༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༠༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་རྒྱལ་སྤྱིའི་བོད་དོན་ལས་འགུལ་ཁང་གི་ལས་ཁུངས་སུ་གདན་ཞུས་ལྟར་ཆེད་ཕེབས་ཀྱིས་དགུང་ཚིགས་དང་སྦྲགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་མི་རི་ཅཊ་གྷེ་རི་ལགས་དང་། བཀའ་ཟུར་བསྟན་པ་ཚེ་རིང་མཆོག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས་གཙོས་པའི་ལས་བྱེད་ལྷན་དུ་ཨ་རིའི་སྲིད་གཞུང་གསར་པའི་ནང་བོད་དོན་ཞུ་གཏུག་གནང་ཕྱོགས་དང་འབྲེལ་བའི་ཐབས་བྱུས་ཚོགས་འདུ་འཚོགས་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་དང་རི་ཅཊ་གྷེ་རི་རྣམ་པ་གཉིས་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་འདུའི་ཐོག་གསུང་བཤད་གནང་ཞིང་། སྐབས་དེར་དཔལ་ལྡན་སྲིད་སྐྱོང་མཆོག་གིས་རི་ཅཊ་གྷེ་རི་ལགས་ནས་ད་བར་བོད་དོན་སླད་ཕྱག་ལས་གནང་བར་བོད་མི་ཡོངས་ཀྱི་ཚབ་ཞུས་ཏེ་བཀའ་དྲིན་ཆེ་ཞུས་པ་དང་འབྲེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་རྗེས་དྲན་དགོས་པ་དང་། ལྷག་པར་དེང་སྐབས་མགོན་པོ་མཆོག་སྔར་རྒྱུན་བཞིན་ཕྱོགས་ཕེབས་གནང་རྒྱུར་མཛད་དཀའ་ཡོད་སྟབས། ད་ཆ་བོད་མི་མི་རེ་ངོ་རེས་སྤྱན་རས་གཟིགས་ཀྱི་ཕྱག་དང་སྤྱན་རེ་རེའི་ཚུལ་དུ་བོད་དོན་ཐོག་འགན་ཁུར་ན། མགོན་པོ་མཆོག་གི་མཛད་པ་འཕྲིན་ལས་རྒྱུན་སྐྱོང་ཐུབ་ངེས་ཡིན་པ་གསལ་སྟོན་དང་། དེ་ལས་འཕྲོས་ཏེ་དཔལ་ལྡན་སྲིད་སྐྱོང་མཆོག་ནས་ཚོགས་བཅར་བ་རྣམས་ནས་རང་ཉིད་ཀྱི་ལས་ཡུན་རིང་ཁོ་ན་མིན་པར་བོད་དོན་ཐོག་རྒྱུན་དུ་ནས་འགན་ཁུར་དགོས་རྒྱུ་གལ་ཆེན་པོ་ཡིན་པ་ནན་བརྗོད་གནང་ཡོད། དུས་ཡུན་ཉིན་གྲངས་གཉིས་རིང་ཚོགས་འདུའི་ཐོག་གྲོས་ཆོད་བརྒྱད་གཏན་འབེབས་གནང་ཡོད།
ཚོགས་འདུའི་ཐོག་གསུང་བཤད་གནང་གྲུབ་མཚམས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་མཆོག་གི་གཙོ་སྐྱོང་འོག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཨ་རིའི་གྲོས་ཚོགས་འཐུས་མི་ཇིམ་མེག་གྷོ་ཧན་ལགས་གཙོས་པའི་འབྲེལ་ཡོད་ཁག་ཅིག་ལྷན་ཞུགས་ཐོག ད་ལྟ་དང་འབྱུང་འགྱུར་བོད་མིའི་གནས་སྟངས་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་སྲུང་བརྩི་ཞུ་ཕྱོགས་སྐོར་བཀའ་བསྡུར་ལྷུག་པོ་གནང་ཡོད་པ་རེད།
ཕྱི་དྲོ་རྒྱལ་སྤྱིའི་བོད་དོན་ལས་འགུལ་ཁང་ནས་བདེན་པའི་འོད་སྣང་། ཞེས་པའི་གཟེངས་རྟགས་དབུལ་རྒྱུའི་མཛད་སྒོ་གོ་སྒྲིག་ཞུས་པར་དཔལ་ལྡན་སྲིད་སྐྱོང་མཆོག་ལྷན་ཞུགས་གནང་ཡོད་པ་དང་། འདི་ལོའི་བདེན་པའི་འོད་སྣང་གི་གཟེངས་རྟགས་དེ་བཞིན་ཨ་རིའི་གྲོས་ཚོགས་ཀྱི་ཚོགས་ཟུར་ལྕམ་སྐུ་ནན་སི་པི་ལོ་སོ་མཆོག་ནས་བོད་དང་བོད་མིར་རྒྱབ་སྐྱོར་དང་རེ་བའི་འོད་སྣང་སྐྲུན་པར་བཀའ་དྲིན་རྗེས་དྲན་མཚོན་ཆེད་དུ་ཕུལ་ཡོད། སྐབས་དེར་ལྕམ་སྐུ་ནན་སི་པི་ལོ་སོ་མཆོག་གིས་རང་ཉིད་བོད་ནང་དངོས་སུ་ཕེབས་པའི་མྱོང་བ་རྗེས་དྲན་དང་སྦྲགས། སྐབས་དེར་རྒྱ་ནག་གཞུང་གིས་བོད་ནང་ཡར་རྒྱས་དང་། བོད་མིའི་འཚོ་བ་བཟང་དུ་ཕྱིན་ཡོད་ལུགས་ཀྱི་བཅོས་མའི་རྣམ་པ་བསྟན་པར་ཡིད་སྨོན་སྐྱེས་མེད་པ་དང་། རྒྱ་གཞུང་གིས་ཕྱིའི་རྣམ་པ་ཙམ་ནས་བོད་མིའི་ནང་སེམས་ཀྱི་ཞི་བདེ་དང་རང་དབང་ལ་རྡོག་རོལ་གཏོང་གི་ཡོད་པ་གསལ་སྟོན་གནང་ཡོད། དེ་བཞིན་ཁོང་མོས་གལ་ཏེ་ནུབ་ཕྱོགས་རྒྱལ་ཁབ་ཚོས་རྒྱ་ནག་ལྷན་དུ་དཔལ་འབྱོར་གྱི་ཁེ་བཟང་ཙམ་གྱི་ཆེད་དུ་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་སྣང་མེད་གཏང་ན། བཟང་སྤྱོད་ཐོག་རྒྱལ་ཁབ་དེས་འཛམ་གླིང་ས་ཁུལ་གཞན་ཁག་ཏུ་འགྲོ་བ་མིའི་ཐོབ་ཐང་གི་གནད་དོན་བཤད་སའི་གཞི་རྩ་མེད་པར་འགྱུར་ངེས་ཡིན་པ་གསུངས།
མཛད་སྒོ་གྲུབ་མཚམས་ཚོགས་བཅར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་འབྲེལ་བའི་དངོས་བྱུང་གློག་བརྙན་བདེ་སྐྱིད་ཀྱི་ཤེས་རབ་ཅེས་པ་གཟིགས་འབུལ་ཞུས་ཡོད་པ་བཅས།།
