༄༅། །ཕྱི་ལོ་ ༢༠༢༤ ཟླ་ ༡༢ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་རྒྱལ་ས་ཝ་ཤིང་ཀྲོན་ཌི་སིར་ཨ་རིའི་རོགས་ཚོགས་ (USAID) ཀྱི་ཨེ་ཤི་ཡ་ལས་ཁུངས་ཀྱི་འཛིན་སྐྱོང་ལས་རོགས་སྐུ་ཞབས་མ་ཧི་ཀལ་ཤི་ཕར་ (Michael Schiffer) ལགས་དང་། འཛིན་སྐྱོང་ལས་རོགས་གཞོན་པ་ཨན་ཇ་ལི་ཀོར་ (Anjali Kaur) ལགས་རྣམ་གཉིས་གཙོས་པའི་ལས་བྱེད་རྣམས་དང་མཇལ་མོལ་གནང་ཡོད།

དེ་ཡང་ཨ་རིའི་རོགས་ཚོགས་ནི་བོད་པའི་སྤྱི་ཚོགས་ལ་སྨན་པའི་ལས་འཆར་དང་། ལས་འགུལ་ཁག་ལ་རྒྱུན་དུ་རོགས་སྐྱོར་གནང་མཁན་ཞིག་དང་། ལྷག་པར་བོད་པའི་ཤེས་ཡོན་དང་། འཕྲོད་བསྟེན། རིག་གཞུང་རྒྱུན་འཛིན་སླད་མཐུན་འགྱུར་གནང་བཞིན་ཡོད། ཚོགས་འདུའི་ཐོག་ཨ་རིའི་རོགས་ཚོགས་བརྒྱུད་མཐུན་འགྱུར་བཞིན་པའི་ལས་འཆར་ཁག་སྐོར་བགྲོ་གླེང་གནང་གྲུབ་རྗེས་དཔལ་ལྡན་སྲིད་སྐྱོང་མཆོག་གི་ཝ་ཤིང་ཀྲོན་གྱི་མཛད་འཆར་ཁག་ལེགས་པར་མཇུག་སྒྲིལ་ཡོད།

དེ་ནས་ཉིན་རྒྱབ་དཔལ་ལྡན་སྲིད་སྐྱོང་མཆོག་ཨ་རིའི་ཕི་ལ་ཌེལ་ཕི་ཡར་ཕེབས་འབྱོར་སྐབས་ཕི་ལ་ཌེལ་ཕི་ཡའི་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་འགྱུར་མེད་ལགས་དང་། བོད་རིགས་ཚོགས་པའི་སྐུ་ཚབ་བཅས་ནས་ཕེབས་བསུ་སྣེ་ལེན་ཞུས་གྲུབ་མཚམས་གཟའ་མཇུག་སློབ་གྲྭའི་སློབ་ཕྲུག་རྣམས་ནས་བོད་རྒྱལ་ཁབ་ཆེན་པོའི་རྒྱལ་གླུ་བླངས་ཡོད།

ཕྱི་ཚེས་ ༡༤ ཉིན་གྱི་སྔ་དྲོ་དཔལ་ལྡན་སྲིད་སྐྱོང་མཆོག་ནིའུ་ཡོག་ཏུ་ཕེབས་ཐོན་མ་གནང་གོང་ཕི་ལ་ཌེལ་པི་ཡའི་གཟའ་མཇུག་སློབ་གྲྭའི་སློབ་མ་རྣམས་ལ་བོད་ཀྱི་ལོ་རྒྱུས་དང་། བོད་ཀྱི་གལ་གནད་ཐོག་གློག་སྟོན་བརྙན་རིས་བརྒྱུད་གསུང་བཤད་གནང་ཡོད། སྐབས་དེར་སློབ་ཕྲུག་རྣམས་ལ་བོད་སྐོར་གོ་རྟོགས་གཏིང་ཟབ་ཡོང་སླད་དཔལ་ལྡན་སྲིད་སྐྱོང་མཆོག་གིས་དཔེ་དེབ་འགའ་ངོ་སྤྲོད་གནང་ཡོད་པ་བཅས།།