༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་གཞུང་འབྲེལ་འཚམས་གཟིགས་ཐེངས་གཉིས་པ་དེ་རེ་ཞིག་ལེགས་པར་གྲུབ་ཡོད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་མཇལ་ཁ་ཞུས་ཡོད་ལ། འབྲས་སྤུངས་བློ་གསལ་གླིང་གི་ཚུལ་ཁང་ཁམས་ཚན་དུ་དགའ་ལྡན་ཁྲི་རིན་པོ་ཆེ་མཆོག་གི་ཁྲི་འདོན་མཛད་སྒོར་ལྷན་ཞུགས། དེ་བཞིན་ས་གནས་ཀྱི་ཡུལ་མི་དགོས་མཁོ་ཅན་རྣམས་ལ་དམིགས་པའི་དགའ་ལྡན་ཤར་རྩེའི་ཀརྨ་ཐེབས་རྩ་ཁང་དུ་འཚམས་གཟིགས་གནང་བ་དང་འབྲེལ། ཧུབ་ལི་གྲོང་ཁྱེར་དུ་རྟེན་གཞི་བྱས་པའི་རྒྱ་གར་རྒྱལ་ཡོངས་སྤྱི་ཚོགས་ཞབས་ཞུ་ཚོགས་པའི་ཚོགས་མི་ཁག་ཅིག་དང་མཇལ་འཕྲད་ཀྱིས་འཕགས་བོད་གཉིས་ཀྱི་ལོ་རྒྱུས་དང་། ཆོས་དང་རིག་གཞུང་གྱི་འབྲེལ་བའི་སྐོར་གསུང་བཤད་དང་སྦྲགས། ཐེངས་འདིའི་མོན་གྷོ་འདོད་རྒུ་གླིང་དུ་གཞུང་འཚམས་གཟིགས་རེ་ཞིག་ལེགས་པར་གྲུབ་ཡོད་པ་རེད།
སྤྱིར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ཚེས་ ༢༦ ནས་ ༢༩ བར་འདས་པའི་ཉིན་གྲངས་བཞིའི་རིང་། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་འཇམ་མགོན་༧རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གི་ཁྲི་འདོན་མཛད་སྒོ་དང་། དགའ་ལྡན་ཁྲི་རིན་པོ་ཆེ་མཆོག་དང་དགའ་ལྡན་ཁྲི་ཟུར་རིན་པོ་ཆེ་མཆོག་རྣམ་གཉིས་ལ་མདོ་ལུགས་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་པའི་མཛད་སྒོ་བཅས་སོ་སོའི་ཐོག་ལྷན་ཞུགས་གཙོ་བོར་གྱུར་པའི་མོན་གྷོ་འདོད་རྒུ་གླིང་དུ་རིས་སུ་མ་ཆད་པའི་ཆོས་བརྒྱུད་ཁག་གི་དགོན་སྡེ་ཁག་ཏུ་མཆོད་མཇལ་དང་། མཁན་བླ་དགེ་འདུན་འདུས་མང་ཡོངས་ལ་གསུང་བཤད། སཾ་བྷོ་ཊ་གཏན་ཉིན་སློབ་གྲྭ་ཁག་ཏུ་འཚམས་གཟིགས་ཀྱིས་ལམ་སྟོན་གསུང་བཤད། ས་གནས་ཀྱི་གཞུང་དང་གཞུང་ཁོངས་མ་ཡིན་པའི་ཚོགས་སྡེ་ཁག་གི་ལས་ཁུངས་སུ་གཟིགས་སྐོར། གཞིས་གྲོང་ཁག་ཏུ་གཟིགས་ཞིབ་དང་འབྲེལ་ས་གནས་བོད་མི་མང་ཚོགས་ལ་གསུང་བཤད་བཅས་གནང་ཡོད། །
