལ་ཕྱོགས་ཕེབས་ལེགས་པར་མཇུག་སྒྲིལ་གནང་ཡོད་པ་བཅས།།
