༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༥ ཉིན་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཉི་འོང་གྲོས་ཚོགས་ཁང་དུ་ཕེབས་ཏེ་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ཨེ་རི་ཀོ་ཡ་མ་ཏ་ནི་ལགས་དང་། དྲུང་ཆེ་སྐུ་ཞབས་ཧི་རོ་ཤི་ཡ་མ་དྷ་ལགས་རྣམ་གཉིས་དང་མཇལ་འཕྲད་གནང་ཡོད།
དེ་ཡང་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་དྲུང་ཆེ་རྣམ་གཉིས་དང་མཇལ་འཕྲད་གནང་བ་དེ་ནི། ཉེ་ཆར་ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༩ ཉིན་ཚོགས་འདུའི་སྐབས་གྲོས་བསྡུར་བྱུང་བའི་གནད་དོན་དང་། བོད་ནང་གི་གནས་སྟངས། མ་འོངས་ལས་འཆར་ཁག་གི་སྐོར་ངོ་སྤྲོད་ཞུ་ཆེད་ཡིན།
སྐབས་དེར་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་དྲུང་ཆེར་བསྐོ་གཞག་གནང་བར་འཚམས་འདྲིའི་གསུང་འཕྲིན་གནང་བ་དེ་ཕུལ་བ་དང་ཆབས་ཅིག དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནས་ཀྱང་ཨ་རི་ནས་འཚམས་འདྲིའི་བཀྲ་ཤིས་བདེ་ལེགས་གནང་བ་དང་། འཕྲིན་ཡིག་ཅིག་རིང་མིན་འབྱོར་རྒྱུ་ཡིན་སྐོར་གསུངས།
དེ་རྗེས་ཨརྱ་ཚེ་དབང་རྒྱལ་པོ་ལགས་ཀྱིས་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་དྲུང་ཆེ་རྣམ་གཉིས་ལ་རྒྱ་ནག་གཞུང་གིས་མུ་མཐུད་ཆོས་ལུགས་ལ་དམ་བསྒྲགས་དང་། འགྲོ་བ་མིའི་ཐོབ་ཐང་རྡོག་རོལ། བོད་ཕྲུག་རྣམས་རྒྱ་ནག་གཞུང་གི་མི་སེར་སྤེལ་ཡུལ་གཏན་འཇགས་སློབ་གྲྭའི་ནང་བཙན་དབང་གིས་ལྟ་བ་སློབ་གསོ་གཏོང་བཞིན་པའི་སྐོར་གསལ་བཤད་གནང་བ་དང་། རྒྱ་ནག་གིས་བོད་ནང་དམ་བསྒྲགས་དང་རིག་གཞུང་རྩ་མེད་གཏོང་བཞིན་པ་མཚམས་འཇོག་དགོས་པའི་བསྒྲགས་གཏམ་སྤེལ་དགོས་པའི་རེ་སྐུལ་ཞུས།
དེ་བཞིན་བོད་རྒྱའི་རྩོད་རྙོག་སེལ་ཐབས་ཀྱི་ཁྲིམས་ཡིག་གི་གལ་གནད་སྐོར་འགྲེལ་བརྗོད་གནང་བ་དང་། ཁྲིམས་ཡིག་དེའི་ཉི་འོང་སྐད་ཡིག་ཐོག་ཡོད་པའི་ཡིག་ཆ་ཞིག་ཕུལ་ཏེ། ཉི་འོང་ནང་དུའང་དེ་ལྟ་བུའི་སྲིད་བྱུས་ཁྲིམས་ཡིག་གཏན་འབེབས་ཡོང་བའི་རེ་སྐུལ་ཞུས་ཤིང་། བོད་དང་འབྲེལ་བའི་དཔེ་དེབ་དང་གནས་ཚུལ་ཡིག་ཆ་ཁག་ཅིག་ཀྱང་ཕུལ་ཡོད།
གྲོས་ཚོགས་ཀྱི་ཚོགས་གཙོ་ཨེ་རི་ཀོ་ཡ་མ་ཏ་ནི་ལགས་དང་དྲུང་ཆེ་ཧི་རོ་ཤི་ཡ་མ་དྷ་ལགས་གཉིས་ཀྱིས་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་བོད་དོན་སྐོར་གསལ་བཤད་གནང་བར་ཐུགས་རྗེ་ཆེ་ཞུས་པ་དང་འབྲེལ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་དང་། དཔལ་ལྡན་སྲིད་སྐྱོང་མཆོག་རྣམ་གཉིས་ཀྱིས་འཚམས་འདྲི་གནང་བར་ཐུགས་རྗེ་ཆེ་ཞུས་ཡོད། གྲོས་ཚོགས་འཐུས་མི་རྣམ་པ་གཉིས་ནས་བོད་མི་ཚོར་དྲང་བདེན་ཡོང་ཐབས་སུ་ཤུགས་སྣོན་རྒྱག་རྒྱུའི་ཁས་ལེན་དང་སྦྲགས། ཉི་འོང་མི་སྒེར་དང་ཚོགས་སྡེ་ཁག་ལ་བོད་དོན་གོ་རྟོགས་སྤེལ་བར་མཉམ་ཞུགས་བྱ་རྒྱུའི་སློབ་སྟོན་གནང་། དེ་མཚུངས་ཁོང་རྣམ་པས་པཎ་ཆེན་རིན་པོ་ཆེ་གང་དུ་བཞུགས་མིན་དང་། རྒྱ་ནག་གིས་༸གོང་ས་མཆོག་གི་ཡང་སྲིད་ངོས་འཛིན་ལ་ཇི་ལྟར་ཐེ་བྱུས་བྱེད་འཆར་ཡོད་མེད་སྐོར་གསལ་བཤད་ཡོང་བ་ཞུས། ཁོང་གཉིས་ཀྱིས་བོད་མིའི་རང་དབང་དང་དྲང་བདེན་གྱི་འཐབ་རྩོད་ལ་རྒྱབ་སྐྱོར་ཤུགས་ཆེ་ཡོད་པ་བསྐྱར་ནན་གནང་ཡོད།
སྐབས་དེར་སྐུ་ཚབ་དོན་གཅོད་དང་ལྷན་དུ་དྲུང་ཆེ་བཀྲ་ཤིས་དབྱངས་འཛོམས་ལགས་ལྷན་བཅར་ཞུས་ཡོད་པ་བཅས།།
