༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༢༦ ནས་ ༣༠ བར་ཆོས་རིག་ལས་ཁུངས་ནས་རྒྱ་གར་ལྷོ་ཕྱོགས་ཁུལ་གྱི་དགོན་སྡེ་ཁག་ ༡༢ ནང་གྲངས་འཛིན་དཔེ་མཛོད་ཀྱི་ལས་གཞིའི་སྦྱོང་བརྡར་ཁག་ལེགས་པར་མཇུག་སྒྲིལ་ཡོད།
དེ་ཡང་ཕྱི་ཚེས་ ༢༦ ཉིན་མོན་གྷོ་འདོད་རྒུ་གླིང་དུ་རྟེན་གཞི་བྱས་པའི་འབྲས་སྤུངས་བློ་གསལ་གླིང་དཔེ་མཛོད་ཁང་དུ་དགོན་སྡེ་ཁག་དྲུག་སྟེ། འབྲས་སྤུངས་བློ་གསལ་གླིང་དང་། འབྲས་སྤུངས་སྒོ་མང་། དགའ་ལྡན་བྱང་རྩེ། དགའ་ལྡན་ཤར་རྩེ། ར་སྟོད་གྲྭ་ཚང་། ས་སྐྱ་རྩེ་ཆེན་མདོ་སྔགས་ཆོས་གླིང་བཅས་ཀྱི་དཔེ་མཛོད་དོ་དམ་པ་རྣམས་ལ་སྦྱོང་བརྡར་ཕུལ་ཡོད། སྐབས་དེར་བོད་ཀྱི་དཔེ་མཛོད་འཛིན་སྐྱོང་མ་ལག་མཉེན་ཆས་དང་། མ་དེབ་ཨང་རྟགས་སྦྱོར་སྟངས་སོགས་ཀྱི་སྐོར་ངོ་སྤྲོད་གནང་ཡོད།
དེ་ནས་ཕྱི་ཚེས་ ༢༦ དང་ ༢༧ ཉིན་དགོན་སྡེ་སོ་སོའི་དཔེ་མཛོད་ཁང་དུ་གཟིགས་སྐོར་གནང་ཞིང་། བོད་ཀྱི་གྲངས་འཛིན་དཔེ་མཛོད་ཀྱི་ལས་གཞིའི་འགྲོ་ལུགས་བཅས་ལ་རྟོག་ཞིབ་དང་། དཔེ་ཆ་ཁག་ལ་མ་དེབ་ཨང་རྟགས་སྦྱོར་སྟངས་སྐོར་སྦྱོང་བརྡར་གནང་ཡོད།
ཕྱི་ཚེས་ ༢༨ དང་ ༢༩ ཉིན་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ཀྱི་སེ་ར་བྱེས་དང་། སེ་ར་སྨད། བཀྲ་ཤིས་ལྷུན་པོ། རྣམ་གྲོལ་གླིང་དགོན་བཅས་ཀྱི་དཔེ་མཛོད་དོ་དམ་པ་རྣམས་ལ་སྦྱོང་བརྡར་ཕུལ་ཡོད། དེ་ཡང་བཀྲ་ཤིས་ལྷུན་པོ་དགོན་གྱི་མཁན་རིན་པོ་ཆེ་གཟིག་རྒྱབ་སྤྲུརིན་པོ་མཆོག་གིས་ཆོས་རིག་ལས་ཁུངས་ཀྱི་ལས་བྱེད་དང་ལྷན་མཇལ་འཕྲད་གནང་སྟེ་ལས་གཞིའི་སྐོར་དགོངས་ཚུལ་དང་བསྔགས་བརྗོད་གནང་ཡོད།
ཕྱི་ཚེས་ ༣༠ ཉིན་ཧོན་སུར་གཞིས་ཆགས་སུ་ཡོད་པའི་རྒྱུད་སྨད་གྲྭ་ཚང་དང་། རྫོང་དཀར་ཆོས་སྡེ་དགོན་པ་བཅས་ཀྱི་དཔེ་མཛོད་དོ་དམ་པ་རྣམས་ལ་དཀར་ཆག་དང་། དགོས་མཁོའི་ལམ་སྟོན་འཕར་མ་གནང་ཡོད།
ལས་གཞི་འདི་ནི་ཨ་རིའི་རོགས་ཚོགས་ USAID ཀྱི་མཐུན་འགྱུར་འོག་བོད་མིའི་སྤྱི་ཚོགས་ནང་རིག་གཞུང་སོར་ཆུད་དང་ནུས་པ་གོང་སྤེལ་གྱིས་གོ་སྒྲིག་གནང་ཡོད། །
