༄༅། ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༧ ཉིན་ཨི་ཊ་ལིའི་རྒྱལ་ས་རོམ་དུ་རྟེན་གཞི་བྱས་པའི་ཨི་ཊ་ལིའི་གྲོས་ཚོགས་གོང་མའི་ཚོགས་ཁང་ཞིག་ཏུ། ཨ་མ་ལགས། ཞེས་པའི་ཕྱག་དེབ་དབུ་འབྱེད་ཀྱི་མཛད་སྒོ་ཞིག་ཚོགས་ཡོད། ཨ་མ་ལགས། ཞེས་པའི་ཨི་ཊ་ལིའི་སྐད་ཡིག་ཐོག་ཡོད་པའི་ཕྱག་དེབ་དབུ་འབྱེད་ཀྱི་མཛད་སྒོར་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་ཕྱག་དེབ་རྩོམ་པ་པོ་དང་། བོད་དོན་ཐོག་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་འབྲེལ་མུ་མཐུད་བོད་དོན་ཐོག་རྒྱབ་སྐྱོར་ཡོང་བའི་རེ་སྐུལ་ཞུས་གནང་ཡོད།
གཞན་ཡང་མཛད་སྒོའི་ཐོག་༸སྐུའི་གཅུང་མོ་བཀའ་ཟུར་རྗེ་བཙུན་པདྨ་ལགས་ཀྱིས་ཨི་ཊ་ལིའི་སྐད་ཡིག་ཐོག་ཡོད་པའི་ཕྱག་དེབ་འདི་སླད་མར་སྐད་ཡིག་གཞན་ཁག་ཏུའང་ཕབ་སྒྱུར་ཐུབ་ཚེ་བོད་དོན་དྲིལ་བསྒྲགས་ཡོང་རྒྱུར་དགེ་ཚན་ཡོད་སྐོར་གྱི་གསུང་བཤད་གནང་ཡོད།
གཞན་ཡང་སྐབས་དེར་ཨི་ཊ་ལིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨན་ཊི་ཊེ་པི་ར་མོ་ (Andrea De Priamo) ལགས་དང་། ཚོགས་གཞོན་ལྕམ་སྐུ་ཨི་ལི་ནི་ཡ་མལ་ཝ་སི་ (Ilenia Malvasi) ལགས། བཀའ་ཟུར་བསྟན་པ་ཚེ་རིང་ལགས་བཅས་ནས་ཀྱང་གསུང་བཤད་གནང་ཡོད་པ་བཅས། །
