༄༅། །ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༥ ནས་ ༢༩ བར་ཤེས་རིག་ལས༌ཁུངས་ཤེས་ཡོན་ལྷན་ཚོགས་ཡིག་ཚང་གི་གོ་སྒྲིག་འོག གཞི་རིམ་གོང་མའི་འཛིན་རིམ་དགུ་པའི་སྤྱི་ཚོགས་ཚན་རིག་སློབ་དེབ་གཏན་འབེབས་ཀྱི་ཚོགས་འདུ་དེ་ཤེས་རིག་ལས་ཁུངས་ཀྱི་ཚོགས་ཁང་དུ་ཚོགས་ཡོད།དེ་ཡང་གོང་ཚེས་ཉིན་བཙན་བྱོལ་བོད་མིའི་གཞི་རིམ་གྱི་ཤེས་ཡོན་སྲིད་བྱུས་ཀྱི་དགོངས་དོན་དང་། གཞི་རིམ་གོང་མའི་བསླབ་གཞིའི་རྩ་འཛིན་ལྟར་གཞི་རིམ་གོང་མ་འཛིན་རིམ་དགུ་པའི་སློབ་དེབ་ཀྱི་བསླབ་གཞི་རྩ་འཛིན་དང་དཀར་ཆག་བཟོ་སྒྲིག་གི་ཚོགས་འདུ་གཞིར་བཟུང་སློབ་དེབ་རྩོམ་སྒྲིག་པ་བོན་གྲོག་པ་སངས་ཚེ་རིང་ལགས་ཀྱིས་རྩོམ་སྒྲིག་ཡོངས་སུ་གྲུབ་སྟེ་མཐའ་མའི་གཏན་འབེབས་ཀྱི་ཚོགས་འདུ་ཚོགས་ཡོད།
ཐེངས་འདིའི་བསྐྱར་ཞིབ་ཚོགས་འདུ་ལ་ཤེས་ཡོན་ལྷན་ཚོགས་ཡིག་ཚང་གི་སློབ་དེབ་ཚན་པའི་འགན་འཁུར་བ་དགེ་འདུན་དོན་ཡོད་ལགས་དང་། སློབ་དེབ་རྩོམ་སྒྲིག་པ་བོན་གྲོག་པ་སངས་ཚེ་རིང་ལགས། གཞི་རིམ་གོང་མའི་སློབ་དེབ་བསྐྱར་ཞིབ་ཚོགས་ཆུང་གི་ཚོགས་མི་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་རྒན་ཀུན་དགའ་ལགས་དང་། དྷ་ས་བོད་ཁྱིམ་གྱི་སྤྱི་ཚོགས་ཚན་རིག་དགེ་རྒན་བསྟན་འཛིན་དབང་ཕྱུག་ལགས་དང། མེས་དབོན་གཙུག་ལག་དཔེ་སྟོན་སློབ་གྲྭའི་སྤྱི་ཚོགས་ཚན་རིག་དགེ་རྒན་ཀུན་བཟང་རྡོ་རྗེ་ལགས། སཾ་བྷོ་ཊ་ཅན་དྷ་གྷི་རིའི་སྤྱི་ཚོགས་ཚན་རིག་དགེ་རྒན་བསྟན་འཛིན་དབྱངས་སྐྱིད་ལགས། ཅོན་དྷ་ར་བོད་ཁྱིམ་སློབ་གྲྭའི་སྤྱི་ཚོགས་ཚན་རིག་དགེ་རྒན་དབྱངས་སྒྲོན་བཀྲ་ཤིས་ལགས། རཱ་ཇ་པུར་བོད་ཁྱིམ་སློབ་གྲྭའི་སྤྱི་ཚོགས་ཚན་རིག་དགེ་རྒན་བློ་བཟང་དོན་གྲུབ་ལགས། སྤྱི་ཚོགས་ཚན་རིག་དགེ་རྒན་ཟུར་པ་ངག་དབང་ཚེ་བརྟན་ལགས་བཅས་ལྷན་འཛོམས་ཀྱིས་འཛིན་རིམ་དགུ་པའི་སྤྱི་ཚོགས་ཚན་རིག་གི་སློབ་དེབ་གཏན་འབེབས་ཀྱི་རགས་ཟིན་ལ་སློབ་ཕྲུག་ཚོའི་དགོས་མཁོ་དང་དོ་དབྱིངས་ལ་གཞིགས་ནས་གྲོས་བསྡུར་དང་འགྲོ་གླེང་ཐོག་ནས་ལེགས་གྲུབ་བྱུང་ཡོད་པ་དང་། མགྱོགས་མྱུར་པར་སྐྲུན་བྱས་ཏེ་སློབ་གྲྭ་ཁག་ལ་འགྲེམས་སྤེལ་བྱེད་རྒྱུ་ཡིན་འདུག
ཐེངས་འདིའི་ཚོགས་འདུའི་འགྲོ་གྲོན་ཡོངས་རྫོགས་ཌེ་ནི་ཌ་རོགས་ཚོགས་ཀྱི་མཐུན་འགྱུར་རོགས་རམ་གནང་ཡོད་པ་བཅས། །
