༄༅། །ཕྱི་ལོ་ ༢༠༢༤ ཟླ་བ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེ་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༥ འཁོར་བའི་དུས་དྲན་དྲུང་བརྩི་ཞུས་ཡོད།དེ་ཡང་ཉིན་དེར་ཞོགས་པར་ཆུ་ཚོད། ༠༩།༣༠ ཐོག་པ་ཀུལ་བོད་ཁྱིམ་ཚོགས་ཁང་དུ་ཁྱབ་ཁོངས་སེར་སྐྱ་མང་ཚོགས་དང་། དགེ་ལས་སློབ་ཕྲུག་རྣམས་ཚང་འཛོམས་ཀྱིས་༸རྒྱལ་བའི་ཞབས་བརྟན་དང་། དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་དང་བསང་གསོལ་བཅས་གྲུབ་མཚམས་ཚེ་འདས་ས་གནས་འགོ་འཛིན་མཆོག་གི་སླད་སྨོན་ལམ་གསུང་འདོན་གནང་ཡོད།
དེ་རྗེས་སེར་སྐྱ་མི་མང་རྣམས་སྐུ་བཞེངས་ཐོག་མ་ན་ལི་སཾ་བྷོ་ཌ་ཉིན་སློབ་ཀྱི་སློབ་མ་མཉམ་སྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་དང་། ནོ་སྦེལ་ཞེ་བདེའི་བསྟོད་དབྱངས་འབུལ་ལམ་ཞུས་རྗེས་བཀྲ་ཤིས་རྟེན་འབྲེལ་མཚོན་སླད་མི་མང་ཡོངས་ལ་གསོལ་ཇ་འབྲས་བསིལ་འདེགས་འབུལ་གྱིས་ཀུ་ལུ་ས་གནས་ཀྱི་ལས་སྣེ་རྣམ་པ་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྲེལ་མཇལ་དར་འབུལ་རྗེས་ས་གནས་འགོ་འཛིན་ལས་ཚབ་ནས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་ཞུས་མཚམས་མི་མང་ཚོགས་འཛོམས་སར་དཔལ་ལྡན་ནང་སྲིད་ལས་ཁུངས་ཀྱི་བཀའ་ཡིག་ཕེབས་ལམ་དགོངས་དོན་བཞིན་ལོ་རྗེས་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གོ་སྟོན་དང་བསྟུན་རྒྱལ་སྤྱིའི་ཁྱོན་ལ་བྱམས་བརྩེའི་ལོ་ཞེས་བརྩི་སྲུང་དང་། བོད་མིའི་སྒྲིག་འཛུགས་ནས་བོད་གཞིས་བྱེས་ལྷ་མི་ཡོངས་ཀྱི་ཚབ་ཞུས་ཏེ་མགོན་པོ་མཆོག་ལ་སྐུ་གེགས་ཀྱི་བར་ཆད་ཞི་བ་དང་སྐུ་ཚེ་ཡུན་དུ་བརྟན་སླད་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་འཆར་ཡོད་པ་གསལ་བ་བཞིན་འདི་གའི་ས་གནས་མི་མང་ངོས་ནས་བླ་སློབ་དད་དམ་དང་། སྤྱི་མཐུན་དགེ་ཚོགས་རྟེན་འབྲེལ་མཚོན་ཕྱིར་བློ་བཅད་ཞལ་འདེབས་གནང་སྐྱོང་ཡོང་བའི་ནན་སྐུལ་ཞུས་ཡོད་ལ། འདི་ག་ས་གནས་སུའང་གོ་སྟོན་གོ་སྒྲིག་ཚོགས་ཆུང་ནས་གོ་སྟོན་དང་འབྲེལ་ལས་འཆར་ཁག་བཟོ་སྒྲིག་སྐབས་དེ་ལ་མི་མང་ངོས་ནས་རྒྱབ་སྐྱོར་དང་མཐུན་འགྱུར་ཡོང་བའི་འབོད་སྐུལ་ཞུས་པ་དང་ལྷན་དུ་མི་མང་རྣམས་ལ་བཙན་བྱོལ་བོད་མིའི་སྨན་བཅོས་ལྟ་སྐྱོང་གི་གལ་གནད་སྐོར་གོ་རྟོགས་སྤེལ་ཡོད་ལ་རང་ཉིད་སྨན་གྲོན་ཁེ་ཕན་སླད་ཕྱི་ལོ་ ༢༠༢༥ ལོའི་སྨན་བཅོས་ལྟ་སྐྱོང་ཚོགས་མི་གསར་བསྡུ་སྐབས་མཉམ་བཞུགས་གནང་དགོས་པའི་རེ་སྐུལ་ཞུས་གནང་ཡོད།
དེ་རྗེས་ས་འཐུས་ཚོགས་གཙོ་ཀྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་ཡོད། ཉིན་དེར་མཛད་སྒོ་སྐབས་མ་ན་ལི་སཾ་བྷོ་ཌའི་སློབ་མ་རྣམས་ནས་བོད་སྐད་ཡིག་དང་ཨང་རྩིས་ཀྱི་རིགས་ལམ་རྩོད་གནང་ཡོད། ཕྱི་ལོ་ ༢༠༢༤ ལོའི་མ་ན་ལི་སཾ་བྷོ་ཌའི་ཉིན་སློབ་ཀྱི་སློབ་མ་རྩེ་ཕུད་ཕོ་མོ་གཉིས་ལ་བྱ་དགའ་གསོལ་བསྩལ་གནང་གིས་གཞུང་འབྲེལ་མཛད་སྒོ་་རྒྱལ་ཁའི་ངང་མཇུག་སྒྲིལ་ཡོད། །
